“Itdingh dwg deng de dojcienz saengq caez lo!” Gou daekeiq vauvau laihnaeuz bonjfaenh ra ok dapanq lo. Ciengzseiz ndaejnyi vunzhung gangj biuz lauxgawj、dojcienz caeuq ndoet laeuj aiq rox saengq bak fanh cienz ngaenz seuqsat, Aulungzgveiz itdingh hix dwg yienghneix.

“Mbouj dwg yienghde.”

“O?” Liuh mbouj daengz, daiq baenzneix haengjdingh gangj. “Baenzneix—— nanzdauh dwg de cit iennamh?”

“Hix mbouj dwg.”

Neix couh geizheih lo, gou yienznaeuz daengz gizneix mbouj miz geijlai nanz, hoeng baez daengz couh rox ndaw mbanj miz Aulungzgveiz boux vunz neix, caiqlix haujlai bi daeuj de itcig mbouj miz maz bienqvaq, hoeng coengzlaiz mbouj ndaejnyi gyoengq vunzhung dwen daengz de vihmaz baenzneix baihsaiq gvaq, seizneix haeujsim dingq gij vah daxdaiq, mingzyienj ndawde miz gij goj, hawj gou gig mizyinx. Gou sikhaek ndwn hwnjdaeuj, byaij daengz eijgvaengz baihlaeng daiq naengh, aeu gaemxgienz iq menhmenh dub song mbaq daxdaiq, guh’unj naeuz:

“Daiq, dauqdaej de vihmaz cij bienqbaenz yienghneix ne? Caezgya lij naeuz de dwg vunzrwix.”

“Mwngz nyez lai, gou gangj le mwngz mbouj rox.”

“Rox. Daiq, gou ndaejnyi le couh rox.”

“Yo! Mbaeu di, baenzneix roengz- rengz siengj dub gij ndok daiq sanq bae ha?”

“Ndei, ndei!” Gou muengz dub mbaeu lo:“Daiq mwngz couh gangj ba! Gou mbaeumbengq dub.”

Daiq danq gaemz heiq ndeu, baenq naj gvaqdaeuj doiq gou riuriu.

“Baenz lo, mwngz gaej dub lo, ngoenzneix mbwn’gvengq, gij mbaq daiq mbouj in le, mwngz naengh roengzdaeuj, gou gangj hawj mwngz nyi!”

Gou baez sim’angq, gaemxgienz haenqrengz dub le song baez, daiq yung mbaq, ndaw bak doq hemq hwnjdaeuj.

“Gou gangj aen goj ndeu hawj mwngz nyi gonq.”

“Ndei ha!”

Gou rag aen daengq daeuj, dep eijgvaengz naengh.

(caengz sat)