De dwg boux fucwz aen dingz daih’it saemjbuenq minzsaeh Ningz- mingz Yen Yinzminz Fazyen, de heuh Mungz Genfungh. Youq ndaw da lingjdauj, de dwg boux fazgvanh rox song cungj vah maenhndei naengzlig ak, yezvu suijbingz sang, najdoiq gij anqgienh ngeiznanz gig miz sim dangrap ndeu; youq ndaw da doengz- saeh, de dwg “boux fazgvanh rox lai” gawq rox yungh Vahcuengh、Begvah dangdieg、 Vahbujdungh banh’anq, dinfwngz youh soem, rox ciengq rox diuq rox yienjgangj rox gaemguenj; youq ndaw da bouxdangsaeh, de dwg “boux fazgvanh rox sim” gig hawj vunz nyienh caengaenh、nyienh baedauq, gig rox diuzgaij ngaekngeu ndeu. Mboengqneix, gicej bae daengz Ningzmingz Yen Yinzminz Fazyen, byaijhaeuj ndaw hong Mungz Gen- fungh ngoenznaengz, roxnyinh boux fazgvanh yenzngeg caengz lajdaej neix baenzlawz yungh song cungj vah cienz gij sing’yaem fapceih.

Yienhciengz yungh song cungj vah guh fazdingz saemj- leix: Henhoh gij gienzleih gunghminz gak minzcuz yungh gij vah minzcuz bonjfaenh daj- gauq

Ndwen 8 ngoenz 5 banhaet, gicej daeujdaengz aen dingz saemjbuenq Ningzmingz Yen Yinzminz Fazyen, naengh dingq yungh song cungj vah guh fazdingz saemjleix.

Mungz Genfungh heuh boux fazgvanh culij caeuq suhgiyenz dox- caez hai hoih caepcawq haidingz, genjdanh yenzgiu doxyaeng gij cingz- gvang anqgienh caeuq gij saehhangh youq ndaw gocwngz haidingz aeu louzsim. Aenvih bouxgauq、boux- denggauq cungj dwg vunz lajmbanj Bouxcuengh, mbouj rox gangj Vahgun geijlai. Fazdingz saemjleix gaxgonq, fazdingz cam gij yigen song mbiengj, song mbiengj cungj bauq yungh gij vah minzcuz bonjfaenh camgya faz- dingz saemjleix.

Mungz Genfungh vuenh hwnj buh fazgvanh, byaij haeuj fazdingz, yungh Vahgun caeuq Vahcuengh senhbu aen anqgienh baizcawz fuengzngaih ceng- nauh neix haidingz. Bouxgauq dwg dingz vunzmbanj aen cunhminz siuj- cuj Ningzmingz Yen Mingzgyangh Cin Fung’vangz Cunh Mbanjcaimeij, gyoengqde youq dieg “dihbai” mbanj bonjfaenh hwnq miz ranzyouq, youq ndawgyang ranz caeuq ranz louz miz diuz roen vunzmbanj ngoenznaengz baedauq baihnamz gvangq 2.8 mij, baihbaek gvangq 3.8 mij ndeu. Bi 2016, bouxdenggauq Couh moux yungh aen leixyouz diuz roen neix dwg de yungh reihnaz bonjfaenh vuenh daeuj guh, gonqlaeng yungh gik gaeuq gik vaih、 dohlahgih daeuj laengz diuz roen neix, gazngaih vunzmbanj ngoenznaengz baedauq yinxhwnj cengnauh. Vihneix, ginggvaq lenzse、cunhveijvei caeuq yinzminz cwngfuj lai baez baij vunz daeuj diuzgaij cawqleix, hoeng aenvih bouxdenggauq genhciz gij yigen bonjfaenh diuzgaij mbouj miz yungh, bouxgauq couh bae fazyen daezok dajgauq.

