Seizneix doxgaiq miz lai cungj lai yiengh, gij gwn cuk, siengj gwn maz couh cawx ndaej maz daeuj gwn.

Daengz haemh caeuz, gwnz daiz baij miz geij aen byaek, daengx ranz vunz comz youq henz daiz caez gwn caeuz, neix dwg gienh saeh ceiq ciengz raen ndeu lo.

Vunz lai, byaek lai, habngamj gij sim’eiq gak boux, siengj gwn maz, miz maz gwn, caen dwg cungj yiengjsouh ha!

Byaek lai yienznaeuz ndei, hoeng, baez gwn caeuz sat, cungj miz gij byaek lw roengzdaeuj. Baenzlawz guh cij ndei ne?

Gyoengqlwg miz gij yawjfap gyoengqde, daxmeh miz gij siengjfap bonjfaenh.

Gyoengqlwg siengj, byaek lw mbouj caiq singjsien lo, cang roengz daehsuliu, dawz bae gveng couh ndaej lo.

Daxmeh siengj, byaek lw yienz- naeuz mbouj singjsien lo, hoeng cang daeh dawz bae gveng caen hojsik. Caiq gangj, mbouj dwg gveng bae byaek lw, caemhcaiq hix dwg gveng bae hanhlwed caeuq ngaenzcienz.

Daxmeh ciuh vunz gvaq gij saedceij gungzhoj gvenq lo. Hag baenz cungj sibgvenq mbaet gwn mbaet yungh, raen mbouj ndaej vunz daih- saengq gijgwn. Caih gyoengq daeglwg gangj rwix gangj yak, naeuz gwn byaek lw miz cien fanh cungj mbouj ndei, de hix dingq mbouj haeuj rwz saek coenz.

Couh yienghneix, moix donq gwn caeuz sat laeng, lw gij byaek roengzdaeuj, daxmeh couh caenh dawz byaek lw rom roengzdaeuj, cang youq ndaw bat, yo youq ndaw gvihvanj, caj daengz ngoenzlaeng gwn caeuz, caiq dawz gij byaek lw okdaeuj, raeuj ndei aeu daeuj soengq ngaiz gwn.

Vihneix, gyoengqlwg caeuq dax- meh hix mbouj noix doxceng.

Gyoengqlwg naeuz daxmeh mbaetged, daxmeh naeuz gyoengqlwg daihsaengq. Ngoenz bae ngoenz dauq, gyoengqlwg gangj mbouj ndaej fug daxmeh, daxmeh hix gangj mbouj ndaej fug gyoengqlwg.

Baez nanz, gyoengqlwg hix mbouj nyienh caiq gangj daxmeh maz lo. Daxmeh ciuq gonq guh, danhfanz miz byaek lw, cungj aeu rom roengzdaeuj, caj daengz donq laeng dawz daeuj raeujraeuj couh gwn.

Gyoengqlwg euq mbouj gvaq daxmeh, doeklaeng gyoengqlwg caez gyonj ngaenz cawx aen binghsiengh ndeu dauqdaeuj, hawj daxmeh cang gij byaek lw youq ndaw, baenzneix ciemhciemh hix gyaezgyoh gijgwn, gvenq mbaet gwn mbaet yungh lo.

Gyoengq vunz ndaw mbanj couh haenh ranz vunz gyoengqde rox danggya, haenh gyoengqlwg daxmeh dingqgangj.

Gvaq geij bi le, gyoengqlwg daxmeh baenzranz lo. Daxmeh caeuq daeg iq Daegyot caez youq. Youh gvaq geij bi, Daegyot hix baenzranz lo, aeu ndaej mehyah boux vunz gyaeulili, cix dam gwn mbouj haengj guhhong.

Hainduj, daxmeh lij nyaenx lwgbawx Daegyot, ndwnj vah youq ndaw dungx, ngoenznaengz yawj Daegyot cawx haujlai byaek, bienq yiengh loengh gwn, baez gwn sat lw gij byaek cungj cang daehsuliu dawz bae gveng, saekdi hix mbouj sim’in.

