Rungh, youh iq youh laeg, caeuq mbanj doih doxliz gyae, miz maz saeh aeu byaij buenq ngoenz roen cij ra ndaej vunz.

Rungh, reih noix rin lai, ndaem roengz doenghgo couh muengh mbwn caj raemx, ndaej mbouj ndaej sou, mbwn gangj cij baenz, vunz miz rengz hix mbouj miz banhfap.

Aen rungh neix mbouj doeng roen mbouj doeng dienh, mbwn laep diemj daengyouz, haeujok aeu byaij loh, vunz ndaw mbanj daihdaih damz sinhoj, damz dwgrengz, daihdaih mbouj miz banhfap gaijbienq, ranzcoj ranzcoeng couh youq gizneix, rox mbin hix mbin mbouj okbae.

Ndaw rungh neix cij miz 5 aen ranz, 20 lai boux vunz. 5 aen ranz aen rangh aen caemh hangz he hwnj youq laj dinbya, ranz lawz gaeq haen ranz lawz mou heuh, cungj lumj caemh aen ranz he nei, faen mbouj ok duh duz ranz lawz heuh.

Bihaenx cib nyied, mbwn rengx- diudiu, gwnz bya go gut reuq, go haz sauj. Haemh ndeu byonghhwnz, feiz remj ranz gyang, leizfeiz gienjhumhum cung hwnj mbwn bae, ndaw rungh ronghsagsag, vunzmbanj buet daengz daej rungh, soh ndwn yawj feiz, caih feiz baenzlawz remj couh baenz de remj, mbouj miz saekdi banhfap. Feiz hung lai, yaep ndeu couh remj hwnj bya bae, ndaw rungh seiqlengq hoengzfwgfwg, oenq feiz gienjfoenfoen, heiq ndat oem ndaej vunz yaek daimbaet bae.

Miz vah naeuz “boux caeg dwk lij lw aen rum aen longj”, feiz baez haenq couh mbouj lw maz lo, buenq hwnz ndwi, 5 aen ranz, geijcib duz doenghduz, geij goengq bya cungj remj baenz daeuh caez.

Aen biengz raeuz miz gij ndei neix, boux he miz nanh, dauqcawq daeuj bang. Ngoenzlaeng, gyoengq bouxdaeuz daeuj lo, gyoengqde hawj vunzmbanj soengq raemx soengq byaek youh soengq haeux. Vunz mbanj gyae mbanj gyawj hix daeuj lo, gyoengqde hawj vunzmbanj soengq buh soengq vaq youh soengq denz.

Seizneix ceiq youqgaenj dwg aeu guh ranz hawj vunz youq, baihgwnz gietdingh dawz 5 ranz vunz neix buen daengz laj daej rungh bae. Youq aen dieg yienghneix yaek hwnj aen ranz ndeu, gangj vei guh mbouj vei, gij doxgaiq guh ranz cungj aeu mbaq rap, geijlai nanz cij guh ndaej baenz ranz, vunzlai gietdingh aeu faex aeu haz daeuj dap diengz hawj vunz youq gonq.

Haicin, fwn moenqfoedfoed, geij ngoenz mbouj raen naj daengngoenz, ndaw rungh dauqcawq mbaeqmbat- mbat. Byonghhwnz, vunzmbanj ninz caem le, dingqnyi sing yiengj humlum lumlum lumj mbwn doemq nei, vunzmbanj lij caengz ndiu gvaqdaeuj, geij ndaek rin hung gaenq mboek deng sam aen ranz diengz, ndaw rungh youh laep youh fwn, vunzmbanj boux mbouj ndaej gouq boux, cij ndei hai sing doxcam lij ndei mbouj ndei.

