“Mwngz gamj?” Gou hix deng de gik ndaej huj lo:“Daiq gou mbouj ndaq mwngz lai guenj saeh cixbah!”

Aulungzgveiz mbouj oksing lo, dawz fagcamx caeuq duz bya hung, ngaemgyaeuj con gvaq ndoeng- faexnganx, mbouj raen gij ngaeuz de lo.

Lungzgveiz Lungzgveiz, caen mbouj najgaej;

Dingj gyaeuj maj nywj, gwnz ga hwnj myaex;

Mbouj miz ranz youq, gouz you doz yietnaiq;

Mbouj miz maz hong guh, bang vunz langh cwxvaiz.

Doengzdoih ciengqnga’nga, souj go neix cienmonz gikbyaep Aulungz- gveiz, mbouj rox byawz bien, daengx mbanj lwgnyez cungj rox ciengq, daj souj go neix ndaej rox gij yienghceij caeuq ndwenngoenz Aulungzgveiz lo, byoemgyaeuj de luenhbyubbyub beij gij cazrum lij nyapnyaj, gwnz ga de gij biuj hung naeuh haenx caen lumj hwnj myaex nei.

Aulungzgveiz mbouj miz ranz, couh youq fungh ranz iq daemq laeng miuhsaenzvangz, bingzciengz couh baengh bang vunz guh di hong mbaeu, langhlangh vaiz yiengz ndaej gwn saek donq song donq, ndigah gyoengq lwgnyez youq gyae baez raen de, couh rox bekfwngz, coh de ngon song sam coenz, mizseiz cingqngamj bungz de mbouj angq, de couh maeuq roengzbae cang guh yaek gip rin daeuj haep lwgnyez, gyoengq lwgnyez ciengz lau ndaej got gyaeuj couh buetdeuz.

Cijmiz de miz yinxdaeuz seiz, mboujdan mbouj hozndat, dauqfanj rox riunyumnyum riengz gyoengq lwgnyez caez ciengq, de youq baihnaj byaij, lwgnyez couh youq baihlaeng riengz, doq bekfwngz doq ciengq, gyoengq lwgnyez yied comz yied lai, de sangset youq baihnaj daiq roen, couh lumj bouxciengq dazyinx bang bing nei, byaijbyaij ciengqciengq. Fwtfat de daengx din, doq gungj hwet maeuq roengz gip gaiq cien hwnjdaeuj cienq ndang couh yaek vut, seizde gyoengq lwgnyez doeksaet ndaej sanq caez, buetdeuz coh seiqlengq, lumj- baenz gyoengq nengznyaen gyoebcomz youq gwnz ndang duz bya dai nei, sing hemq sing riu luenhnyagnyag.

Haxbaenh hix mbouj rox dwg byawz youh youq ndaw dah doiq Aulungzgveiz ciengq hwnjdaeuj lo, cijaeu miz boux he haibak, cibgeij boux lwgnyez couh rox riengzdwk ciengq, gou hix sing hung ciengq, caemhcaiq youq ndaw raemx mbouj dingz bongh hwnj, song cik fwngz luenh mboengj raemx, angqyangz fouzbeij, lumj gou liuh ndaej daengz nei, cij raen Aulungzgveiz najndaem cienq ndang youh byaij doxdauq daengz henz dah daeuj, fwngzgvaz yaengx sang fagcamx, guh ok gij yiengh yaek gveng coh dou, sing ciengq go fwt daengx roengzdaeuj, caezgya deng haep ndaej cagaenj coh gyang dah youz bae.

“Ai! Sou yawj, gij haenx dwg maz?”

Gou ndaejnyi Aulungzgveiz youq gwnz haenzdah hemq, baenq gyaeuj dauq baez yawj, cij raen de aeu fagcamx vix gyang dah baihnaj dou, daemh din sing saenz dwk hemq:“Duz ngwzboengz he! Duz ngwzboengz he!” Dingqnyi miz ngwz, gou doq deng haep ngawh lo, vuengmuengz youz doxdauq coh haenzdah.

“Aiya! Duz ngwzboengz he……” Aulungzgveiz lij hemq.

(caengz sat)