Nanz le, daxmeh saedcaih yawj mbouj gvenq lo, youh laeglemx youq seiz gwn caeuz sat, rom gij byaek lw roengzdaeuj, cang youq ndaw bat, yo haeuj ndaw binghsiengh ce, caj daengz donq laeng gwn caeuz seiz, aeu gij byaek lw de yo daeuj raeuj gwn.

Mehyah Daegyot yawj daxmeh yienghneix guh, ndawsim mbouj angq, seiz mbouj seiz, yungh vah baeh daxmeh. Naeuz daxmeh dwg vunz mbaet vunz ged, naeuz daxmeh mbouj rox gwn, naeuz daxmeh mbouj gyaez gij ndangdaej bonjfaenh cixbah, lij daiq daeglwg lwgbawx caez souhcoih.

Daxmeh hozunq doiq lwgbawx gangj naeuz:“Bawx ha bawx, meh hix rox gangj rox daenj rox yiengjsouh, hoeng, meh gaxgonq gvaq gij saedceij gungzhoj gvenq lo, hag baenz cungj sibgvenq insik gijgwn. Gou rom byaek lw caiq raeuj daeuj gwn, dwg vih sou mbaet ngaenzcienz. Caiq gangj, mwngz caen dwg yiemz gwn gij byaek lw neix, mwngz mbouj gwn hix baenz, ce hawj gou gwn. Mwngz siengjsiengj, sou gveng gij byaek lw neix, mbouj dwg gveng bae gij ngaenzcienz sou lwi? Bouxvunz youq gwnz biengz aeu lai ngeixnaemj, seiz imq aeu siengj daengz seiz iek cij ndaej.”

Bawx Daegyot dingq daxmeh baenzneix gangj, hujheiq dengdeng. De laihnaeuz daxmeh daegdaengq diunanz de, caeuq de gvaq mbouj bae, hoizbak hwnjdaeuj. Daxmeh lau caeuq lwgbawx doxceng, nauh ndaej ndawranz mbouj doxhuz, caiq mbouj gangj vah, swnh ngoenz Daegyot lwgbawx mbouj youq ranz, coux buhvaq swhgeij bae ranz lwgdaih youq lo.

Gvaq bi laeng, Daegyot miz lwg lo. Dem miz aen bak lwgnding, giz sai ngaenz couh lai lo. Gyoengqde ciemhciemh roxnyinh gij cienz ndaw fwngz gaenj, caiq mbouj ndaej lumj gaxgonq nei fwngzbyaengq lo. Seiz gwn caeuz, gji byaek gwnz daiz mbouj ndaej daih baij daih gwn lo. Couhcinj miz saek boux beixnuengx roxnaeuz hek daeuj ranz, lai baij di byaek dak hek, seiz gwn caeuz sat le, danghnaeuz gwnz daiz miz byaek lw, songde hix lumj daxmeh nei rom gij byaek lw roengzdaeuj, cang youq ndaw vanj, cuengq daengz ndaw binghsiengh bae louz, caj daengz donq laeng raeuj gwn.

Daxmeh rox Daegyot lwgbawx gaij bae gij sibgvenq daihsaengq, youh rox ranz gyoengqde vunz noix hong nyaengq, lwg lwgdaih hix majhung lo, baenzneix youh bae caeuq Daegyot caemhyouq moq lo, bang songde ganq lwg guh di hongranz.

Daxmeh caiq dauqma lo, Daegyot lwgbawx song boux youh sim’angq youh najmong. Hei, lij dwg vahsug gangj ndaej deng——“danggya cij rox gyu youz bengz, ciengx lwg ngamq rox cingz bohmeh”. Daxmeh vihmaz rom byaek lw, cungj dwg vih lwg vih lwgbawx.

Danghnaeuz raeuz vunzlai youq seiz gijgwn cuk, cungj mbouj insik gijgwn, daihsaengq gijgwn, goulau seiz gungzhoj daeuj daengz le, raeuz ienqhoij yaek dauq gvaq cix mbouj miz yungh bw!