Youq mwh fazdingz saemjleix, Mungz Genfungh gangj ndaej cengh- seuq, Vahcuengh Vahgun doxvuenh yungh, gangj ndaej mbouj vaiq mbouj menh, cam vunz genjdanh mingzbeg, yungh gij gi’gyauj saemj- buenq gvenqsug caeuq Vahcuengh bonjdieg raeuzled gaemguenj daengx aen hozdung fazdingz saemjleix, hawj bouhloh fazdingz saemjleix cwngzsw faenmingz、youh gveihfan youh miz yauqlwd dangqmaz.

Soengq bouxgauq、bouxdenggauq bae liux le, Mungz Genfungh lwnh gicej, fapguek caeuq faplwd guek raeuz gvidingh, gunghminz gak minz- cuz cungj miz gij gienzleih yungh gij vah gij saw minzcuz bonjfaenh daj- gauq. “Gawqyienz faplwd hawj boux- dangsaeh minzcuz vunznoix miz loh gienzleih neix, raeuz couh aeu roengzrengz bae henhoh. Yienznaeuz yungh song cungj vah banh’anq yaek gyalai gij hong fazgvanh、gij seizgan haidingz, doiq vah caeuq yezvu naengzlig fazgvanh hix miz iugouz engq sang, hoeng de dwg gij hongdawz daejyienh swhfaz goengbingz cingq- ngeih、gig miz yauqlwd bae siucawz gij cengnauh ngaekngeu ndawgyang bouxdangsaeh minzcuz vunznoix itdingh aeu miz.”

Diuzroen yungh song cungj vah banh’anq: Guh “boux faz- gvanh rox sim” vunzlai minzcuz vunznoix

Dungzmenz Yinzminz Fazdingz liz yienhsingz Ningzmingz 101 goeng- leix, guenj baez daih’it saemjleix gij anqgienh minzsaeh ndaw Dungzmenz Cin、Naznanz Yangh song aen yangh- cin neix, diegguenj daihgaiq miz 6.6 fanh vunz, dingzlai vunz cungj gangj Vahcuengh. Dungzmenz Cin dwg mbanjranz Mungz Genfungh, de youq Dungzmenz Cin majhung, ndigah gig sug Vahcuengh dangdieg. “Vunz dangdieg cungj dwg vunz minzcuz vunznoix, dingzlai vunz dwg gangj Vahcuengh, gij vunzgeq mbouj rox gangj Vahbujdungh, yungh Vah- cuengh dangdieg diuzgaij mauzdun, caeuq bouxdangsaeh lumj gangjgoj nei gangjvah, hawj gou caeuq vunzlai liz gyawj lo, dingzlai cengnauh cungj diuzgaij ndaej gig ndei, ndigah youq Dungzmenz Yinzminz Fazdingz, gou itcig yungh song cungj vah guhhong.” Mungz Genfungh doiq gicej naeuz.

Mwh youq Haijyenh Yinzminz Fazdingz guhhong, Mungz Genfungh yungh Vahcuengh diuzgaij ndei aen anqgienh cengnauh lizvwnh ndeu. Youq ndaw gocwngz diuzgaij aen anqgienh neix, Mungz Genfungh raen bouxdangsaeh song mbiengj lij miz gamjcingz, caiqlij cungj gig gvansim dah lwg’iq, yienghneix de yungh faplwd caeuq cingzgamj dox giethab bae diuzgaij. De daiqlingx aen doih yungh Vahcuengh saemjbuenq bonj- faenh, daiq hwnj gozveih、sezbei, aeu aen fazdingz yungh Vahcuengh okcunz saemjleix hai bae daengz ndaw ranz bouxdangsaeh, caemhcaiq gig rox cauhmoq bae iucingj boux daibyauj cunhveij cujyin、funij cujyin、beix- nuengx song mbiengj daeuj yienh- ciengz caeuqfaenh diuzgaij. Youq gwnz aen fazdingz okcunz saemjleix depgaenh ndwenngoenz neix, boux dem boux vunz mbanjranz simgyaez, coenz dem coenz vah mbanjranz raeuj sim, doeklaeng hawj song gvanbaz oiq neix doxndei dauq, yienhciengz diuzgaij raeujrub hawj vunz gamjdoengh dangqmaz.

