Vih caenh’itbouh liz gyawj boux- dangsaeh dieg minzcuz, hawj boux- dangsaeh lai saenq fazgvanh, engq mizleih gaijgez ngaekngeu cengnauh, coicaenh minzcuz doxgiet, geij bi neix daeuj, Liujcwngz Yen Yinzminz Fazyen nyinhcaen damqra aen vunqsik moq song vah dajgauq diuzgaij miz daegsaek, aeundaej cingzcik yienhda.

It dwg cujciz fazgvanh caeuqfaenh daengx gih fazgvanh Cuengh Gun song vah gauj yungh Vahcuengh naengzlig, daezsang gij naengzlig dingq gangj Vah- cuengh fazgvanh, ndaej cinjdeng yungh Vahcuengh dangdieg fanhoiz、gangjgej faplwd diuzvwnz、coenz hangzvah. Seizneix gaenq miz 8 boux fazgvanh doenggvaq gaujsi.

Ngeih dwg daezhawj Cuengh Gun song vah diuzgaij、saemjbuenq、hengzguh、laeb aen fazdingz cunzdauq daengj fugsaeh, youq diuzgaij caeuq hingzsaeh、minzsaeh、hingzcwng、hengz- guh daengj gak yezvu bouhmonz cungj boiq fazgvanh song vah, cietsaed fatok gij cozyung youqgaenj swhfaz yauqlwd sang leih lwgminz. Geij bi neix daeuj Liujcwngz Yen Yinzminz Fazyen bi bingzyaenz saemjgiet anqgienh daih’iek 4800 aen, ndawde bi bingzyaenz saemj- giet anqgienh Cuengh Gun song vah 220 aen, cietsaed daezhawj fugsaeh mizyauq hawj vunzlai dieg Bouxcuengh.

Sam dwg dajcauh aen vunqsik moq fazdingz dajgauq miz daegsaek. Liuj- cwngz Yen dwg aen dieg lai aen minzcuz ndeu, gak yanghcin vahdeihfueng、fungsug sibgvenq gig mbouj doengz, vih guh ndei hong saemj hengz, yen yinzminz fazyen ciuq gij daegdiemj mbouj doengz vunz faenbouh caeuq minzcuz doxcomz, hableix diuzboiq bouxvunz banh’anq, dajcauh gij vunqsik moq doiqciep dajgauq “it aen fazdingz it daegsaek”. Fazgvanh bae mbanj, miz ngaekngeu couh sikhaek gaijgez, mbouj miz ngaekngeu couh gaenxmaenx cienzdoh faplwd hawj vunzlai, dingzlai ngaekngeu cengnauh youq dangdieg couh ndaej gaijgez, gibseiz aeu buek anqgienh ndeu youq mwh ngamq fatseng couh gaijgez ndei, rengzrwd henhoh minzcuz doxgiet.

(Veiz Gyaujsiengh)