Fouxgaeuyiengz Yauzcuz dwg cungj fouxcaeq gyoengq vunz Yauzcuz Gvangjsih Gunghcwngz gag miz haenx, de yienh’ok vunz ciuhgeq Yauzcuz baenzlawz guhhong gvaq ndwenngoenz, gij daegdiemj ciuh hainduj haenx noengzna raixcaix, daegdiemj minzcuz gagdog dangqmaz.

Baez daengz ngoenzciet hung roxnaeuz guh hozdung angqhoh, Gunghcwngz gyoengq beixnuengx Yauzcuz maij diuq fouxgaeuyiengz. Gij doenghyiengh aeu daeuj diuq fouxgaeuyiengz haenx daegbied lai, couhdwg gij hongdawz dwknyaen caeuq gij nyaen dwk ndaej haenx. Ciuq vunz cienz gangj haujlai nanz gaxgonq, boux cojgeq Yauzcuz heuhguh Buenzvuengz deng yiengzbya daemj roengz dat dai lo, mehyah Buenzvuengz caeuq caet dahlwg de caezsim haenqrengz gaemh dawz duzyiengzbya caemhcaiq lij bok naengyiengz ok、gawq gaeu yiengz roengz, yienghneix guh cij hozroengz. Daengzlaeng, gyoengq lwglan Buenzvuengz aeu naengyiengz daeuj guh gyong, dawz gaeuyiengz daeuj diuqfoux, guh neix geiqniemh bouxcojgeq Buenzvuengz.

Fouxgaeuyiengz Yauzcuz dwg cungj foux aeu daeuj caeq cojcoeng、boiz simmuengh. Gaxgonq youq gyangdoengh giz caetgaiqnaz guh biujyienj. Vunz diuq fouxgaeuyiengz seizhaenx gingciengz faen guh haj mbaek：Mbaek daih’it dwg yiengzbya youq gwnz bya guhcaemz; daihngeih dwg duz- mavuengz deng haih; daihsam dwg hwnj bya dwknyaen; daihseiq dwg diuq fouxbouxsae; daihhaj dwg roengz doengh cunzyouz angqhoh. Yienj fouxgaeuyiengz seizhaenx aeu miz 19 boux vunz doxhwnj gyoebbaenz, gak boux gak miz hong.

Bi 2010, Fouxgaeuyiengz Yauzcuz ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.