Foux gyongraez gaeuyiengz Yauzcuz dwg cungj foux dangdieg gag miz ndeu, youz Hocouh Si Cunghsanh Yen Liengjanh Yauzcuz Yangh ciuq gij goekgaen minzcuz caeuq rangh- dieg vunzyouq daeuj cauh’ok.

Haujlai bi daeuj, foux gyongraez gaeuyiengz gaenq baenz cungj cezmuz vunz Yauzcuz dangdieg gyaezmaij liz mbouj ndaej haenx. Vunz Yauzcuz hwnjranz、hohsouh、couxbawx haqlwg miz lwg、angqhoh fungsou caeuq guhcaeq daengj cungj yienj fouxgyongraez. Baez daengz ngoenzciet cojcienz lumj gvaqcieng、Cietbuenzvuengz、guh ranzfwen daengj, cungj yaek diuq cungj foux neix.

Gij guhfap cojcienz gvendaengz foux gyongraez gaeuyiengz haenx dwg：Boux diuq fouxgyongraez mbouj mauhgvaq 3 boux, boux diuq foux- gaeuyiengz mbouj hanh geijlai boux, langh miz gaeuyiengz, cungj ndaej camgya. Heijdaeuz diuqfoux seiz- haenx, boux diuq fouxgyongraez laebdaeb roq gyong sam baez, boux diuq fouxgaeuyiengz couh baizdoih, gaeuz ndang, song fwngz gingz hwnj gaeuyiengz, ciuq gij ningdoengh caezcaemh cug yamq cug yamq diuq okdaeuj, diuq yamq ndeu diemj mbat gaeuyiengz ndeu, doengzseiz, vunzlai ciuq gij ningdoengh caezcaemh doxlwnz hemq“huhyeh—huhyaz—huhyeh—huhyaz”. Diuq daengz gyang, boux diuq fouxgyongraez laebdaeb roq gyongraez song baez seizhaenx, couh daengz seiz“yiengzbya”doxdaemj, couhdwg boux diuq fouxgaeuyiengz baez gek yamq ndeu, song boux aeu gaeuyiengz doxgoed mbat ndeu, hawj sing doxgoed yiengj sing singj. Diuq daengz duenh doeksat, boux diuq fouxgyongraez couh laebdaeb roq gyongraez sam baez, boux diuq fouxgaeuyiengz couh soengz soh lo, ningdoengh gyavaiq, doxdaemj gaeuyiengz, caemhseiz hemq“huh- huh—huhhuh—huhyezhuh”. Diuq daengz doeksat, boux diuq foux- gyongraez song fwngz gingz gyongraez sangsang bae, neix diuqfoux couh sat lo.

Bi 2010, foux gyongraez gaeu- yiengz Yauzcuz ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feih- vuzciz vwnzva yizcanj mingzloeg.

Bi 2018, Cunghsanh Yen Liengjanh Minzcuz Cunghyoz 28 boux hagseng Yauzcuz daibyauj Gvangjsih daengz Aumwnz camgya 2018 Yacouh bouxcoz nyezrauh cien vunz comz yienj dijcauh bouxbing hozdung. Gyoengqde youq ndaw hozdung yienj《Swnjcienz Foux Gyongraez Gaeuyiengz》《Fwen- mwnzlai》song aen cezmuz, bouxyawj cungj haenhndei dangqmaz.

Seizneix, Liengjanh Yauzcuz Yangh Minzcuz Cunghyoz dawz《Foux Gyongraez Gaeuyiengz》dangguh gogenh hozdung, aeu neix daeuj swnjcienz vwnzva Yauzcuz.