Geij bi neix daeuj, Fuzsuih Yen youq “sonhag、 son’gyauq、 yungh” daengj roengz goengfou, guh ndei、ok banhfap ndei、cauh cingzcik ndei, yungh lai cungj banhfap guh ndei hong yungh doigvangq Cuengh Gun song vah saw.

Guh ndei sonhag Cuengh Gun song vah saw, cuknet gij giekdaej hong. Fuzsuih Yen miz Cunghdungh Cin Cungsim Siujyoz、Cunghdungh Cin Sinhlungz Siujyoz caeuq Cunghdungh Cin Swhdungz Siujyoz 3 aen hagdangz sawq son Cuengh Gun song vah saw, miz lauxsae Vahcuengh 19 vunz, miz hagseng hag Vahcuengh 1391 vunz. 3 aen hagdangz neix nyinhcaen guh sonhag Cuengh Gun song vah saw, cungfaen yungh gijndei Sawcuengh, yungh Cuengh coi Gun, Cuengh Gun giethab, aeundaej le itdingh cingzcik.

Guh ndei senhconz son’gyauq Vahcuengh, cauh’ok gij heiqfaenh guhhong ndei. Geij bi neix daeuj, Fuzsuih Yen yawjnaek fatyiengz vwnzva Bouxcuengh, doidoengh swnjcienz caeuq laebdaeb hwngfat Vahcuengh, yungh lai cungj hingzsik guh hong son’gyauq Vahcuengh Sawcuengh, doenggvaq baenzroix son’gyauq senh- conz, caenh’itbouh gyalai gij cingzsoq roxyiuj vwnzva vahgangj minzcuz, cauh’ok gij heiqfaenh guhhong ndei.

Guh ndei yungh doigvangq Cuengh Gun song vah saw, coicaenh minzcuz doxgyau dox baedauq. Daengx yienh gak gaep dangjcwng gihgvanh、giswyez danhvei gaijgwz le aenyaenq、baiz danhvei cungj yungh Cuengh Gun song cungj saw; youq Fuzsuih Densidaiz、Gvangjbo Dendaiz hai 《Saehmoq Vahcuengh》, cauh’ok gij heiqfaenh yungh vah saw minzcuz noengznwd; yienh yinzminz fazyen nyinhcaen guh ndei hong saemjbuenq hengzguh, doenggvaq guh ndei laeb- anq、diuzgaij、hengzguh daengj hothoh, yungh Begvah、Vahcuengh dangdieg caeuq Vahbujdungh bangrengz hong saemj、hengz aeundaej cingzcik yienhda.(Linz Yingj)