“Vei! Veiz cujyin, yaek daengz cieng lo, bineix fat miz maz fukleih ha?” Ngamq yamq daengz bakdou bangunghsiz, couh dingqnyi gij sing Mehmanh hemqyatyat con haeuj rwz daeuj. Gou doq roxnyinh miz raq rumznit he ci haeuj hozlaeng, daengx ndang hwnj naenggaeq. Gou cengq- gengz riunyumj han de:“Lij miz ndwen dem, lingjdauj caengz cuengq vah ne. Daengz seizde caiq naeuz.” “Bibi fat dangz fat bingj, bineix yaek fat gij huq gauhgaep de.” De lumj doiq gou roengz mingling. Gou vaiqdi haidou haeuj ranz bae ndoj, mienx ndaej deng de heuxdawz mbouj cuengq.

Vunz naeuz bangunghsiz cujyin couh lumj dah lwgbawx ndaw ranz, baihgwnz deng lingjdauj guenj, baihlaj deng ginzcung coi. Dwgrengz sinhoj cungj mbouj lau, ceiq lau deng gwnheiq. Vahsug naeuz, naed haeux ciengx bak cungj vunz. Ndaw danhvei bak geijcib vunz, bouxlaux bouxcoz, bouxsai mehmbwk, gag boux gag gij ngah, gag boux gag cawjeiq, gvaq cieng gvaq ciet, faen saekdi fukleih, cawx yiengh maz daeuj fat cungj miz vunz miz yigen. Ndawde, Mehmanh ceiq hoj fugsaeh lo. Mwngz yawj, liz ndwencieng lij miz baenz ndwen, de couh gaenjriri damqcam lo. De baez oksing, couh yaek miz saeh lo.

Caengz naengh roengz eij, aen dienhvah gwnz daiz couh yiengj- ringring. Gou ciep hwnjdaeuj baez dingq, gij sing sepsatsat Mehmanh youh coq haeuj rwz daeuj:“Cujyin ha, gou naeuz, bineix bae laj mbanj cawx gaeqdoj, cawx moudoj ma gaj cij ndaej……” “Yienghneix……” Gou cingq caemciek baenzlawz han de, aen soujgih gou yiengj lo, gou ciq bak naeuz:“Doiq mbouj hwnj, soujgih gou yiengj lo. Caj lingjdauj gietdingh caiq lwnh mwngz nyi.” Naeuz sat, gou cuengqcag dienhvah.

Doeng vah sat, gou hix mbouj miz sim guhhong lo. Ngeix daengz cawx nienzhuq gienh saeh neix, ngeix daengz meh bakbyom deudik neix, gou roxnyinh gyaeuj dotyuegyueg.

Mehmanh heuhguh Maj Ginh- fung, aenvih doiq vunz haeksat, gyaez ndaq vunz baeh vunz, bakrem lumj lwgmanh, hawj bouxdingq lumj deng gwn lwgmanh nei coeghoz, miz vunz couh youq raeblaeng caegcaeg heuh de guh Mehmanh. Mehmanh ngamq rim 50 bi, vunz daemq ndang bizbwd, hoeng bakraeh singsep, gangj vah lumj doxceng. Ndaw danhvei baeznaengz fat maz doxgaiq, de cungj yiemz bwt yiemz daw, gaiq maz cungj yaek damzbyoedbyoed geij coenz.

Bi’gyai ndwencieng, ciuq laeh, yaek cawx di nienzhuq fat hawj yenzgungh gvaq cieng. Gou caeuq bangunghsiz song boux doengzsaeh bae daengz cauhsi, genj bae genj dauq, cawx ndaej sieng bingj ndeu, bau raetnae caeuq doengj youz- duhdoem ndeu.

Mehmanh byaij gvaqdaeuj, doengh fwngz fan yawj gij nienzhuq haenx, riunyaen naeuz:“Cit, didit doxgaiq neix, caen saejheiq.” Gou riunyumj naeuz:“Baihgwnz hanh fat 200 maenz cienz doxgaiq, mbouj dwg danhvei gag dingh ne.” “Cawx didit doxgaiq neix, mboujyawx fat 200 maenz, gag ranz gag cawx.” De youh ra vah naeuz. “Baihgwnz gvidingh mbouj hawj fat cienz.” De song da fanloekloek, mbwnjbak naeuz:“Cawx youz guh maz, seizneix ranz lawz mbouj miz youz gwn, gvaq cieng cawx faengx cawx noh mbouj baenz ha.” Gou ngauzngauz gyaeuj gag riumbw.

Bangunghsiz doengzsaeh Dah- yangh sing seuqsadsad riu naeuz:“Cejfung, gvaq cieng lij miz geij ngoenz dem, cawx noh ma baenzlawz louz ndaej, youz lij ndaej cuengq menhmenh gwn.” “Dwg ha, fat youz ceiq baenz.” “Miz doxgaiq fat couh ndaej.” Geij boux doengzsaeh daeuj lingx nienzhuq hix riengz vah haenh naeuz. Mehmanh raen mbouj miz vunz coengh de, doq riuj doxgaiq okbae doq gag damzbyoedbyoed:“Hw, gij vunz uk mou neix……” Gou miz di hozfoed, ngamq siengj hoiz de coenz vah he, Dahyangh ragdawz genbuh gou, coh gou yaepda dedded. Gou nyaenxheiq lo.

Gvaqlaeng, Mehmanh bae dangq- naj lingjdauj hoed gou, naeuz gou mbouj rox banhsaeh, cawx nienzhuq luenh cawx. Lingjdauj bihbingz gou, doeklaeng banh gij saeh neix yaek cam yenzgungh cij baenz, gaej gag guh cawjeiq, mienx ndaej daihgya mbouj habhoz. Gou gag haex raek ndaw dungx.