“Goengdau, Goengdau.” Heuh Goengdau daengz seiz mbouj nyi de hoiz, vunzmbanj aeu dienhdoengz bae ra, Goengdau deng ndaek rin hung he nap, gaenq mbouj miz diemcaw lo, ranz de miz 4 boux vunz, bouxboux daej daengz gen ga yaek cougaen bae, rin daiq hung, hunghung iqiq cibgeij boux vunz bae gaex baenz donq haeux nanz cij gaex ndaej bae.

Ran rongh le, vunzmbanj soengq Goengdau bae moek le, bouxboux muengh dauq laeng yawj gij ranz deng rin dwk vaih haenx, bouxboux daej ndaej da gawh naj foeg.

Rin dwg daj gwnz dingj bya lak roengzdaeuj, geijcib ndaek rin hung lumj duz vaiz nei, ringx daengz gyang rungh, gwnz bya haucancan, ndaw rungh hoenzfoenfoen, fwi rin fwi namh hawj vunz yaek mbaetcaw bae.

Baihgwnz miz vunz daeuj lo, gyoengqde hawj vunzmbanj soengq raemx soengq byaek youh soengq haeux. Vunz mbanj gyae mbanj gyawj hix daeuj lo, gyoengqde hawj vunz mbanj soengq buh soengq vaq youh soengq denz.

Bi’gvaq feiz remj, bineix rin dub, laebdaeb ok saeh, aen dieg neix baenzlawz youq lwi? Gyoengq boux- daeuz baihgwnz naemj gienh saeh neix, youh naemj mbouj daengz aeu dawz 5 ranz vunz neix buen daengz gyawz bae.

Ndaw mbanj miz daeg coz ndeu heuhguh Daeglij, de dwg ndaw mbanj boux vunz raen gij saeh baihrog ceiq lai ndeu, de daengz yienhsingz bae youz gvaq, daengz Guengjdoeng bae guhhong gvaq. Gij dieg de raen neix ranz moq laeuz sang, loh bingz roen seuq, de gig muengh miz ngoenz ndeu swhgeij hix ndaej youq gij dieg yienghneix miz gan ranz ndeu, siengj dwg yienghneix siengj, seizneix ndaw ranz mbouj miz saek faen ngaenz, cij ndei guh fangzhwnz lo.

5 ranz vunz neix, mbouj miz mou mbouj miz gaeq, hix mbouj miz maz souhaeuj, cungj baengh baihgwnz soengq haeux soengq ngaenz daeuj gvaq saedceij.

Hong bang hoj fuz gungz guh daengz ndaw rungh, 5 ranz neix cungj dwg ranz gungzhoj, ranzranz miz boux he daj baihrog daeuj bang gyoengqde baenzlawz bae duet gungz.

Geij boux vunz daj baihrog daeuj haenx, mbat nduj daeuj daengz ndaw rungh, raen aen rungh youh iq youh laeg neix, caen naemj mbouj daengz laj mbwn lij miz vunz youq gij dieg yienghneix gvaq saedceij, gyoengqde bouxboux doeksaet, bouxboux danq- heiq.

Gwnz bya mbouj hwnj faex,

Laj deih mbouj hwnj faiq,

Dieg neix yaek duet gungz,

Lau rinbya baenz gai.

Geij boux vunz daj baihrog daeuj haenx, mbouj rox baenzlawz guh. Gyoengqde heuh vunzmbanj daeuj doxcomz, daengx mbanj miz 23 boux, 7 boux vunz geq, 4 boux lwgnyez, moix ranz cij miz song boux doxhwnj lij mizrengz guhhong, youq ndaw rungh neix dajndaem dajciengx baenzlawz hix mbouj ndaej dem souhaeuj. Ngeix bae ngeix dauq, 5 ranz vunz neix aeu buen okbae cij ndaej, buen okbae le, daiq gij vunz lij mizrengz guhhong bae ra hong guh.

Daeglij boux daih’it gingz fwngz doengzeiq, de naeuz:“Mbouj okrog bae, couh mbouj rox aen mbwn miz geijlai gvangq, gwnz dieg miz geijlai langh. Mbouj okrog bae, couh mbouj rox bouxwnq baenzlawz gvaq saed- ceij.”

