“Boux fazgvanh mehmbwk dou neix ak raixcaix, yaep ndeu dang mehbaj gihveijvei, yaep ndeu dang boux cam simleix, yaep ndeu youh bienqbaenz boux mehmbwk ak, baez gonq haidingz gou cungj lau de caeuq bouxdangsaeh doxceng hwnj- daeuj……” Youq doiqnaj Veiz Ciuh- gvei fazgvanh, Liujcwngz Yen Yinz- minz Fazyen(baihlaj genjdanh heuh “Liujcwngz Fazyen”) Daibingz Yinz- minz Fazdingz dingzcangj Lanz Veij- bingh fazgvanh gangjriu doiq gicej naeuz. Dingq daengz doenghgij neix, Veiz Ciuhgvei mbouj hozndat saekdi, dan miz di najmong riu lo. Veiz Ciuhgvei dwg bouxsaemjbuenq Liuj- cwngz Fazyen Minzsaeh saemjbuenq itdingz, hix dwg boux fazgvanh Cuengh Gun song cungj vah ndeu, cujyau fucwz gij anqgienh minzsaeh dajgauq cawz saeh seng’eiq、 saeh ranz caixvaih, lumjbaenz baizcawz fuengzhaih cengnauh、ndawbiengz ciqcienz cengnauh、ciemqgienz cwzyin cengnauh daengj, yienznaeuz mbouj dwg anqgienh hung anqgienh youq- gaenj, hoeng gvendaengz gak fueng- mienh ndwenngoenz beksingq, aeu caeuq bouxdangsaeh mbouj doxdoengz doxgyau, naemj gaijgez cengnauh, couh aeu youq mwh banh’anq cang gak cungj ndangfaenh.

Baez Yienhciengz Damqcaz Gig Gaenjcieng Ndeu

Mboengqneix, gicej riengz Veiz Ciuhgvei caeuq boux suhgiyenz Gungh Cuzyingh、fazgingj Veiz Yinzhwngz bae Liujcwngz Yen Dabuj Cin Cwngden Cunh Mbanjleizbeih gaijgez gienh saeh doxceng reihnaz ndeu. Bouxgauq gauq daengz fazyen, cingj fazyen buenq gij reihnaz boux- denggauq hawj de dauq. Vih diucaz diegyouq、najdieg gaiq reihnaz neix daengj cingzgvang caeuq roxyiuj gij goekgaen song mbiengj doxceng, Veiz Ciuhgvei daengj vunz bae daengz gaiq reihnaz song mbiengj doxceng haenx damqcaz, caemhcaiq sawq diuzgaij.

Ngoenzhaenx banringzgvaq, baih- rog ndat ca mbouj geijlai 40 doh, song mbiengj cungj mbouj doxnyiengh saekdi, Veiz Ciuhgvei gyoengqde mienh dak nditndat dag reihnaz、ingjsiengq, mienh lij nyaenx gij heiqhwnj song mbiengj bouxdangsaeh、caeuq cunhcihsuh daengj mizgven gak mbiengj liujgaij cingzgvang. Boux- denggauq daxgoeng Veiz hozhwnj raixcaix, mbouj dingz gejhaemz hawj Veiz Ciuhgvei, bouxgauq raen yiengh- neix hix hozgaek lo, yienhciengz gaenjcieng dangqmaz. Youq mwh doxgangj, Veiz Ciuhgvei raen dax- goeng Veiz dingzlai dwg gangj Vah- cuengh, couh yungh Vahcuengh caeuq de gangj aen muzdiz baez neix daeuj, hawj de sim dingh roengzdaeuj, lij naeuz, itdingh goengbingz goengcingq cawqleix gienh saeh neix. De raen mehyah daxgoeng Veiz dwg boux vunz gangj dauhleix ndeu, couh sawq doenggvaq de guh hong diuzgaij.

