Ndwen 11 ngoenz 26, Cungzcoj Si youq aen cungsim yisuz vwnzva banh comzyienj gij cingzgoj feihvuzciz vwnzva yizcanj. Youq mwh yienjheiq, Cungzcoj Si roengzsim genjleh buek feihvuzciz vwnzva yizcanj hanghmoeg gig miz daiqbiujsingq ndeu, yungh daizheiq guh comzyienj. 《Mbanjcuengh Ciengq Vaizcin》《Geizlaenz Hawj Fuk》《Gienz Byaraiz》《Aen Loqsiengj Lai Yiengh Bouxcuengh》 daengj 12 aen feihvuzciz vwnzva yizcanj cozbinj doxlwnz hwnj daiz yienj, yienj ciengz heiq ndeiyawj ndeu hawj bouxyawj yienhciengz yawj. Baez yienjheiq neix hawj vunzlai depgyawj roxnyinh gij yinxdaeuz feihvuzciz vwnzva yizcanj, caenh’itbouh gikfat gij yiedcingz gyoengq vunz fatyiengz conzdungj vwnzva, gyagiengz le gagrox baujhoh vwnzva yizcanj, cauh’ok le gij heiq- faenh ndei daengx biengz gvansim、vatcimh、baujhoh caeuq swnjcienz vwnzva yizcanj.

Geij bi neix daeuj, Cungzcoj Si aeu doicaenh swnjcienz baujhoh minzcuz vwnzva dangguh gij neiyungz youqgaenj caeuq yinvu hwnjguh dieg guhyiengh minzcuz doxgiet cinbu daeuj baijbouh, gyalai ligdoh baujhoh caeuq swnjcienz feihvuzciz vwnzva yizcanj, gyalai vatcimh caeuq yungh feihvuzciz vwnzva yizcanj, guekgya gaep caeuq swcigih gaep feihvuzciz vwnzva yizcanj baujhoh mingzloeg hanghmoeg cungj miz cingzcik ndei. Seizneix, daengx si gungh miz seiqgyaiq gaep feihvuzciz vwnzva yizcanj baujhoh mingzloeg hanghmoeg aen ndeu, guekgya gaep feihvuzciz vwnzva yizcanj baujhoh mingzloeg hanghmoeg aen ndeu, swcigih gaep feihvuzciz vwnzva yizcanj baujhoh mingzloeg hanghmoeg 24 aen, si gaep feihvuzciz vwnzva yizcanj baujhoh mingzloeg hanghmoeg 64 aen, yienh gaep feihvuzciz vwnzva yizcanj baujhoh mingzloeg 125 aen, hwnjguh aen dijhi mingzloeg ngoenz ndei gvaq ngoenz, guhbaenz aen dijhi baujhoh mingzloeg bauhamz seiqgyaiq gaep、guekgya gaep、swcigih gaep、si gaep、yienh gaep daengj haj aen daengjgaep. Daengx si gyoebsuenq bued cienz 367 fanh maenz ngaenzcienz cienhangh youq 7 aen yienh (si、gih) guh baenz ranz guhyiengh、dieggoek swnjcienz baujhoh langhbaij swcigih gaep feihvuzciz vwnzva yizcanj baujhoh mingzloeg hanghmoeg 33 aen, gungh miz 24 boux bouxswnjcienz swcigih gaep feihvuzciz vwnzva yizcanj daiq- biujsingq hanghmoeg.

(Lungz Yenyingh)