Daihngeih Daxdaiq

Roen rinbanj deng ndit dak ndaej gig ndat, lohdin byaij youq gwnz de, angjdin deng log ndaej gig in, gou yamq buet yamq diuq gvaq duenh roen rinbanj baihnaj bakdou ranz, cingq yaek diuq hwnj giemxdou seiz, sawqmwh ngeix hwnj oengjdin deng raemx cimq le youh bieg youh nyaeuq, daxmeh yawjraen le gou haengjdingh deng ndaq! Ndigah gip- muengz cienq ndang youq henz roen aeu naez dwk uet oengjdin caeuq gahengh ndaej uqveve, lumj mbouj roengz raemx gvaq nei, doeklaeng cij sam yamq baen guh song diuq buet haeuj bakdou bae.

“Ah Byauh! Mwngz buet bae gyawz gaeb majgvaij (Vahgun baihnamz gij coh duzgoep caeuq gungqsou, duzgoep heuhguh majgvaij naengheu, gungqsou heuhguh majgvaij naengraiz) gwnz bya lo?”

Daxdaiq naengh youq ndaw ding eijgvaengz cit iendoengzraemx, yawj- raen gou ret haeujdaeuj, fwngz ndeu gaem doengzien, fwngz ndeu dawz ceijdwkfeiz, haep da yawj gou, sing daemq cam.

Gou rox, gwnzbiengz boux ceiq gyaez gou couhdwg daxdaiq gou lo.

Bi’gvaq, daxmeh soengq gou caeuq dahnuengx daj Yanghgangj daengz ranz daiq, mizseiz cij gvaqdaeuj yawjyawj dou. Daxdaiq couh bienqbaenz boux caeuq dou ceiq doxgyaez lo.

Daxdaiq mbouj rox saw. Nienzco de cawx le fag hanz moq, miz bouxlaisaeh aeu raemxmaeg youq gwnz sij “ciq le rox boiz, caiq ciq couh vei” geij cih neix, daxdaiq yawj le najhoengz, mbouj gamj yungh, bingzseiz lij dawz fag hanz gaeuq “sam cik sam”. Cawx ndaej daehndaij moq、ndoengj moq, couh ra gou guh geiqhauh, daengq cijaeu veh miz aen gien ndeu roxnaeuz aen ronghndwen goz- gemgem couh baenz lo.

Daxdaiq cix rox ciengq golwgnyez, baez ciengq cungj hawj caezgya roxnyinh angqyangz, ciengqngwngngwng lumj roix makmbei nei, mbouj caenh mbouj sat, hawj vunz dawzyinx. Gyanghaemh miz ronghndwen (Vahgun baihnamz heuh ronghndwen guh “dahndwen”), daiq couh rox son dou ciengq: Lwgsai, mehbwk; gouz hwnj byoem, gouz maj heuj; byoem miz faghanz raez, heuj miz ×× hung…… Giz hoengq couh aeu gag ngeix lo, miz- mbangj naeuz heuj miz sienggonh hung, mizmbangj naeuz heuj miz faj dou hung, bouxgangj bouxdingq cungj riuhaha, sim- angq raixcaix.

(caengz sat)