Seizneix, cingq dwg seiz lauxbaeg baenz sou. Youq Cenzcouh Yen Dunghsanh Yauzcuz Yangh Luzswgai Cunh, gyoengq vunzmbanj cingq nyaengq aeu lauxbaegnding miz daegsaek Dunghsanh cang ci daeh bae diegrog.

“Bineix daengx cunh dajndaem lauxbaegnding miz daegsaek Dungh- sanh 80 moux, moix moux bi sou ndaej 3000 gaen, aeu gaen 2 maenz daeuj suenq, moix moux ndaej 6000 maenz, ranzgungzhoj ndaej ik 16 ranz. Doengzseiz yungh gij hwngfat vunqsik ‘ranzgungzhoj+hozcozse+gunghswh’, hozcozse fucwz soucawx lauxbaeg, gaijgez gij youheiq baihlaeng ranz dajndaem.” Boux ganbu capyouq mbanj Dauz Manjfu naeuz.

Bineix doxdaeuj, Dunghsanh Yauzcuz Yangh haenqrengz guh hong yinxhaeuj cehfaen moq, loh hong neix liedhaeuj gij neiyungz youqgaenj cizyau gaujhwz, nienzco gviveh daengx bi dajndaem hanghmoeg caeuq dajndaem yinvu, dinghmingz guhhong cwzyin caeuq seiz guhsat dajsuenq yinxhaeuj. Daengx yangh gak mbanj hwnjguh dieggoek guhyiengh dajndaem hoengh- hwdhwd, Bwzcuz Cunh dajndaem duhnoh raez 200 moux, Siujhozbingz Cunh dajndaem makmizhouzdauz 100 moux caeuq gvehoengz byasang fanj geiqciet 100 moux, Sanhgyangh Cunh dajndaem makmizhouzdauz 100 moux, Vangzlazdung Cunh dajndaem mak- bakhom byasang 60 lai moux, Limuzgyangh Cunh dajndaem bakhab 50 moux, Cizbaujgwngh Cunh caeuq Vangzlungzsang Cunh dajndaem lwg- manh 100 lai moux, Luzswgai Cunh dajndaem lauxbaegnding miz daegsaek Dunghsanh 80 lai moux, gyalai dajndaem caz 200 lai moux.

Linghvaih, Dunghsanh Yauzcuz Yangh lij gyalai gij ligdoh hwnjguh nungzyez gihcuj sezsih, coih aen daemz Lwngjsuijdangz Cunh、aen daemz Cinghsuijsang、Yasanhdangz 3 aen daemz, ndaej rom raemx 3 fanh lizfanghmij, dwk raemxnaz najdieg 60 moux. Dajndongj roen 16 diuz, hwnjguh 5 diuz roen canjnieb、3 aen daemz iq dwk raemxnaz caeuq 9 aen daemz raemxgwn, seizneix cungj guhsat daengz seiz niemhsou.

(Liu Yijgangh)