Mbanjcuengh miz hawfwen,

Ndwenndwen hoenghhwdhwd,

Mbauq sau cingz naekgywg,

Angqfwgfwg doxcomz.

Baihneix sing fwen hwnj,

Baihde swnj roengzbae,

Va gizgyawj rox maez,

Faex gizgyae rox doengh.

Doenghbaez daj gwnz densi ndaej raen daengz gyoengq vunzlai youq ndaw doengh doq guhhong doq eufwen, sing fwen rwenzrwz ndei- dingq, cienz haeuj bya haeuj rungh, bouxboux sim’angq dangqmaz. Gou couh gag naemj, rox guh fwen caen ndei ha, guhhong lumj guh’angq, mbouj rox mbwq mbouj rox baeg, yienghneix couh youq ndaw hoz laeglemx miz aen siengjfap yaek bae cetcet hawfwen, caenndang bae guh- angq baez ndeu. Ndwensam ngoenz singgeiz roek ndeu, gou riengz boux yaucangj aen hagdangz Hawnazheuj Siz Gozyen bae cunz boux naihlaux gyaez guh fwen ndeu, ndaej naj doiq naj dingq canghfwen lajmbanj eu gij fwen yienzsaek yienzfeih.

Dou daeuj daengz Mbanjnazbaiz, daj bakmbanj byaij haeujbae, diuz roen sohsup haeuj daengz benq dieg loq gvangq laj goreiz geq gyang mbanj, gij ranzlaeuz ndaw mbanj aen’aen moqsak daengjcup, baizledled cingj- cingj caezcaez, gwnz roen seuqcengh, mbouj raen saek naed nyapnyaj. Siz Gozyen yaucangj naeuz gou nyi, aen mbanj neix miz mbangj vunz lij gig gyaez guh fwen diuqfoux, daegbied dwg doengh boux mehmbwk, gag comz baenz doihguhfwen doihdiuqfoux, baez bungz ngoenzciet roxnaeuz ngoenz miz saeh angq, gyoengqde couh gag doxiu doxiek okdaeuj biujyienj, gij vwnzyi cezmuz gengangh maenhndei. Caenh- guenj aen mbanj iq lai bouxcoz cungj ciengzgeiz youq rog guhhong laeuq ngaenz ciengx ranz, miz saekseiz bouxyawj beij bouxbiujyienj lij noix, hoeng gyoengqde lij dwg angq- mbupmbup biujyienj. Cix hojsik ngoenzneix mbouj dwg ngoenz miz “saeh angq”, dou mbouj ndaej raen gyoengq canghfwen angq guh fwen, cij ndaej raen song boux mehsimj naengh youq gij daengqrin laj goreiz geq aeu va’em daeuj san sauqbaet. Boux ndeu raen dou byaij daeuj, couh swnh bak guh hot fwen ndeu:“Va’em san sauqbaet, Baenz haet nyaengq mbouj dingz, Baet gyanghongh gyangding, Naekcingz coux hek daeuj.”

“O, fwenliuzloz!” Gou nyaenx mbouj ndaej angq hemq hwnjdaeuj. Seizneix boux mehsimj wnq dingz roengz gij hong san sauqbaet gwnz fwngz de, coh gou eu:“Dangqnaj lwg- mbauq neix, Nyinh ndaej fwenliuzloz, Raeuz daeuj doiq coenz go, Lwgcoz naeuz yawz yiengh.”

Gou fwt bak ngoemx mbouj rox baenzlawz dap, nyaenq ndaej naj hoengzfifi. Gangj vah lauxsaed, gou yienznaeuz dwg Bouxcuengh, hoeng daengz ban dou neix gaenq mbouj miz geijlai vunz rox guh fwen lo. Daengx le yaep he, gou cengqgengz aeu gij diuh ndongjndangndang dawz mbouj cinj daeuj hoiz song coenz gvaqbae:“Gou dungx cix mbouj caiz, Muengh sou lai son’gyauq, Dangqnaj canghfwen laux, Hauhlawz gamj oksing.”

Gizsaed, gij fwenliuzloz dou gizneix, couhdwg cungj Fwencuengh ndawde ndeu, Bouxcuengh ranghdieg dou daj ciuhlaux roengzdaeuj cungj gyaez eu fwenliuzloz. Vunzbiengz soqlaiz cungj haenh Bouxcuengh “ak guh fwen”, haenh Diegcuengh guh “fwen haij”. Bouxcuengh rox aeu fwen daeuj gangj swnghhoz、gangj gamjcingz. Fwen Bouxcuengh lizsij gyaenanz, daj ciuhnduj itcig eu daengz ciuhneix, ndaej guh daengz “aeu fwen gangjgoj” lo. Fwencuengh yo youq lajmbanj、lix youq lajmbanj, de caensaed、swhyienz, daiq miz gij heiqsik namhnaz nanoek sangjswtswt, daegbied dwg coenz vah dinjdet、yinhfeih bingzcaek gaemh ndaej gig ndei, heih ngon heih eu, geiq ndaej maenh, fuengbienh doxcienz, hawj ndaej gij fwen Biengzcuengh raeuz daezcaiz gvangqlangh, neiyungz fung- fouq, hingzsik lai yiengh, ndaej sengdoengh laegdaeuq bae fanjyingj gak aen fuengmienh sevei swnghhoz. Vunzlai aeu fwen daeuj ra baengz- youx、genj gvan genj yah、 doxdax guh’angq. Hoeng, gij minzcuz vwnzva maenhndei miz daegsaek neix, youq ndaw seizdaih moq cix menhmenh mbouj miz geijlai bouxcoz rox lo. Danghnaeuz raeuz seizneix mbouj roengzrengz bae baujhoh、swnjcienz, caj daengz feiz ndaep daeuh gyoet le cij singj gvaqdaeuj, couh guh mbouj gib lo. Danghnaeuz caen baenzneix, raeuz baenzlawz miz naj bae raen gij cojcoeng raeuz ha, cojcoeng raeuz caux ndaej ok gij vwnzva maenhndei baenzneix, raeuz cix mbouj ndaej swnjcienz roengzbae!

