Gij gingjsaek seiqhenz Mboq- hanq gyaeundei raixcaix, raemxmboq sawdikdik. Youq gizde riuz miz aen gojgaeq doengh vunz he.

Seizgonq, Mbanjdazan henz singz miz boux yahmaiq ndeu, gvan de singq Yangz caemhcaiq de hix laux lo, baenzneix caezgya couh heuh de guh Yangz Meh’auj. De mbouj miz lwg, boux dog gag youq, baengh dozfaiq gvaq ngoenz, saedceij gvaq ndaej gig haemzhoj.

Ngoenz ndeu, de bae ndaw singz cawx faiqyungz maranz, byaij gvaq aen gemh he, fwt raen gyang byozrum miz song aen gyaeqhanq hung. De couh siujsim yupyup gip hwnjdaeuj, cuengq roengz faiqyungz gyang lamz bae. Ma daengz ranz le, de dawz gyaeqhanq yawj bae yawj dauq, yied yawj yied raen dwggyaez. De ngeix, danghnaeuz song aen gyaeq neix faeg ndaej ok hanqlwg daeuj, ndaej caeuq bonjfaenh caeux haemh doxbuenx gig ndei ha. Cingqngamj duz gaeqmeh ranz de cingq faeg gyaeq, de couh dawz song aen gyaeqhanq neix cuengq haeuj ndaw rongzgaeq bae, hawj mehgaeq bang faeg.

Gvaq 18 ngoenz le, gaeqlwg laebdaeb dotbyak okdaeuj lo. Hoeng gyaeqhanq lij dinghdingh youq gyang rongzgaeq, mbouj miz maz doengh- danh. Yangz Meh’auj naemj, laemx- seiz byuk gyaeqhanq na lai, seizneix caengz daengz seizhaeuh ba. De dawz faiqyungz bau song aen gyaeq neix hwnjdaeuj, gyangngoenz dozfaiq cuengq youq ndaw rungj, gyanghaemh ninz le couh cuengq haeuj ndaw denz bae. Muengh le ngoenz dem ngoenz, daengz 49 ngoenz le, hanqlwg cungj- suenq ndaej faeg okdaeuj lo. De sim- angq dangqmaz, umj hwnj hanqlwg cup bae cup dauq. Doeklaeng mbouj- lwnh hwnz ngoenz de cungj haeujsim ganq ciengx song duz hanqlwg. Hanq- lwg lumj roxsoq nei, moix ngoenz cungj cienqlienh youq henz ndang de heuhvetvet, mbouj nyienh lizhai de. Hanqlwg ngoenz beij ngoenz maj- hung, bwnnyungz henjnomj menh- menh bienqbaenz bwn hausak. Lau hanqhau cungj youq ndaw ranz mbwq lai, Yangz Meh’auj moix ngoenz mbwnmomj couh daiq hanqhau bae daengz aen mboq iq laeng mbanj youz raemx guh’angq.

Ngoenz he banhaemh, sawqmwh mbwn ndaem deih raemh, rumzhaenq bongjfofo, ciepdwk couh doek fwnraq lo. Yangz Meh’auj seiqlengq bae ra hanqhau, lij sing hung heuh:“Hanq ha hanq, sou youq gyawz ha?” Daengx mbanj cungj ra caez lo, vanzlij ra mbouj raen.

De bae daengz henz mboq baez yawj, doq doeksaet yat lo. Aen mboq iq gaxgonq seizneix gaenq bienq- baenz le aen raengz laeg, miz ciengh lai gvangq, cij raen ndaw raengz raemxlangh fanfoedfoed. De geizheih muengh dwk ndaw raengz, gag naemj: Gangj mbouj dingh song duz hanq gou couh ndoj haeuj ndaw raemx bae luba! Baenzneix de couh hemq naeuz:“Hanq ha hanq, maranz lo.” Ngamq gangj sat, couh miz doiq hanq he daj gyang raemx ndonj okdaeuj lo, songde youz daengz henz hamq, bin hwnjdaeuj ai youq henz ndang Yangz Meh’auj. De aeu vengqbuh mad hawq gij raemx gwnz ndang duzhanq, doeklaeng song fwngz got dwk duzhanq, naeuz:“Lwg ha, sou majhung lo, rox gag ra dieg guh ranz lo, baenzneix couh mbouj yungh caiq riengz gou bae ranz gou lo. Hawj gou daet dinj bwnrieng sou ba, ngoenzlaeng ndei doxnyinh.” Hanq- hau bek fwed saenq rieng, ngaek- gyaeuj doengzeiq. De daet ndei le, hanqhau couh diuq roengz gyang raemx bae, yaephe couh mbouj raen lo.

Daj ngoenzhaenx hwnj, Yangz Meh’auj niemh song duz hanq niemh ndaej baenzbingh bae, mbouj geij nanz couh gvaqseiq lo. Ranznden gekleiz de mwngz ok ngaenz gou ok haeux, baenzneix bang de guh saehlaeng. Ngoenz oksang, gyoengq- vunz siengj ram gouhbenj de bae henz mboq haem, ngamq ram daengz buenq loh, sawqmwh fwjbumz gyuemluemz, rumzhaenq gienjloed, fwnraq bik ndaej vunz cengq mbouj hai da. Gouhbenj yied ram yied naek, sawq- mwh, “bada” sing ndeu, diuz faex ram gouhbenj goenq lo, gyoengqvunz couh baema ndoj fwn gonq.

Gvaq yaep he, rumz dingz lo, fwn sanq lo, duzdoengz venj youq gwnz mbwn, ndeiyawj raixcaix. Gouhbenj Yangz Meh’auj mbouj raen lo, gyoengqvunz menh ngeix, aiq dwg duzhanq daeuj coux aeu de bae lo. Baenzneix Gyoengqvunz couh haem gouh haizva Yangz Meh’auj, hwnq guh aen moh de.

Daj seizde hwnj, aen mboq laeng Mbanjdazan couh miz raemx mbouj sat lo, ndaej hawj cien moux naz dwkraemx, gij saedceij vunzmbanj gvaq ndaej vannupnup. Aenvih song duz hanq haenx, baenzneix gyoengq vunz mbanj couh heuh aen mboq neix guh “Mboqhanq”, gaij aen cohmbanj baenz “Mbanjmboqhanq”, aen gemh Yangz Meh’auj gip ndaej gyaeqhanq haenx heuhguh “Gemhhanq”, vih le gyo’mbaiq Yangz Meh’auj, lij youq henz mboq laeb bei cauh miuh dem, seizneix daengz ngoenzciet cungj miz vunz bae diemj yieng coemh ceijcienz hawj Yangz Meh’auj.

（Ouh Caijfangh hoiz）