Seizneix lwgsai lai lwgmbwk noix, haujlai daegmbauq gig nanz aeu ndaej yah. Dahsau couhsuenq yienghsiengq mbouj baenzlawz yiengh, dingzlai ciuqyiengh haq ndaej okbae. Ndigah, gij iugouz dahsau doiq lwgsai yied daeuj yied sang.

Mehyah Lauxvangz gvaqseiq caeux, ce roengzdaeuj Daegvuz caeuq Daeggangh song daeglwg hawj de gag ciengx.

Lij ndei, mbwn miz lwgda, song daeglwg majhung le gonqlaeng aeu yah baenzgya lo, lij gak boux gak miz song laeq lan hawj Lauxvangz umj. Lauxvangz gag nyinhnaeuz swhgeij diuz mingh mbouj loek, de bungz vunz couh lwnh gij ranz vunz de.

Youq lajmbanj guhhong nazreih souhaeuj noix youh dwgrengz, hix mbouj raen miz maz cienz yawz roengzdaeuj, lwgdaih Daegvuz lwg- ngeih Daeggangh yaek okrog bae dajgoeng rom cienz lo. Lauxvangz naeuz:“Youq ranz ndaem haeux ndaem duh lij aeu cienz bae bouj, youq rog dajgoeng lumj gij seng’eiq fouz bonj, ndaej geijlai cienz suenq geijlai, sai di goengrengz, hoeng habsuenq!”

Lwg caeuq bawx caez bae dajgoeng le, 4 laeq lan couh ce youq ranzcoj hawj Lauxvangz daiq.

Lauxvangz ndangdaej lij maenh- ak, cawz le ganqhoh 4 laeq lan neix, de lij guh moux lai naz dem, ndaem di haeux, ndaem di duh. Miz vunzmbanj riu naeuz:“Yah dai ndaej caeux swhgeij gag ciengx lwg hung couh suenq lo, seizneix gaenq geqlaux lij aeu bang lwg ganq lan dem, cij miz mwngz guh ndaej daengz ndwi lo.”

Lauxvangz dingq le riu naeuz:“Gou mbouj lau dwgrengz, cijaeu gyoengqde rom ndaej cienz caemhcaiq saedceij gvaq ndaej ndei, gijneix mbouj suenq maz law! Danghnaeuz gou mbouj bang gyoengqde ganq lwg, gyoengqde youq ranz baengh geij moux reihnaz bae gyawz ra ndaej cienz ha? Danghnaeuz gou mbouj guh nazreih, gyoengq lwg maranz gwn maz?” Gyoengq vunzmbanj dingq le cungj gig haenh gij sim saej cungj Lauxvangz vih daeglwg caez lo.

Ngoenznaengz, Lauxvangz vih gyoengq lan cawj gwn saeg buh, aeu cisamloek soengq gyoengqde bae hagdangz, haet soengq bae haemh coux ma, dwgrengz cix simhai, de nyienh guh gij saeh neix, cijaeu song daeglwg gvaq ndaej soeng di.

Lauxvangz daengx ranz 9 boux vunz, seizneix lij caenx youq aen ranzgaeuq bingzfuengz gaebgeb ndeu, de gig maqmuengh gyoengqde rom ndaej cienz ma guh ranzlaeuz moq. Swhgeij diuz loh seiqvunz yaek byaij sat lo, couh lumj aen daengngoenz yaek doek bya, mbouj caiq ndongq- myab, guh mbouj ndaej maz lo, caensim maqmuengh gyoengqlwg guh ndaej baenz ranz moq.

Lan hung gaenq roxsoq ndei ganq lai lo, gij lan iq it ngeih bi haenx couh nanz ganq lo. Gyanghwnz mbouj dwg lwg neix oknyouh couhdwg lwg haenx okhaex, aen mbonq de mbouj noix saek seiz mbouj haeu nyouh haeu haex gvaq.

Mbouj geij bi, Daegvuz caeuq Daeggangh cungj guh ndaej ranzlaeuz moq, song daeglwg mbouj caiq bae dajgoeng lo. Daegvuz youq laj gorungz gyaeujmbanj hai aen bouq gai cabhuq ndeu. Daeggangh youq gwnz gai guh seng’eiq, gij saedceij bouxboux gvaq ndaej hoenghhwdhwd.

Gyoengq lan majhung lo, Laux- vangz ngoenz ciemh ngoenz geq bae, caiq guh mbouj ndaej hong nazreih, gag boux ndeu youq aen ranz bingz- fuengz gaeuq haenx youq.

Mehyah Daegvuz Dahlanz naeuz, de seizneix aeu ciengx lwg, lij ciengx mehdaiq ndang gyad dem, ganq mbouj gvaqdaeuj, mbouj ndaej ciuqgoq Lauxvangz.

Dahlanz haibak yienghneix gangj, Daegvuz vah noix youh lau Dahlanz, maz cungj dingq yah gangj, hix mbouj gamj guhcawj, youzcaih mehyah gag guh gag sat.

Godaih saujdaih miz aen sim yienghneix, Daeggangh song gvanbaz hix mbouj gangj maz lai, riuhoho ciep Lauxvangz daeuj gwnz haw gaen youq, yah Daeggangh doiq Lauxvangz naeuz:“Boh ha, ranz gaeuq baez doek fwn couh laeuh raemx, ndaw ranz cumx youq nanz le mboujdanh yungzheih baenzbingh hix mbouj ancienz. Mwngz couh ansim gaen dou youq ba.”