Vunzmbanj cuengq mbouj roengz geij go haeuxyangz, cuengq mbouj roengz gij cingzngeih cojcoeng youq neix gwndaenj geijcib daih, gyoengqde cungj mbouj gamj okbae guhhong, engq mbouj gamj buen ranz.

Baihgwnz guh laeuz moq, heuh gyoengq vunz gungzhoj mbouj miz ranz youq haenx caeuq gij vunz youq aen dieg mbouj hab youq haenx buen okdaeuj youq, mbanjrungh 5 ranz vunz cungj hab buen okbae.

Ndaej aen siusik neix, vunz mbanjrungh youh doeksaet youh sim- angq, youh miz di mbouj onj. Gyoengqde naemj, caen buen okbae dahraix, guh maz gwn? Bouxboux mbouj gamj roengz gietsim buen ranz.

Daeglij dwg boux daih’it bauq- mingz youq yienhsingz aeu ranz, ranz de 4 boux vunz, ciuq gvidingh ndaej aen ranz miz 100 bingzfueng ndeu.

Buen ranz ngoenzhaenx, gyoengq vunzmbanj cungj bang de buen doenghyiengh, gvihgvih siengsieng, daizdaiz daengqdaengq, nyaengq baenz buenq ngoenz cij dawz gij doxgaiq ngoenzyungh buen daengz rog bya.

Daeglij okbae lo, boux vunz caeuq de doxgiet bang gungz daiq de daengz yienhsingz aen gunghcangj he bae guhhong.

Daeglij youq aen siujgih neix miz 30 aen laeuz, it cien lai hoh vunz. Laeuz moqsaksak, loh bingzcwtcwt, ndaw siujgih faex loeg va nding, gizgiz ndeiyawj lumj fuk veh. Gyoengq vunz mbanjrungh daeuj daengz siuj gih, bouxboux yawj ndaej mbouj yaep da, gyoengqde ndawsim cungj naemj: Daj baezneix hwnj Daeglij couh youq neix an’gya la?

Daeuj daengz ndaw ranz Daeglij, vunzmbanj engq doeksaet, ndawranz ciengz hau benj mong seuqsagsag, geij hongq rug youh gvangq youh doeng rumz, ok haex ok nyouh cungj mbouj yungh okrog bae, daiz daengq moq, dienhdaeng rongh, densi yiengj, cawj haeux cawj byaek mbouj yungh feiz, mbouj miz oenq…… Gij doxgaiq neix, gij yienghsiengq neix, gyoengqde fangzhwnz lij caengz raen gvaq, ndawsim couh naemj: Daj baezneix hwnj, gijneix couhdwg ranz Daeglij la?

Daeglij raen vunzmbanj geizheih, couh naeuz:“Gijneix cungj dwg cwngfuj soengq hawj, sou dauqbae le, hix vaiqvaiq gietdingh buen ranz okdaeuj youq ba! Cij aeu sou nyienh okdaeuj, sou hix miz aen ranz yiengh- neix.”

Vunzmbanj youq mbouj roengz lo, gyoengqde baez ma daengz ndaw rungh, couh ra boux vunz daeuj bang fuz haenx doxyaeng gij saeh buen ranz.

Gyoengq vunz mbanjrungh buen ranz bae yienhsingz ngoenzhaenx, ranzranz gaj bit gaj gaeq, nauhyied lumj gvaq ciet nei, mizmbangj ndawsim sij mbouj ndaej aen mbanj youq le geijcib bi, caegcaeg uet raemxda.

Caiq raen, ndaw rungh. Baihrog miz loh gvangq caj gyoengqde byaij, miz ngoenz he gyoengqde ndaej bae yienhsingz youq laeuz moq, gyoengqde fangzhwnz hix caengz raen gvaq.