Gijndei fazgvanh minzcuz vunz- noix yungh vah minzcuz bonjfaenh siu ngaekngeu cengnauh bae, couhdwg aen minzcuz doxdoengz miz gij gamjcingz nyinhdoengz vwnzva caeuq doxsaenq, neix mboujdan hawj gij hong diuzgaij aeundaej yaugoj ndei raeuh, engq coihawj minzcuz caeuq minzcuz doxgiet huzndei baenaj.

Suh Gezvwnz, boux fazgvanh Bouxcuengh Gvangjsih Namzningz Si Vujmingz Gih neix, dangguh gij fazgvanh Cuengh Gun song cungj vah Gvangjsih Bouxcuengh Swcigih Gaugaep Fazyen、 Swcigih Minz- cunghveij buek daih’it bingzdingh ndawde boux ndeu, de vih dieg minz- cuz doxgiet huzndei、ginghci hwngfat daezhawj swhfaz baujcang rengzrwd.

Song cungj vah gej cien- fanh aen hot diuzgaij vaiq raeuh coi huzndei baenaj

“Huzndei doxhab” “mbouj miz dajgauq” dwg conzdungj vwnzva Cunghvaz Minzcuz daj ciuhgeq daengz ciuhneix. Youq aen seizdaih ginghci riengjvaiq hwngfat, gij singqcaet faplwd nywnghlaeng gietdingh de youq mwh cawqleix gij cengnauh minzsaeh mbouj dwg yienghyiengh cungj ak, cungj cingzgvang neix, gij cidu diuz- gaij engq miz singqcaet soengdoengh、engq lingzvued couh miz hoenggan hwngfat engq gvangqlangh lo. Namz- ningz Si Vujmingz Gih gungh miz 71 fanh vunz, ndawde vunz Bouxcuengh ciemq 86% doxhwnj. Youq dieg minz- cuz vunznoix comzyouq yienghneix, yungh vah minzcuz diuzgaij cengnauh caeuq saemjleix anqgienh, ndaej miz yaugoj hungloet.

Suh Gezvwnz lwnh gicej, daj bi 1995 ndwen 8 camgya guhhong, 24 bi doxdaeuj de cungj youq aen gangjvei saemjbuenq caengz lajdaej, yungh vahcoj bonjfaenh vih gij vunzlai minzcuz vunznoix gejdap gij ngeizvaeg faplwd、dazyinx dajgauq、diuzgaij anqgienh、haidingz saemjbuenq dwg gij cangdai cingqciengz ndaw hong bonjfaenh, yienznaeuz song bi neix cij haenqrengz guh gij hong yungh song cungj vah saemjbuenq, hoeng youq dieg minzcuz, neix dwg ngoenznaengz cungj yungh, caengz daengx roengz- daeuj gvaq.

Youq ndaw aen anqgienh baenz- roix cengnauh habdoengz bauguh reihnaz lajmbanj ndeu, 5 boux boux- dajgauq yiengq Vujmingz Gih Yinz- minz Fazyen daezok cingjgouz daj- gauq: Buenqgiet gejcawz《Aen Hab- doengz Cook Coyungh Reihnaz》boux- dajgauq caeuq bouxdenggauq ciem- dingh, youz bouxdenggauq hoizdauq gij yienghgaeuq reihnaz, boiz gij cienz aenvih reihnaz vut ndwi deng sonjsaet haenx hawj bouxdajgauq……5 boux bouxdajgauq cungj dwg vunzguhnaz Bouxcuengh bi’ndwen loq hung, dan rox gangj Vahcuengh, youh mbouj miz lizswh bangguenj dajgauq, hoeng bouxdenggauq youh dan rox gangj Vahbujdungh; song mbiengj doxgangj gig hoj yauqlwd youh daemq, youq mwh guh fazdingz saemjleix song mbiengj gangjvah cungj gig haenq, ngaekngeu haemq hung. Ginggvaq Suh Gezvwnz boux fazgvanh cawjsaemj neix lai baez yungh Cuengh Gun song cungj vah gaeudoeng, caemhcaiq yungh dauhleix gangj doeng、yungh cingz hawj gyoengqde gamjdoengh bae faencek leixswnh gij gvanhaeh caeuq faplwd doxgven, doeklaeng baenzroix 5 aen anqgienh cungj gonqlaeng ndaej diuzgaij gietanq caemhcaiq swnhleih hengzguh.

