Gij din- fwngz guh manhdaengjmbwn Dendwngj dwg cungj dinfwngz cojcienz miz minzcuz daegsaek ndeu, dwg vunzlai Denhdwngj guhhong gvaq saedceij ndawde cauh okdaeuj haenx. De cienzlah youq ranghdieg ndaw Denhdwngj Yen lai, baugvat Denhdwngj Cin、Cingez Cin、Lungzmingz Cin、Yangduh Cin、Fuzsinh Yangh、Siujsanh Yangh、Bajhoz Yangh、Sangyingj Yangh、Dozganh Yangh、Ningzganh Yangh、Cinyenj Yangh、Dunghbingz Yangh daengj dieg.

Gij manhdaengjmbwn Denhdwngj Yen, aen’aen daengj coh mbwn, aen iq danhseih manh haenq. Gij mbaek guh manhdaengjmbwn Denhdwngj baugvat sam mbaek daeuz. Mbaek daih’it dwg genj lwgmanh. Genj aeu cungj manhdaengjmbwn Denhdwngj dangdieg gag miz、ndaej haenh guh“lajmbwn lwgmanh daih’it”haenx, saek hoengz sien, aen ndei mbouj vaih. Aeu gij lwgmanh neix daeuj guh liuhdaeuz. Mbaek daihngeih dwg bwh ndei doenghyiengh boiq. Aeu bwh ndei gyaeujho suenz、gyu mwnz、laeujhau、soemjmeiq、lwgmaed、leizgaeqsoemj daengj. Mbaek daihsam dwg guh ciengq manhdaengjmbwn. Swiq ndei caemhcaiq daj suenz gij manhdaengjmbwn guh liuhdaeuz haenx, liuxle caeuq doenghyiengh boiq doxgyaux, iep duenh nanz ndeu, mbouj coq doenghyiengh wnq lai, bauj gij daegsaek、hom caeuq manh bonjmiz, saek ndeiyawj、baenzgwn, liuxle baucang ndei.

Bi 2010, gij dinfwngz guh manhdaengjmbwn Denhdwngj ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej liedhaeuj daihsam buek swcigih gaep feihvuzciz vwnzva yizcanj mingzloeg.

Daj bi 2010 hwnj, Denhdwngj Yen moix bi cungj gawjbanh aen ciet manhdaengjmbwn, laeb aen bingzdaiz hawj giyez dangdieg caeuq gij giyez Yeznanz、 Laujvoh、 Majlaisihya daengj guekgya Dunghmungz guh seng’eiq. Doengzseiz, leihyungh Cungguek-Dunghmungz Boz- lanjvei caeuq gij duihgaivei Cungzcoj banh haenx, haenqrengz doi bae gij doenghyiengh manhdaengjmbwn Denhdwngj. Dangqnaj, aen yienh neix miz 6 aem giyez guh ciengq manhdaengjmbwn, bi cungjcanjciz ik maenz doxhwnj.