Song boux mehsimj rox dou dwg daeuj yaek baiqsae hag guh fwen, couh simndei daiq dou bae ra naih canghfwen laux ndaw mbanj ceiq caizhangz. Baez yamq haeuj bak- gvaengh ranz naih canghfwen laux bae, cij raen naihgeq ndeu naengh bakcauq coih feiz naengj haeuxnaengj. Naihgeq raen song boux mehsimj daiq dou haeuj ranz daeuj, haengjheiq guh fwen riuhaha:

“Bineix rumznamz daeuj ndaej caeux,

Ndoindoi lueglueg va hoengzaeuj,

Lauxlaux oiqoiq maij guh fwen,

Ciengq ndaej fukheiq cimh hek daeuj.

Haeuxnaengj homfwd youh miz laeuj,

Gyolaih beixnuengx doxcomz daeuj,

Bouxboux caez ciengq fwen- liuzloz,

Ciengq ndaej ndwensam mbwn lai raeuj.”

Dou gangjmingz naeuz dwg daeuj baiqsae hag guh fwen le, naihgeq couh son dou baenzlawz guh fwen, baenzlawz eu fwenliuzloz. Doeklaeng de lij dawz ok geij hot fwen moq de ngamq guhbaenz daeuj guh yiengh son dou:

“Ciuhneix (liu w lo) mbanj raeuz saedceij ndei saedceij ndei (lo),

(Liu w lo) Seiqseiz miz gwn (ha lo) youh miz daenj (lo),

Bouxboux (liu w lo) doxcanj guh fwen haenh (beixnuengx ha beix- nuengx lo),

Swnghhoz ndaej hwnj (ha lo) mbaeklae sang (ha) mbaeklae sang (lo).

Gyolaih (liu w lo) aendangj caeuq cwngfuj (lo),

(Liu w lo) Bang gungz bang hoj (ha lo) guh ndaej daengz (lo),

Gwnzgwnz (liu w lo) lajlaj caemh diuz saem(sim) (beixnuengx ha beixnuengx lo),

Guh daengz duet gungz (ha lo) youh baenz fouq (ha) youh baenz fouq (lo).

Aen biengz (liu w lo) Mbanj- cuengh saedcaih ndei (lo),

(Liu w lo) Minzcuz doxhuz (ha lo) caez caemhyouq (lo),

Lwgminz (liu w lo) gwn imq ndaej daenj raeuj (beixnuengx ha beix- nuengx lo),

Caez byaij lohfouq (ha lo) caez vuenyungz (ha) caez vuenyungz (lo).

Conzdungj (liu w lo) meijdwz bouxboux gangj (lo),

(Liu w lo) Dangq ndaek huqbauj (ha lo) coq gyangsim (lo),

Son lwg (liu w lo) roxsoq dij baenz gim (beixnuengx ha beixnuengx lo),

Song din byaij soh (ha lo) baihnaj gvangq (ha) baihnaj gvangq (lo).”

Dou nyinhcaen guh bitgeiq caemhcaiq loegyaem. Siz Gozyen yaucangj naeuz yaek hag ndei gij fwen neix le, dauqma daengz hagdangz hai dangz goq son fwen, hawj gij lwgnyez daihlaeng Bouxcuengh hix ndaej yiengjsouh fwen ndei gyumqluemz, hawj gyoengqde caemh ndaej hag rox guh fwen, daihdaih swnjcienz roengzbae! Lij ceng’aeu doenggvaq meizdij moq cienzboq hawj daengx seiqgyaiq, hawj vunzlai gwnzbiengz cungj ndaej rox gij vwnzva maenhndei Bouxcuengh raeuz!

Mwh biek bae, naihgeq cingz naekgywggywg rag fwngz Siz yaucangj, eu fwen aem bae raemh daeuj daengq naeuz:

“Sou ban coz uk gvai,

Aeu lailai hagsib,

Neix hingzseiq gaenjgip,

Dangq ronghrib haeuj cou.

Bouxcuengh dungxcaiz ak,

Bai bak ndaej baenz fwen,

Vwnzva ndei ngoenzlwenz,

Aeu cienz haeuj ciuhhmoq.”