Suh Gezvwnz banh’anq daengz seizneix, moix bi bingzyaenz miz cib lai aen anqgienh、gyoebsuenq daengz seizneix daihgaiq miz baenz bak aen anqgienh aeu cienzbouh roxnaeuz dingz ndeu yungh Vahcuengh hai- dingz. Daegbied dwg youq mwh fazdingz saemjleix gij cengnauh habdoengz bauguh reihnaz、bauguh roxnaeuz cienjnyiengh gij gienzleih guenjguh ndoengbya caeuq gaicawx doxgaiq reihnaz lajmbanj doenghgij anqgienh vunz loq lai ndaw segih minzcuz neix yungh Vahcuengh saemjleix、gaeudoeng, guh minzsaeh siengsaeh diuzgaij, doiq hoizsoeng gij simcingz song mbiengj dangsaeh doxdingj gig mizyauq, sevei yaugoj ndei raeuh.

Yungh song cungj vah banh’anq baujcwng caetliengh daezsang yauqlwd roengz- rengz coihawj gaijndei vanz- ging guh seng’eiq

Ciengzseiz caeuq beixnuengx Bouxcuengh dox baedauq、sugrox gij sibgvenq gyoengq beixnuengx mbanj- ranz gvaq ndwenngoenz, Suh Gezvwnz cungj ndaej ciuq gij cengnauh caeuq gyoengq vunz mbouj dox- doengz, yawj anqgienh yungh banhfap, yungh song cungj vah banh’anq, guhbaenz aen muzbyauh riengjvaiq、yauqlwd sang siubae cengnauh, banh’anq baujcwng caetliengh daez- sang yauqlwd.

Youq aen anqgienh cengnauh habdoengz cook coyungh reihnaz ndeu, bouxgauq aen cunhminz siujcuj daihngeih Namzningz Si Vujmingz Gih Cwngzsiengh Cin Mbanjhozgiz yiengq Vujmingz Gih Yinzminz Faz- yen daezok cingjgouz dajgauq: Ciuq- fap nyinhdingh《Mbawsaw Hezyi》gyoengqde caeuq bouxdenggauq Namzningz Dangzyez Gujfwn Youjhan Gunghswh Yanghsanh Dangzcangj ciemdingh mbouj mizyauq, buenq hawj bouxdenggauq boiz 27.15 moux daemz rom raemx ndaw bya hawj bouxgauq dauq, caemhcaiq hoizdauq yienghgaeuq daemz rom raemx ndaw bya, buenq bouxdenggauq ok gij cienz coyungh daemz rom raemx ndaw bya hawj bouxgauq……Aenvih aen anqgienh cook coyungh ciemdingh《Mbawsaw Hezyi》nangqdaengz reih- naz seizgan loq nanz lo, youq mwh guh fazdingz saemjleix song mbiengj doiq saedsaeh anqgienh gangjfap cungj mbouj doxdoengz, nyinhdingh saedsaeh anqgienh bienqbaenz gij cungsim song mbiengj doxceng. Vih caz cingcuj saedsaeh anqgienh, Suh Gezvwnz dangguh boux fazgvanh cawjsaemj daiqlingx gij vunz ndaw aendoih, caeuq song mbiengj dang- saeh doxcaez, gibseiz bae yienhciengz cazyawj, caz cingcuj le caeuq song mbiengj cigciep youq yienhciengz yungh song cungj vah doxyaeng、hezdiuz. Doeklaeng ginggvaq cungfaen doxyaeng, song mbiengj yaeng baenz aen hezyi diuzgaij bouxdenggauq boiz daemz rom raemx ndaw bya caemh- caiq boiz gij cienz hoizdauq yiengh- gaeuq hawj bouxgauq. Anqgienh diuz- gaij gietanq, baujcang le gij gienzik habfap song mbiengj, henhoh le gij gvanhaeh gunghcangj giyez caeuq vunzmbanj huzndei、onjdingh, coihawj gaijndei vanzging ndawbiengz guh seng’eiq.