Diemj cung ndeu gvaqbae, yienhciengz damqcaz caeuq diuzgaij guhbaenz duenh ndeu, Veiz Ciuhgvei gyoengqde hwnjdin dauqma Liujcwngz Fazyen. Gyoengqde dauqma daengz bangunghsiz goq mbouj ndaej bae vuenh roengz gij buhvaq deng hanh dumz liux, swiq mbat naj ndeu couh youh hainduj guhhong lo, gyoengqde aeu veh mbaw doz bingzmienh reih- naz、bouj bitloeg damqcaz, dangh- naeuz aen anqgienh neix diuzgaij mbouj ndaej, seiz haidingz doenghgij swhliu neix yaek dangguh baengzgawq youq gwnz dingz aeu okdaeuj. Lauheiq dwg Veiz Ciuhgvei mbouj lau dwg- rengz yungh sim gienq miz cozyung lo, haemhhaenx, de ciep ndaej gij denva mehyah daxgoeng Veiz dwk daeuj, mbiengj de naeuz gaenq cawzseuq go’gyoij gwnz gaiq reihnaz doxceng haenx lo, reihnaz boiz hawj bouxgauq dauq. Bouxgauq aeundaej reihnaz dauq couh bae fazyen naeuz mbouj gauq lo. Baez doxceng reihnaz neix couh yienghneix ndaej gaijgez lo.

Faenh Dinfwngz Ciknieb Noix Mbouj Ndaej Ndeu

Lumj baez yienhciengz diuzgaij gig gaenjcieng aen anqgienh neix, vunz gvaq roen raen le cungj mbouj gamj haeuj gyawj, hoeng neix dwg gij cingzgvang Veiz Ciuhgvei youq mwh guhhong ciengzseiz bungzdaengz. Najdoiq bouxdangsaeh song mbiengj lumj ma caeuq meuz nei, fazgvanh lij aeu baujciz caemdingh caeuq leixsingq, youq gwnz giekdaej caz cingcuj saedsaeh faen cinj deng loek, ra raen diemj caphaeuj diuzgaij, neix gwnrengz raixcaix. Youq Liujcwngz Fazyen, gij anqgienh gvendaengz laj- mbanj ciemq cungjsoq anqgienh dingzlai, ndawde gij aeuyungh Vah- cuengh、Vahgveiliuj doenghgij vah bonjdieg neix youh ciemq dingzlai. Ndigah, gangj gij vah vunzlai dingq ndaej rox、raen caenciet haenx, youq Veiz Ciuhgvei yawj daeuj dwg gij giekdaej siubae doxceng, hix dwg faenh dinfwngz ciknieb itdingh aeu miz ndeu.

Veiz Ciuhgvei daj lajmbanj Liujcwngz Yen daeuj, de daj iq couh gangj Vahcuengh mboujdan mbouj geih bonjfaenh gangj Vahbujdungh miz di “cab Cuengh” gienh saeh neix, lij hawj dahlwg doeg youwzyenz hag gangj Vahcuengh. “Aenvih neix couh- dwg gij goek dou, lwgsau Bouxcuengh baenzlawz miz gij dauhleix mbouj rox gangj Vahcuengh?” Veiz Ciuhgvei naeuz. De nyinhnaeuz, vahsaw dwg cungj dakdawz vwnzva ndeu, gij supyinx vunz aen minzcuz ndeu couh youq gizneix, hag gangj Vahbujdungh dwg gij fuengyiengq ndawbiengz hwngfat aeu guh haenx, hoeng baujhoh gij vahsaw minzcuz hix gig youq- gaenj.

Cungj gamjcingz doiq vahcoj neix daj gij ginglig de youq rog doegsaw、guhhong daeuj. De daihhag dwg youq Huznanz doegsaw, bizyez le youq Gvangjcouh、Baekging guhhong 6 bi. Youq diegrog, doengzhag、doengzsaeh doiq vwnzva Bouxcuengh mizyinx, hawj de roxnyinh gig miznaj, hix rox daengz gij yauqwngq geizheih vahcoj yaepyet couh hawj vunzlai liz gyawj.

