Fouxyaz Gveilinz, dwg gij yisuz dijbauj lwenqda ndawbiengz Gvei- linz, vunzlai heuhguh“diuq yaz Gveilinz ”.

Gaxgonq lajmbanj Gveilinz hwng diuq yaz. Vunz lajmbanj Gveilinz guh hozdung“boiz sim- muengh hung”seizhaenx cungj diuq yaz. Aen hozdung“boiz simmuengh hung”dwg cungj fungsug youz vunzbiengz lajmbanj Gveilinz gouz fuk cawz rwix、gouz lwg gouz ndei, sam bi guh mbat. Gingciengz dingh youq liggaeuq cib nyied ngeihcib’it hauh daengz ngeihcibsam hauh gawjbanh. Doenghgij hozdung ndaw- biengz neix hopheux“diuq yaz”daeuj guh; yienh’ok daengx aen yiengh- siengq vunz caeuq daswyenz dox- buek、caeuq fangz doxhoenx haenx. Ndigah, baez daengz duenh guh hozdung, gyoengq vunzmbanj gyaez yawj diuq yaz, maij camgya hozdung, caemhcaiq sim caem hoz maez youq ndaw yisuz fouxyaz neix, caeuq fouxyaz miz gamjcingz noengzna dangqmaz. Boux yienj“saefangz”diuq fouxyaz haenx daihbouhfaenh dwg nungzminz dangdieg.

Duenh guh hozdung“boiz simmuengh hung”haenx ndaw mbanj rog mbanj cungj nauhyied dangqmaz. Guh hozdungh diuq yaz sam ngoenz sam hwnz duenh neix, gyoengqde cungj yienj 36 bouxsaenz、72 boux- siengh le caez bae, cijndaej boiz sat simmuengh. Gij neiyungz 36 boux- saenz, gyonjcomz miz gojgaeq lizsij、riuzgangj gojsienbaed, dawz gij goenglauz Vuengzbuenzgoj haimbwn、Vuengzgvangjfuz、Lujbanh daengj, doenggvaq diuqfoux caeuq go’hoh- saenz yienh’ok daeuj.

Dangqnaj, ndawbiengz vanzlij louz miz gij gizbuj(cungj gyoebcomz gij mai sing sang daemq) diuq yaz haenx gungh 36 bouh 114 souj; ngeggoemq faen baenz 36 bouxsaenz 72 bouxsiengh, daengx dauq gungh 108 aen. Diuq fouxyaz seiz ging- ciengz dwg boux ndeu gag diuq roxnaeuz song boux doxlwnz diuq, ciuq gij gonqlaeng dingh ndei haenx diuq 36 bouxsaenz 72 bouxsiengh caez. Bouxdiuqfoux baengh ngeg- goemq mbouj doxdoengz couh yienj yienghsiengq caeuq ningdoengh mbouj doxdoengz, riengz sing yinhyoz youh ciengq youh diuq. Bouxsae yinhyoz roq gyong boq dig buenx sing daengz yienj sat bae.

Gij cezmuz yienj fouxyaz miz 30 lai aen, ndawde gijdaeuz dwg《Nwzcah》《Hai Bya》《Lujbanh》《Deihnamz》《Buenzgoj》daengj. Aen cezmuz vunzlai dangdieg ceiq maij、ceiq miz yaenqsiengq haenx dwg《Nwzcah》.