Daj dang boux saemjbuenq doxdaeuj, Suh Gezvwnz daengz seiz- neix gungh banhleix le 1000 lai aen anqgienh gvendaengz guh seng’eiq, caeuqfaenh banhleix 14 aen anqgienh buqcanj, cawjbanh ndawde 5 aen. Youq ndaw gij hong saemjleix anq- gienh giyez buqcanj ciuqfap hawj haujlai swhcanj guekmiz yungh ndei bae, rengzrwd coihawj giyez deihfueng gaijbienq cidu, vih Vujmingz Gih ginghci hwngfat daezhawj le souj- duenh caeuq roenloh mizyauq. De haujlai bi cungj ndaej bingz baenz gungcanjdangjyenz maenhndei caeuq bouxvunz senhcin.

Namzningz cunghyen: Cienzmienh doihai hong bingz- dingh fazgvanh song cungj vah

Fapguek guek raeuz daih 134 diuz gvidingh: Gak cuz gunghminz cungj miz gienzleih yungh vah minzcuz bonjfaenh dajgauq. aen fap hingzsaeh dajgauq、aen fap minzsaeh dajgauq、aen fap hingzcwng dajgauq goj miz gij gvidingh doxwngq. Geij bi neix daeuj, youq dieg minzcuz vunz- noix comzyouq, daegbied dwg dieg minzcuz vunznoix bien’gyae, gij anq- gienh nangqdaengz minzcuz vunz- noix bi lai gvaq bi, gungganq engq lai fazgvanh sugrox vah minzcuz dangdieg bienqbaenz hengzguh swhfaz gig gaenj aeuyungh.

Namzningz Si dwg aen hawsingz soujfuj aeu Bouxcuengh guh cawjdaej, lai minzcuz comzyouq ndeu. Bi 2004, Namzningz Si gungh miz 648.85 fanh vunz, ndawde vunz minzcuz vunznoix 373.31 fanh vunz, ciemq vunz daengx si 57.53%. Youq ndaw vunz minzcuz vunznoix, vunz Bouxcuengh 362.36 vunz, ciemq vunz daengx si 55.85%. Vunz minzcuz vunznoix haemq lai, youq 5 aen hawsingz soujfuj dieg minzcuz vunznoix gagguenj daengx guek baiz youq daih’it. Aen fazyen neix gig yawjnaek gij hong hwnjguh aendoih fazgvanh Cuengh Gun song cungj vah, bi 2018 aen fazyen neix aeu Vujmingz Gih dangguh sawq- diemj, youq Vujmingz Gih Yinzminz Fazyen bingz senj ok 3 boux fazgvanh Cuengh Gun song vah, damqra yungh song cungj vah siu cengnauh bae、coihawj daezsang yauqlwd diuzgaij, cingzyauq yienhda. Gij hengzguh Vujmingz Gih Yinzminz Fazyen gungganq vunzcaiz Cuengh Gun song cungj vah caemhcaiq yungh daeuj saemjbuenq, vih Namzningz Si cienz- mienh doihai gij hong bingzdingh fazgvanh Cuengh Gun song cungj vah cwkrom le gingniemh、dwkroengz le giekdaej. Aen fazyen neix youq gwnz giekdaej nyinhcaen cungjgez gij ging- niemh hong sawqdiemj, bineix youq daengx si doihai doigvangq hong bingzdingh fazgvanh song cungj vah, caenh’itbouh hawj aendoih fazgvanh Cuengh Gun song cungj vah aen si neix gyahung, vih henhoh gij gienzik habfap vunzlai minzcuz vunznoix、doinyoengx dieg minzcuz onjdingh hwngfat、coihawj minzcuz doxgiet huzndei dwkroengz giekdaej vunzcaiz maenhsaed.