Daj caeuq Daeggangh song gvanbaz gwn youq le, Lauxvangz ngoenznaengz okrog bae lienhlienh ndangdaej, yawjyawj saw bauq, roxnaeuz caeuq gij doih bouxgeq gangjgoj gangjboq, gij saedceij Lauxvangz gvaq ndaej soengse youh vaiqvued.

Faex geq nduk roz, moz geq ndang nyieg. Aen ndangdaej Laux- vangz bienq ndaej mbouj dwg gizneix in couhdwg gizhaenx bingh, ciengz- ciengz haeuj yihyen bae yw bingh. Hoeng, Daegvuz song gvanbaz mbouj dam mbouj cam, neix hawj Lauxvangz gig saetmuengh.

Miz vahgeq naeuz “bouxhoj nanz dai, gaeuvaiz nanz nduk”, Lauxvangz lij mbouj deng lot roengz. Ngoenz- haenx dwg ngoenzhaw, Lauxvangz youq ranz mbwq lai, gag boux ndeu bae gai youz, de daeuj daengz aen diemq gai dijyuz caijbyau ndeu, swnhbienh cawx le geij maenz ngaenz caijbyau guhcaemz.

Caen dwg miz sim ndaem va va mbouj hai, fouz sim ndaem faiq faiq baenz baengz. Lauxvangz ndaejciengj lo, lij cung ndaej bak fanh maenz dem, de guh loq hix mbouj gamj naemj daengz, hawj de miz di doeksaet.

Aen siusik Lauxvangz ndaej- ciengj hung hawj vunz sim diuq neix yaepyet couh cienz doh daengx mbanjranz, gizgiz cungj goenjfoedfoed, bouxboux ngeixlwnh gienh saeh neix, lumj ndaej caenda yawjraen de cawx nei.

Gienh saeh neix cienz daengz ndaw rwz Daegvuz song gvanbaz lo. Ngoenzhaenx haetromh ndit rongh- sagsag, Lauxvangz baez hai dou couh yawjraen Daegvuz song gvan- baz yamqdin haeujdaeuj. Dahlanz riunyumnyum byaij gvaqdaeuj doiq Lauxvangz naeuz:“Boh ha, ngoenzneix dou dwg daeuj ciep mwngz bae caeuq dou gwn youq, gaxgonq dou uk ngawz naemj mbouj doeng, caiq naeuz mwngz bouxlaux youq ranz Daeggangh haemq nanz lo, seizneix mwngz couh buen daeuj caeuq dou youq ba.”

Lauxvangz dinghdingh ndwn youq mbouj guh sing, de seizneix mbouj rox gangj maz cij ndei.

“Dwg byawz youq baihrog cauz- swdswd ha?” Mehyah Daeggangh caeuq Daeggangh daj ndaw ranz byaij okdaeuj, raen saujdaih godaih ndwn youq rog dou caeuq daxboh gangj vah.

Dahlanz naeuz:“Sou daeuj cingq ndei lo, raeuz seizneix couh youq gizneix cam daxboh cingcuj, gij cienz haenx sou gaej siengj gag aeu, gak ranz faen guh dingz, baenzlawz guh vunz, mbwn raen, mbwn rox!”

“Saujdaih, mwngz gangj maz dou mbouj mingzbeg bw!” Daeggangh mbouj ndatheiq, dauq dwg gig sim- dingh hoiz naeuz.

“Sou dingz bak, sou gak boux dingq gou gangj!” Lauxvangz cungj suenq haibak lo:“Ngoenzhaenx gou bae haw cawx caijbyau dingjlingz ndaejciengj bak fanh maenz, gij cienz neix mbouj dwg ngaenz duh gou, hix mbouj dwg ngaenz duh sou, sou song beixnuengx mbouj ndaej yungh, gou swhgeij hix mbouj ndaej yungh.”

Lauxvangz dingz le dingz bak, youh naeuz:“Gou siengj dawz gij cienz neix youq ndaw mbanj guh aen ginglaujyen he, hawj doenghgij boux- laux mbouj miz lwg roxnaeuz miz lwg mbouj nyienh ciengx haenx youq, hawj gyoengqde geq miz dieg gwn miz dieg baengh, hawj gyoengqde gvaq aen seizgeq vaiqvued ndeu!”

Daeggangh song gvanbaz naeuz:“Daxboh gangj ndaej deng, couh wnggai yienghneix guh!” Lauxvangz yiengq songde riunyumnyum, ngaek- ngaek gyaeuj.

Dahlanz song gvanbaz bak aj da daengx ndwn youq gizhaenx lumj moegyou nei.

Dahlanz ndatheiq fofo fok naeuz:“Baenzneix yawj daeuj gyoengq vunz ranz neix cungj fatbag lo, miz cienz mbouj hawj lwglan swhgeij yungh, dawz bae guh maz ginglaujyen, fat- bag!” Gangj sat hujdengdeng buetdeuz lo.

Buenq bi lai gvaqbae, ndaw mbanj aen ginglaujyen sam caengz moqsaksak he guh baenz lo. Raed couznding hai dou ngoenzhaenx daengx mbanj lauxiq saimbwk cungj daeuj angqhoh.