“Beixnuengx, haemh neix denyingj ndeiyawj bw! Gwn caeuz liux le ma yawj denyingj……” Veiz Goh gaemhwnj aen vahdoengz, yungh Vahcuengh lwnh duenh denyingj haemh neix yaek cuengq ndeu gonq, gij sing hemq de youq ndaw bya rwenz. Mbouj geijlai nanz, vunzmbanj yaep ndeu song boux yaep ndeu sam boux fwngz ndeu gaem dienhdoengz、fwngz ndeu riuj daengqiq lienzdaemh madaengz giz cuengq denyingj.

Veiz Goh dwg vunz Bouxcuengh, de youq aendoih cuengq denyingj gyaez lwgminz souj maenh henzguek Gvangjsih Cungzcoj Si Ningzmingz Yen Swlang Yangh guh duicangj. 38 bi gvaqdaeuj, de caeuq godaih Veiz Cungh、 go’ngeih Veiz Gyangh vih doengh aen mbanj、hagdangz cungh- yoz、hagdangz siujyoz henzguek cuengqingj gak loh denyingj 1.4 fanh lai baez, byaij loh gyonj hwnjdaeuj miz baenz 26 fanh lai goengleix, leih daengz vunzlai 160 fanh lai vunzbaez.

38 bi youq henzguek byaij cuengq denyingj

Mboengqneix, gicej bae daengz aen ranzgaeuq geij beixnuengx ranz Veiz, aen bolingq mwhhaenx vih hawj vunzlai yawj denyingj ngaih di ndeu lij youq, gij gicaiz cuengq denyingj baijcuengq youq gok ciengz, gwnz faqciengz nem dwk gij giva daengx bi baenzlawz cuengq denyingj, seizlawz bae aen mbanj lawz、cuengq geijlai baez, raiz okdaeuj ndaej cingcing cujcuj, bi ndeu roengzdaeuj cuengq 300 baez baedauq.

Ngoenz haenx vaiqhaemh, Veiz Goh hai cimienhbau riengz lohbya gumzgamx ngutngeuj doxhwnj, haici cibgeij goengleix bae daengz Mbanj- canggih Ganh’ai Cunh. Miz boux- gagnyienh bang, Vangz Goh youh gvenq youh sug daeh gicaiz roengz ci、vut diuzcag、hoij mbaw muq denyingj、gaq cuengqingjgih……Mbanj ndaw rungh ndaw bya caemrwg yaepyet couh goenjhuhu lo.

Doenghbaez haujlai mbanj henz- guek mbouj doeng loh、mbouj doeng dienh, yawj baez denyingj ndeu caen mbouj ngaih saekdi. Veiz Goh lwnh gicej, sam beixnuengx de mwh lij iq cungj maij yawj denyingj, hoeng mwhhaenx ndaw mbanj mbouj miz denyingjyen, yawj baez denyingj ndeu aeu byaij lohbya 3 aen lai cungdaeuz.

Bi 1981, miz daxboh daiq, gyoengqde gizneix rom di ndeu gizhaenx ciq di ndeu, dauqdaej gyonj ndaej 3700 maenz cienz, cawx ma aen cuengqingjgih cuengq denyingj 16 hauzmij ndeu caeuq gij gicaiz boiqdauq de, gaplaeb baenz aendoih cuengq denyingj Swlang. Ndwn youq baihnaj aen ranzgaeuq, Veiz Cungh naeuz: “Dou gaijcauh gizneix baenz aen denyingjyen iq ndeu. Mbaw biuq ndeu hauz cienz ndeu, bouxdangbing caeuq bouxgeq gadog yawj couh mbouj aeu cienz. Moix baez cuengq denyingj gizneix bouxyawj cungj rim liux. 《Didau Can》《Doihyouzgiz Dietloh》《Saulinzsw》 doenghgij denyingj gaeuq neix lienzdaemh cuengq haujlai baez, vunzlai cungj yawj mbouj mbwq. ”