Bi daihngeih, gou cug fungh bangunghsiz bae cam. Dingzlai yenz- gungh cungj siengj aeu youzduhdoem. Cam daengz Mehmanh, de bak riu naeng mbouj riu naeuz：“Cawz le mbouj cawx youz, sou cawx maz cungj ndaej.” Gou hozraez cam de：“Mwngz haengj aeu maz?” De hamx- hawz naeuz, doxgaiq hab gvaq cieng couh ndaej. “Cam mwngz cix mbouj naeuz beg, cawx ma mwngz youh damzbyoedbyoed.” Gou hozfoed raix- caix, hoeng hix mbouj gamj fatheiq. Baenzlawz guh?

Gou fwt ngeix daengz bi’gvaq Mehmanh yiemz dou cawx youz. Yienghneix, gou heuh Dahyangh bae cawx haeuxsan. Baez fat huq, haujlai vunz siengj aeu youzduhdoem, hoeng, raen gij haeuxsan baenz naed baenz naed, ronghrikrik, hausaksak, hix habhoz angqfwngfwng riuj baema lo. Dauq dwg Mehmanh mbwnjbak naeuz:“Caen mbouj rox sou baenzlawz naemj, gvaq cieng mbouj cawx nienz- huq, cawx haeux guh maz. Ranz lawz seizneix mbouj miz haeux gwn.” Gvaqlaeng, gou youh ngaiz lingjdauj bihbingz, naeuz gou duetliz ginzcung, banh di saeh neix cungj hawj vunz miz yigen.

Ndwencieng youh yaek daengz lo. Baenzlawz guh cij ndaej mbouj hawj Mehmanh oksing ne? Baezneix, gou rox gvai lo, bae cam lingjdauj gonq. Lingjdauj gig mbouj naihfanz naeuz, gaej miz maz saeh cungj ra lingjdauj, di saeh iq neix, bangunghsiz dingh couh ndaej lo. Lingjdauj raen gou veiznanz, youh vah’unq naeuz, cam daihgya, vunzlai haengj aeu maz couh cawx maz.

Gou bi lawz mbouj cam gvaq vunzlai? Bi lawz mbouj deng Meh- manh youh loed youh gauq. Gou caen daemlaemz daemduq lo.

Caen dwg hozhawq raen raemx- mboq. Haethaenx, daj song vanj faenh ndawde gou miz cawjeiq lo. Haetromh, gou soengq daeglwg doeg sam nienzgaep gou bae hagdangz, haeuj aen bouqfaenj bae gwn faenj. Gou naeuz gwn faenjcaq, daeglwg naeuz gwn faenjcawjdang. Euq bae euq dauq, song boux cungj mbouj dox- nyiengh, doeklaeng, gou gwn faenjcaq, daeglwg gwn faenjcawjdang. Deng ha, mbouj dwg cawx yienghyiengh cungj mbouj habhoz mwngz ha, gou hix- naengz cawx song cungj, gag boux gag bauq aeu.

Dahraix, yiengh guhfap neix caezgya cungj angqvauvau. Gig vaiq, Dahyangh sou aeu aen biuj bauqmingz ma hawj gou. Gou baez yawj, sim’onj lo. Dingz vunz he aeu youz, dingz vunz he aeu haeux. Cingq hab sim’eiq gou. Mehmanh ne, de caeuq geij boux lingjdauj bauq aeu doxdoengz, cungj dwg aeu haeuxsan. Gou naemj, mbatneix, gou yawj meh neix lij miz maz vah gangj dem.

Daj cauhsi cawx huq ma le, gou daek’eiq fwngfwng heuh daihgya daeuj lingx nienzhuq. Gyoengq yenz- gungh gag boux gag riuj gij nienzhuq bonjfaenh gaxgonq bauq aeu haenx, angqvauvau baema lo. Raen daihgya hozhaih hab’eiq, gou hix simhai lumj dujva. Mehmanh hix daeuj riuj daeh haeuxsan de, yienznaeuz mbouj oksing lo, hoeng fajnaj cix lumj deng mwi dwk nei saepsaengsaeng. Ndaw hoz gou youh lumj gyan naed gyu he, ndaengqndadndad. Mbouj rox ndaw dungx de youh yaek bienq duznon lawz okdaeuj?

Fat sat nienzhuq, gou byaij ma bangunghsiz, gvaq henz bangunghsiz Mehmanh, raen ndawde ndwn miz geij boux vunz, humx baenz gvaengx he, ngoemjgyaeuj gangj vahboih sisi sebseb. Gou nyaenx mbouj ndaej dingz din roengzdaeuj, dingqdingq gyoengqde youh nam maz. Caenh dingqnyi Mehmanh riunyaen naeuz:“Raeuz deng catsaij lo. Lingjdauj cing gvaq duznyaen bae. Heuh raeuz bauqmingz aeu haeux le, gyoengqde cix bauq aeu youz. Youz bengz gvaq haeux. Guh maz saeh raeuz cungj mbouj gvai gvaq lingjdauj, hw……” Geij boux vunz haenx hix doeksaet yat, mwgnz coenz gou coenz damz- byoedbyoed. “Dwg yienghneix ha!” “Gwnvi lo!” “Gvaqmauh lo.” Meh- manh yukyon naeuz:“Raeuz bae baihgwnz gauq gyoengqde.”

“Mboujgvaq……” Dah sau he mbwtmbwt mbwjmbwj gangj, siujsim riri naeuz, “Gou ndaejnyi naeuz, cujyin caeuq geij boux lingjdauj caemh dwg aeu haeuxsan hane.”

“Mwngz rox maz!” Mehmanh hozgaek swenj coenz he, daihgya doq caemrwg roengzdaeuj, doxcim myoeg- myoeg.