Gvangjsih Cingsih Si, diegyouq henzguek baihnamz guekcoj, soqlaiz miz aen cwngheuh dienheiq “Siuj- gunhmingz” caeuq bya dah “Siuj- gveilinz”. Gaengawq gyoepsuenq, bi 2012, daengx si gungh miz 65 fanh vunz, vunz Bouxcuengh ciemq 99.4%, dwg guek raeuz aensingz vunz Boux- cuengh ciemq ceiq lai. Youq dieg vunz Bouxcuengh comzyouq okhingz neix, baenzlawz yungh Cuengh Gun song vah daezhawj swhfaz fugsaeh hawj vunzlai minzcuz vunznoix? Liengz Bungzboz boux fazgvanh Cuengh Gun song vah Cingsih Si Yinzminz Fazyen neix youq ndaw hong saemjbuenq guh’ok le gij gejgangj ceiq ndei. Mboengqneix, gicej baedaengz Cing- sih Si Yinzminz Fazyen cienmonz caijfangj de.

Liengz Bungzboz, Bouxcuengh, vunz Gvangjsih Cingsih Si Vadung Cin, bi 1971 ndwen 5 seng, bi 1995 haeuj fazyen guhhong. Dangguh fazgvanh bonjdieg Cingsih, de daj iq gangj Vahcuengh dangdieg raeuzled, sugrox fungsug sibgvenq dangdieg, rox caeuq vunzlai gangjgoj, cawqleix cengnauh ak raixcaix.

Yungh Vahcuengh dwg gij naengzlig giekdaej

Gij vah Cingsih Si yungh daeuj gangj cujyau dwg Vahcuengh (doeng- sug heuhguh “Yang”), caenhguenj baih saebaek Cingsih miz mbangj dieg miz vunz gangj “Cung” “Noengzan” “Sengj” “Fuj” doenghgij vahdeih- fueng Vahcuengh neix, hoeng gij vunz gangj vahdeihfueng Vahcuengh neix dingzlai rox gangj “Yang”, couhcinj mbouj rox gangj hix dingq ndaej rox.

Gangj daengz baenzlawz yungh Vahcuengh saemjleix anqgienh, Liengz Bungzboz gig miz gamjsouh dwk naeuz: “Youq mwh saemjleix anqgienh, gij ceiq hoj fazgvanh bungzdaengz haenx dwg baenzlawz yungh Vahcuengh aeu gij hangzvah faplwd mizgven, genjdanh mingzbeg gangj hawj bouxdangsaeh rox.” Liengz Bungzboz lwnh gij nanzdaez mwh de saemjleix anqgienh bungzdaengz gvaq haenx hawj gicej: Youq mwh gaijgez gij anqgienh lizvwnh, baenzlawz dingh “gamjcingz faenmbek” caeuq “doxbaen youq” song aen hangzvah faplwd neix? “Hainduj, gou yungh Vahgun gejhoiz baenz byongh ngoenz, bouxdangsaeh lij dwg lumjnaeuz rox youh lumjnaeuz mbouj rox. Doek- laeng gou yungh Vahcuengh daeuj gejgangj, ‘gamjcingz faenmbek’ couhdwg ‘mbouj habsik’, ‘doxbaen youq’ yungh Vahcuengh daeuj gangj couhdwg ‘mbouj habsik, mbouj miz gamjcingz nauq, gvanbaz song mbiengj gak boux gag gvaq ndwenngoenz’. Baenzneix baez gangj, bouxdangsaeh couh cungj rox lo!” Liengz Bungzboz lwnh gicej.

“Youq Cingsih dieg Bouxcuengh comzyouq dingzlai cungj yungh Vahcuengh doxgangj neix, yungh Cuengh Gun song vah saemjleix anqgienh couhdwg gij naengzlig giekdaej.” Liengz Bungzboz naeuz.

Gij vah cigciep haeuj gizlaeg ndawsim

Bi 2000 byongh bi laeng, Liengz Bungzboz youq mwh saemjleix aen anqgienh lizvwnh ndeu, aenvih boux- dangsaeh song mbiengj cungj dwg vunz bonjdieg Cingsih, ndigah daengx aen gocwngz cungj yungh Vahcuengh daeuj saemjleix. De mwhhaenx gamj- souh gig laeg, yungh Vahcuengh saemjleix anqgienh, caeuq boux- dangsaeh doxgangj engq ngaih, bouxdangsaeh ndawsim mbouj dingj, caeuq bouxdangsaeh liz gyawj le, couh aeundaej yaugoj siengj mbouj daengz lo.

Liengz Bungzboz geiq ndaej gig maenh, daj nawcaeux yaek daengz banringz, aen anqgienh haenx hai- dingz saemjleix byongh ngoenz ndeu lo, song mbiengj lij dwg genhciz gij siengjfap bonjfaenh, mbouj miz mbiengj lawz haengj nyiengh, gyoengqde cijnaengz daengx roengz- daeuj gonq, mbouj miz banhfap laebdaeb roengzbae. Youq mwh saemjleix anqgienh, Liengz Bungzboz yawj ok goengda lwgnyez dwg boux ceiq siengj ciengj gij gienzleih ciengx lwgnyez, yienghneix de aeu giz neix guh giz caphaeuj, rag goengda lwgnyez gvaq henz bae, laeglemx doiq goengda lwgnyez naeuz: “Sou seizneix ciengj gienzleih ciengx lwgnyez mbouj miz loek, hoeng mwngz siengj gvaq mbouj, boux lwgnyez neix dwg lwgsai, dangh- naeuz gvaqlaeng daxmeh lwgnyez siengj gezvwnh moq, daiq lwgnyez hix mbouj fuengbienh ba?” Goengda lwgnyez naeuz: “Mbouj lau, daengz seizhaenx daeg lwgnyez neix gou daeuj ciengx, hawj de youq ranz gou.” Liengz Bungzboz youh gienq naeuz: “Mwngz siengj aeu lansai vaihseng mbouj miz loek, hoeng mwngz hix miz ngoenz geq ba? Daengzcog lwgnyez majhung baenzvunz le, aeu baenzranz laebnieb, mwngz miz rengz bang de lwi? Caiq gangj, mwngz hix miz lan bonjfaenh, mwngz baujcwng vunzranz mwngz daengzcog mbouj vih boux lwgnyez neix cengnauh?” Vah gangj daengz neix, goengda lwgnyez mbouj rox gangj gijmaz lo. Doeklaeng mbiengj mehmbwk nyienh nyiengh gienzleih ciengx lwgnyez hawj mbiengj bouxsai.

