Dwklongj, hix heuhguh cuk- longj、dajlongj. Fouxdwklongj dwg cungj foux ndawbiengz cojcienz ndeu, hix dwg cungj foux Boux- cuengh ceiq gaeuqgeq ndeu, daengz seizneix gaenq miz 1400 bi lizsij. Fouxdwklongj Bouxcuengh cienzlah youq ranghdieg baih- saenamz Guengjsae, lumj Denh- dwngj、Bingzgoj、Denzyangz、Bwzswz、Dasinh daengj dieg, daegbied youq Denhdwngj Yen cienz ndaej ceiq hoengh ceiq ndei. Denhdwngj gij fouxdwklongj Bouxcuengh cienzlah youq rangh- dieg Sangyingj Yangh、Denhdwngj Cin、 Lungzmingz Cin、Yangh- duh Cin、Fuzsinh Yangh daengj doenghgij yanghcin neix.

Gij doenghyiengh aeu daeuj diuq fouxdwklongj haenx dwg aenlongj caeuq faexcuk. Aenlongj dwg cungj doxgaiq gaeuqgeq aeu faex guh haenx, aeu daeuj duetnaed、cuk haeux、cuk ceiz. Faexcuk couhdwg gaiq hongdawz aeu daeuj dwklongj, raez mij ndeu baedauq.

Fouxdwklongj Bouxcuengh youq duenh hainduj haenx dwg youq seizhoengq diuq, daengz- laeng menhmenh hwngfat baenz youq seiz gvaqciet lumj gvaq- cieng caeuq guhlaeuj couxbawx haqlwg、banh saeh hai ranzcai daengj hix diuq. Youq duenh hainduj youq ndaw naz gyaeuj reih diuq, daengzlaeng hwngfat baenz youq henz mbanj henz ranz caeuq naj miuh diuq. Vunz Bouxcuengh dangdieg gyaezmaij fouxdwklongj Bouxcuengh haujlai nanz lo.

Fouxdwklongj Bouxcuengh ningdoengh rengzhaenq, sing hung sing gok, yiengh roq haujlai. Bouxfoux miz 4 daengz 12 boux; diuqfoux seizhaenx bouxfoux song fwngz gaem faexcuk, aeu faexcuk roq ndaw longj、daej longj caeuq henz longj, gij fap dwk miz“rag dwk”“cung dwk”“diemj dwk”“yaep dwk”caeuq“doiq dwk”daengj, bouxyawj ndaej ciuq gij hwnjroengz singcuk daeuj diuq- foux caeuq ciengq go.

Bi 2010, fouxdwklongj Boux- cuengh ginggvaq Gvangjsih Boux- cuengh Swcigih Yinzminz Cwngfuj doengzeiq, ndaej lied haeuj daih- sam buek swcigih gaep feihvuzciz vwnzva yizcanj mingzloeg.

Seizneix, aenvih fouxdwk- longj Bouxcuengh miz gij daeg- diemj minzcuz gagdog noengzna dangqmaz, yied daeuj yied lai vunz gyaezmaij cungj foux neix, neix mboujdan youq ndaw gih raeuz yingjyangj gvangqlangh, youq ranghdieg Dunghnanzya hix yingj- yangj haemq gvangq.