Mungz Genfungh lwnh gicej, yungh vah dangdieg guh diuzgaij, hawj vunz maij caengaenh、maij haeuj gyawj, vunzlai haemq haengj, vunzlai gangjok iugouz、guh dajgauq cungj engq doengswnh, guh gij hong banh- anq hix engq swnhleih lo.

Lai bi daeuj, Mungz Genfungh geiqmaenh aen cunghcij cienzsim cienzeiq fugsaeh yinzminz, cungj dwg guh daengz giendingh mbouj cuengq- soeng, yienjok gij cwzyin boux fazgvanh ndeu, aeu gij guhfap hengzdoengh goengcingq swhfaz、fwngz seuq guhhong, youq gwnz diuzroen youh hung youh ronghsag fugsaeh daengxbuenz、vih yinzminz swhfaz mboujduenh baenaj. Geij bi neix daeuj, Mungz Genfungh moix bi bingzyaenz banh’anq 80 lai aen, gij beijlwd gietanq moix bi dabdaengz 80% doxhwnj. Aenvih hong guh ndaej gig ndei, de ndaej bingz baenz “sam lingz biubing” daengx si fazyen bi 2014 gvaq, bi 2015 ndaej bouxvunz senhcin fazyen daengx gih, lienz- daemh geij bi ndaej bouxvunz senhcin gij cwnghauh miznaj aen fazyen de youq haenx.

Ningzmingz Yen Yinzminz Fazyen: Yungh gij vah minzcuz cienz gij sing’yaem fapceih

Ningzmingz Yen dwg dieg minzcuz vunznoix henzguek, daengx yienh miz 44 fanh vunz, ndawde Bouxcuengh ciemq 82.9%. Ningz- mingz Yen Yinzminz Fazyen dangjcuj cwngzyenz、fuyencangj Cwng Daujginz lwnh gicej, geij bi neix daeuj, Ningzmingz Yen Yinzminz Fazyen gaenxmaenx guh gij saemjbuenq yungh Vahcuengh Vahgun song cungj vah neix, cungfaen baujcang vunzlai yungh gij vah minzcuz bonjfaenh dajgauq. Cungdenj hopheux minzcuz doxgiet hwngfat, dajcauh gij binjbaiz fugsaeh yungh Vahcuengh Vahgun song cungj vah dajgauq, daezswng gij suijbingz fugsaeh yungh song cungj vah dajgauq, baujmaenh gij muzbyauh swhfaz vih yinzminz、goengcingq swhfaz, youq ndaw saemjbuenq gaeuqgeq yinxhaeuj yenzsu Vah- cuengh, guh yungh Vahcuengh Vah- gun song cungj vah dazyinx dajgauq、diuzgaij、fazdingz saemjleix、dauqcunz doenghgij neix, caemhcaiq guh baenzroix gij hong yungh Vahcuengh okcunz saemjbuenq caeuq swhfaz fugsaeh miz daegsaek, siucawz gij gazngaih gangjvah bae, coicaenh siucawz mauzdun cengnauh, aeundaej faplwd yauqgoj caeuq sevei yauqgoj ndei, hix ndaej daengz fazyen gaep baihgwnz haengjdingh caeuq sevei gak gyaiq gvangqlangh danqhaenh.

Dangqnaj, Ningzmingz Yen Yinzminz Fazyen gij ganbu caeuq gingjcaz rox gangj Vahcuengh Vahgun song cungj vah neix gungh miz 68 vunz, ndawde fazgvanh yenzngeg 22 vunz, gij vunz bang swhfaz 46 vunz. Bi 2018, miz 4 boux fazgvanh yenzngeg ndaej bingzdingh baenz fazgvanh Cuengh Gun song cungj vah. “Maq- muengh gyoengq fazgvanh song cungj vah aeu Mungz Genfungh guh daibyauj haenx gaenxmaenx fazveih gij ndei vah minzcuz, vih beixnuengx Bouxcuengh daezhawj gij fugsaeh swhfaz engq ndei, coicaenh minzcuz doxgiet huzndei.” Ningzmingz Yen Yinzminz Fazyen dangjcuj cwngzyenz、fuyencangj Cwng Daujginz naeuz.