“Yungh Vahcuengh guh gij hong swhsiengj, ndaej cigciep haeuj gizlaeg ndawsim bae. Ngoenznaengz guhhong gyoengqvunz gou ciepcuk daengz haenx dingzlai dwg vunzlai Boux- cuengh, ndigah gou cungj dwg yungh Vahcuengh caeuq bouxdangsaeh dox- gangj, ndaej yienghneix gangj, cungj doxgangj cigciep haeuj gizlaeg ndawsim bae neix hawj baenz aen baenz aen anqgienh gaijgez ndaej ndei bae.” Liengz Bungzboz yienghneix gangj.

Giethab fungsug sib- gvenq gaijgez anqgienh ngeiz- nanz

“Youq fazyen caengz lajdaej guhhong, gij ndaw hong aeu gaijgez haenx dingzlai dwg gij ngaekngeu cengnauh bingzciengz, hoeng mbangj seiz hix bungzdaengz gij anqgienh ngeiznanz gig nanz guh.” Liengz Bungzboz naeuz, “Bungzdaengz anq- gienh ngeiznanz, couh aeu roxyiuj diemjhot cengnauh youq gizlawz, dangguh gizdieg vunz Bouxcuengh comzyouq lai, lij aeu roxyiuj gij fungsug sibgvenq dangdieg, yiengh- neix cijndaej engq ndei diuzgaij cengnauh. ”

Bi 2019 ndwen 3, Cingsih Si Anhningz Yangh dieg henzguek Cungguek Yeznanz neix miz aen anq- gienh gvendaengz yakdoeg ciemqfamh gienzleih ndeu. Bouxgauq aen anq- gienh neix haem gij ndok cojcoeng youq dingjbya goengqbya baihlaeng aenmbanj bonjfaenh, ngamq haem roengzbae mbouj geijlai nanz, ngaiz bouxdenggauq Luz moux daengj vunz vat aenmoh bae. Bouxgauq nyinhnaeuz gij hingzveiz Luz moux daengj geij vunz deng gauq neix mboujdan dwg hangz ndok cojcoeng, doengzseiz hix hawj bouxgauq cingsaenz deng sienghaih youqgaenj, vihneix boux- gauq singq Cau daengj 16 vunz gauq daengz Cingsih Si Yinzminz Fazyen.

Aenvih aen anqgienh neix youq dieg henzguek Cungguek Yeznanz fatseng, bouxdangsaeh song mbiengj mauzdun haenqrem, ciep daengz anqgienh le, vihliux engq haeujlaeg、engq cienzmienh bae roxyiuj anqcingz, cietsaed gaijgez cengnauh, Liengz Bungzboz daegdaengq caenndang bae dieg fatseng anqgienh bae diucaz. Youq ndaw gocwngz byaijcunz diucaz, Liengz Bungzboz roxyiuj daengz giz cungsim song mbiengj cengnauh, cungj aenvih caeuq fungsug dangdieg mizgven, baenzlawz guh? Liengz Bungzboz siengj daengz, itdingh aeu daj aeueiq fungsug sibgvenq dangdieg roengz fwngz, cijndaej doiq boux- dangsaeh song mbiengj guh dazyinx mizyauq. Yienghneix, de yungh Vahcuengh giethab fungsug sibgvenq dangdieg miz cingz miz leix gejcek gij yienzaen cauxbaenz song mbiengj cengnauh, yungh fuengsik doengsug rox ngaih gangj gij cihsiz faplwd mizgven hawj bouxdangsaeh song mbiengj dingq, caemhcaiq lai baez gangj fungsug sibgvenq aeu aeueiq, hoeng itdingh aeu doenggvaq roenloh faplwd gaijgez cengnauh, gij saeh famhfap ciengeiz gaej guh. Boux- dangsaeh doiq de bae dieg fatseng anqgienh guh gij hong diucaz haeujlaeg saeqnaeh, daegbied dwg de giethab fungsug sibgvenq dangdieg guh diuzgaij, bak fug sim fug, cungj naeuz gyo’mbaiq de, caemhcaiq naeuz yaek doenggvaq roenloh faplwd gaij- gez cengnauh song mbiengj. Doek- laeng, aen anqgienh ngeiznanz youq dieg henzguek fatseng neix dauqdaej gaijgez ndaej lo.

Liengz Bungzboz dang boux- saemjbuenq guhhong saemjbuenq 16 bi doxdaeuj, cozfungh yiemzhaenq、fwngzseuq swhfaz, gij anqgienh de banh haenx mbouj miz anqloek, hix mbouj miz gij yienhsiengq boux- dangsaeh goenjgeuj dajgauq. Ciuq gyoepsuenq, dan youq bi 2018, de couh saemjleix le 64 aen anqgienh minzsaeh, gij anqgienh de banh haenx mbouj miz saek aen gaij buenq roxnaeuz dauqcungz saemjleix, sou- ndaej le sevei yaugoj caeuq faplwd yaugoj ndei.