Bakdou ranz miz denyingjyen lo, neix bienqbaenz “saehgienhhung” hawj vunz dangdieg gingdoengh haujlai nanz. Veiz Gyangh lwnh gicej, doeklaeng vih hawj gij vunzlai youq mbanj bien’gyae mbouj yungh ok mbanj couh ndaej yawj denyingj, gyoengqde hainduj hawj denyingjyen bienqbaenz denyingjyen riuzdoengh, rag gicaiz haeuj cunh haeuj mbanj, dawz mbaw muq denyingj hoij baedaengz baihnaj ranz、raeblaeng ranz vunzmbanj.

Byamujgungh fwn doek le fatok gij heiqhom faex nywj. Bineix dwg Cungguek moq laebbaenz 70 hopbi, aendoih cuengq denyingj daegdaengq senjaeu《Daih nieb Laeb Guek》. Youq mwh cuengq cingqbienq gaxgonq, lij boqcuengq doenghgij benqdinj baenz- lawz ndaem ywdoj、gyaudoeng ancienz、gvansim gyaezhoh lwgnyez louz mbanj dem. Haemh haenx, 20 lai boux vunz Yauzcuz ndang daenj buhvaq minzcuz bonjfaenh doxcaez humx naengh youq yawj denyingj. Yienznaeuz gyanghaemh ndaw bya lij miz di nit ndeu, hoeng vunzlai sim gig raeuj.

Aen sim mwhnduj fugsaeh yinzminz mbouj gaij

Gij hongdawz gyaudoeng aendoih cuengq denyingj sam beixnuengx ranz Veiz daj mwhnduj dwg soujfuz dohlahgih daengz cisamloek, liux daengz cimienhbau; aen cuengqingj- gih aeu ma cuengq denyingj haenx daj aen gyauhbengih yiengh gaeuq naekcaem daengz aen suswgih dan yungh aen U banz ndeu couh cuengq ndaej haenx……Riengz hongdawz gyaudoeng、gicaiz cuengqingj ngoenz ndei gvaq ngoenz, gij denyingj mbouj doengz loh hix ngoenz lai gvaq ngoenz, lij boqcuengq haujlai benqdinj cien- monz senhconz gejgangj gvendaengz gij cwngcwz aen dangj、gohgi nungzyez、gij daezsingj cianh dem.

Aendoih cuengq denyingj lij cauxok gihvei hawj bouxcoz doxcomz gangj cingz dem. Youq gwnz haw Swlang Yangh, Veiz Yihbingz、Suh Cunhhoz song gvanbaz neix nyaengq youq dajleix gij seng’eiq ndaw bouq. “Dou yienzlaiz mbouj dox roxnaj. Bi 1988 aendoih cuengq denyingj bae aen mbanj de youq haenx cuengq denyingj, gou couh buet gvaqbae yawj. Baebae dauqdauq de couh bienqbaenz baz gou lo.” Veiz Yihbingz gangj hwnj gij cingzgingj bi haenx naj riunyumnyum, “Bi 2002 dou lingx mbaw cingq gezvwnh, seizneix gaenq miz song boux lwg lo.”

Boux siveij suhgi Cungzcoj Si naeuz, aendoih cuengq denyingj geij beixnuengx ranz Veiz yungh song aen ga bae dag gij byabya raemxraemx henzguek, hawj gij ndwenngoenz vwnzva cingsaenz vunzlai henzguek bienq lai haujlai, haigvangq diuz miengloh vunzlai henzguek rox cwngcwz guekgya、hag gisuz senhcin, hawj vunzlai henzguek engq lai gagrox bae hensouj henzguek、gyamaenh henzguek.

Bouxcienzboq vwnzva roengzrag henzguek

“Vunzlai daezok iugouz, dou cungj yungh daengxheij goengrengz bae guhdaengz.” Veiz Goh naeuz, “Miz boux coz ndeu ma ra gou gvaq, naeuz daxmeh de ninz youq gwnz congz doengh mbouj ndaej, hoeng siengj yawj denyingj dangqmaz. Ndigah gou couh baedaengz ranz de, cuengq baez denyingj ndeu hawj song ranz vunz.”

