Daeglwg Siujgozging ndaejnyi le fanj baeh de naeuz:“Dauq bienq lwgnyez la? Gvaq 60 bi vunzlaux ngoenznaengz lij buet mbouj dingz, ndok gang nyinz diet cungj saet mbouj ndaej geij ngoenz ne.”

Daegnuengx baez dingq doq hozndat, bek aek naeuz:“Gou lij ndaej gwn ak guh, lix mbouj gvaq bak bi dai cungj da mbouj haep!”

Gij vah neix Dagozging couh mbouj naeuz lansai nyi, cungj lau bohlwg de doxceng mbouj dingz. De fug daegnuengx laux lo ukgyaeuj vanzlij siengj nyaenx hung. Duiyouh le lij ndaej guh baenz saeh hung, de caen liuh mbouj daengz. Dang gvaq lingjdauj caeuq mbouj dang gvaq lingjdauj caen mbouj doxdoengz! De ciengzseiz caeuq gyoengqdoih gangj- riu, danghnaeuz ukgyaeuj lij singj, ngoenznaengz lij ndaej okrog bae byaij yawj, gyaeu ndaej 80 lai bi hix baenz lo, bouxboux cungj gyaeu ndaej bak geij bi bae, yaek beuj mbangj vunz bae gwnz ronghndwen youq lo.

Daegnuengx gyoengqde ngoenz- naengz dauqcawq buet, cimh vunz gapbang, ra ngaenz cauh laeb aen swnghdai nungzcangz. Hawj de daj denva ngoenz beij ngoenz lai, lumjbaenz gij saeh neix de caemh miz faenh ndeu, mbouj ngoenzngoenz gangj cungj lau de lumz bae. Seizneix ngaenz nyaenx ndei cimh ma? Miz coenzvah laux ndeu yienghneix gangj, haexvaiz hawq le nengznyaen mbouj daeuj comz lo. Duiyouh le cij bae cimh vunz ciq ngaenz, beij hwnj mbwn vanzlij nanz ho!

Ngoenzneix, Dagozging caeuq gyoengqdoih baiz heiq, daegnuengx gyoengqdoih daj denva daeuj, heuh de sikhaek ganj bae yienh yihyen, daegnuengx youq gizde ciengj- gouq……

Siujgozging bae cimh boux gencuz gunghswh lauxbanj ciq ngaenz. Boux lauxbanj neix doenghbaez youq lajfwngz de, cibgeij bi gaxgonq ngamq bae guh seng’eiq seiz haenq nanz, de caenhrengz coengh mbouj noix. Ndwen gaxgonq, de cam boux laux- banj neix ciq ngaenz guh swnghdai nungzcangz, lauxbanj naeuz caenh- rengz coengh. Hoeng gvaqlaeng de daj denva cam mbat caiq mbat, lauxbanj caenh rox gangj caenhrengz coengh, cix mbouj miz gangj lai coenz vah lo. Gyangngoenz raennaj seiz, lauxbanj haibak doq dapwngq hawj 500 fanh maenz gonq, lij miz geij bak fanh maenz gvaqlaeng le caiq menhmenh hawj. Dingq lauxbanj yienghneix gangj, de simdoengh dwk raemxda yaek doek. Daj lauxbanj ranzbanh- goeng okdaeuj le de lumz aen daeh, cienq ndang ma aeu daeh couh dingqnyi lauxbanj daj denva, baeh de ukgyaeuj luenh lo, duiyouh le bienq- baenz lumj sam bi lwgnyez nei…… Gij vah neix lumj aen daengvenj doek roengzdaeuj, dub deng gwnz dingj gyaeuj de.

Dagozging ganj daengz yienh yihyen, Siujgozging ngamq ciengjgouq gvaqdaeuj lo, ninz youq gwnz congz lij mauh. Gyoengqdoih Siujgozging cungj youq. Seizneix raen gyoengqde, de ndawsim roxnyinh boiqfug gyoengqde. Geij boux vunz neix cungj dang gvaq lingjdauj, duiyouh le mbouj you gwn mbouj you daenj, seizneix ngoenz- naengz lij bae buet hwnj buet roengz vihmaz ne? Yaek loq dang lauxbanj fatcaiz ha? Roxnaeuz mbouj fug laux cij guh hawj vunz yawj swhgeij miz bonjsaeh? Danghnaeuz yienghneix siengj couhdwg boux dungxgaeb bae yawj goeng ginhswj lo. Gyoengqde dajsuenq guh aen swnghdai nungz- cangz, danghnaeuz guh baenz lo, ceiqgonq ik cienz mbanj 2000 lai beixnuengx, gij saeh neix ndaej aeu ngaenz daeuj suenq ma?

Daeglwg ganj daengz, Siujgozging singj lo. Daeglwg gvaiq daxboh naeuz:“Boh ha, mwngz ngoenznaengz luenh buet guh maz nyaenx lai? Ngaenz duiyouh mwngz lingx ndaej geij bi lo, danghnaeuz mwngz doq yiengh- neix bae lo, mwngz caem mbouj caem ya?”

Dagozging dacaengz daeglwg, yiemzsuk naeuz:“Mbouj ndaej yiengh- neix naeuz boh mwngz. De miz gij siengjfap swhgeij, de mbouj dwg guh saeh ngawz.”

Daeglwg mbouj fug, ok sing hung naeuz:“Duiyouh le lij ngvanh guh maz saeh hung, gijneix mbouj dwg yied laux yied uk luenh ma?”

Siujgozging ngauz gyaeuj doiq daeglwg naeuz:“Gak vunz gak miz ceiqheiq. Miz mbangj vunz guh mbouj baenz gienh saeh he, laux le cungj youq mbouj sim’an……”

Raen daegnuengx raemxda rih okdaeuj, Dagozging gaem fajfwngz daegnuengx heuh geij sing. Daeg- nuengx cij lae raemxda, mbouj ndaej hai da. De uet gij raemxda daeg- nuengx, yungh sing hung naeuz:“Mwngz ndeindei yietnaiq ba, deq hingh ndei le, couh ndaej bae guh gij saeh mwngz siengj guh lo. Gyoengq doih mwngz lij deq mwngz okbae bw!” De yienghneix gangj le, doq nyaenx mbouj ndaej hix raemxda doek- byoegbyoeg……

(sat)