Aen Anqgienh Iq Yungh Haujlai Goengrengz Ndeu

Bi 2011 ndwen 11 haeujdaengz Liujcwngz Yen Yinzminz Fazyen guhhong doxdaeuj, Veiz Ciuhgvei gonqlaeng youq minz ngeihdingz、laeb’anq dingz、minz itdingz guh hong saemjbuenq, bi 2016 ndwen 1 ndaej senj haeuj fazgvanh yenzngeg. 3 bi neix daeuj, de sou anqgienh 562 aen, giet anqgienh 466 aen. Gij anqgienh de ciepguh haenx mbouj itdingh dwg ceiq lai, hoeng ndaw yen haujlai anqgienh “mbouj bingzciengz”、 anq- gienh youh cab youh hoj doeklaeng cungj dwg youz de gaijgez. “Diemj ndeu dwg gig yawjnaek gamjcingz, diemj ndeu dwg (banh’anq) gig miz banhfap.” Liengz Siujai boux culij fazgvanh caeuq Veiz Ciuhgvei doxcaez guhhong haujlai bi neix naeuz, faz- gvanh ciengzseiz miz haujlai simsingq doxdoengz, hoeng song diemj neix dwg gij de caeuq bouxwnq mbouj dox- doengz.

Lumjbaenz aen anqgienh ciq ngaenz ndawbiengz de cawqleix ndeu couh hawj Liengz Siujai geiq ndaej gig maenh. Bouxgauq aen anqgienh neix dwg boux mehmbwk ndeu, caeuq bouxdenggauq miz gij gvanhaeh caeuqyoux gvaq, de dajgauq cingjgouz fazyen buenqgiet bouxdenggauq boiz 5000 maenz ngaenz. Doiq cungj anqgienh anqcingz loq genjdanh、muzdiz mbouj hung neix, cingzgvang neix mbouj miz banhfap diuzgaij fazgvanh bingzciengz ciuq cwngzsi haidingz, danghnaeuz baengzgawq mbouj doh, couh buekdauq dajgauq, baengzgawq doh youh lai, couh haeujcoengh bouxgauq. Hoeng Veiz Ciuhgvei cix mbouj ciuq cingzgvang bingzciengz bae guh, youq haeujlaeg liujgaij anqcingz le, de raen bouxgauq miz gij hojnanz nanz baetduet gij gamjcingz de caeuq bouxdenggauq bae, gij baengzgawq de aeu okdaeuj haenx hix mbouj doh. Yienghneix de doenggvaq denva、donjsin、veihsin caeuq bouxgauq doxgangj, youh iu bouxgauq daeuj bangunghsiz gangjgoj haujlai baez, dauqdaej hawj bouxgauq mbouj caiq genhciz gij gamjcingz de caeuq bouxdenggauq, youq mwh doidauq mbouj gauq daj duenh gvanhaeh neix byaij okdaeuj lo. “Anqgienh daj faplwd fuengmienh daeuj gangj caengz ndaej gaijgez, Veiz fazgvanh bang bouxgauq gejok gij hot ndawsim lo.” Liengz Siujai naeuz, “De roxnyinh daengz dah lwgsau neix mbouj yungzheih.”

Yienznaeuz dwg aen anqgienh iq, hoeng vihliux bang bouxdangsaeh, Veiz Ciuhgvei sij ndaej yungh haujlai seizgan caeuq goengrengz. Doiq gij bouxdangsaeh gig “nanz guh” engqlij luenh swenj luenh nauh haetlaih haenx, de hix miz banhfap wngqdoiq. “Mizmbangj vunz gag laihnaeuz rox di faplwd ndeu, cungj cuenq giz hoengq faplwd, caiqlij gyoengqde gojnaengz hix ndaej ndei gvaq, bungzdaengz cungj vunz neix dou hix ciuq cwngzsi guh, hoeng Veiz fazgvanh cungj miz banhfap hawj gyoengqde rox hit.” Liengz Siujai naeuz.