“Vih hawj vunzlai minzcuz vunz noix yawj denyingj gamjsouh engq laegdaeuq, aendoih cuengq denyingj ciengzseiz senjaeu doenghgij denyingj、gohbujben yungh Vahcuengh boiq yaem ma cuengq.” Cwng Yiconh boux boqyaem Vahcuengh Ningzmingz Yen Vwnzsinh Gvangjdengiz neix caeuq- faenh boiqyaem hawj 4 bouh yingjben gvaq. De lwnh gicej, banj Vahcuengh doengh benq denyingj《Ra Liuz Sanhcej》《Aensingz Gadog Lwed Lae Rim》《Yaengx Fwngz Hwnjdaeuj》vunzlai maij yawj raixcaix.

Seizneix gizdieg aendoih cuengq denyingj fugsaeh gaenq mbe daengz 29 aen mbanj (segih) 3 aen yangh cin henzguek. Veiz Gyangh lwnh gicej, geij bi neix daeuj, aendoih cuengq denyingj moix cuengq baez denyingj ndeu, cwngfuj couh bouj hawj 200 maenz cienz. Gij cienz cwngfuj bouj hawj haenx gihbwnj cungj yungh daeuj gya youz、co gvanghdez、coih ci doenghgij neix.

Aendoih cuengq denyingj sam beixnuengx ranz Veiz gveihmoz ngoenz hung gvaq ngoenz. Bi 2012 ndwen 9, aendoih cuengq denyingj Swlang caeuq Baicuzsoj Henzguek Swlang doxgap gaplaeb aendoih cuengq denyingj gyaez lwgminz souj maenh henzguek. Huz Yivaz boux gyaudaujyenz baicuzsoj neix naeuz, vih henhoh henzguek huzndei onj- dingh, gyoengqde ciengzseiz riengz aendoih cuengq denyingj haeuj mbanj bae, senhconz gij cwngcwz aen dangj, gejgangj faplwd fapgvi, doengzseiz miz cimdoiq boqcuengq doenghgij senh- conzben loh cianh, lumjbaenz《Gij Cihsiz Bingzciengz Lajmbanj Re Yaeuhlox》《Gij Fuengfap Lajmbanj Re Gvaijgai Mehmbwk Lwgnyez》 daengj.

Bi 2018 ndwen 8, Veiz Goh youq gwnz loh daj ndaw yienhsingz gaujbei yingjben dauqma bungzdaengz cihux naek, daengz seizneix lij caengz ndei liux. Veiz Goh naeuz, mboengq youq ndaw yihyen itcig miz vunzlai dwk denva cam:“Aen ga mwngz ndei caengz ne?” “Seizlawz dauqma cuengq denyingj?”…… Siengj daengz gyoengq beixnuengx baenzneix maq- muengh bonjfaenh ndei dauq, Veiz Goh roxnyinh ok geijlai rengz lae geijlai hanh cungj dij.

Seizneix, Veiz Goh daiq aen gasieng ndeu caeuq godaih、go’ngeih nem gyoengq bouxgagnyienh laebdaeb youq henzguek Cungguek Yeznanz haeuj mbanj cuengq denyingj. “Seizneix soujgih、dennauj haujlai dieg cungj miz lo, hoeng doiq boux- geq、mehmbwk、lwgnyez lajmbanj henzguek daeuj gangj, yawj denyingj vanzlij dwg gij fuengsik guh’angq gyoengqde nanz ndaej. Dou aeu guh bouxcienzboq vwnzva roengzrag henz- guek seizdaih moq, cijaeu vunzlai siengj yawj, couh itdingh genhciz roengzbae.” Veiz Goh naeuz.

(Liuz Veij Cauz Yihmingz Cinz Singhsingh raiz Dahdingz hoiz)