“Fwenmwnzlai”youh heuhguh“fwenmwnzlwz”, dwg cungj fwenbiengz ndeu, youz Cunghsanh Yen Liengjanh Yauzcuz Yangh gyoengq vunz Yauzcuz youq dieg ndaw bya youq nanz le cauh’ok; dwg cungj fwen gyoengq beixnuengx Yauzcuz gag miz, miz daegsaek minzcuz、gag cauh、lizsij noengzna dangqmaz, dwg gaiq bauj vwnzva Cunghsanh ndeu. Ciengzbaez canghfwen eu“fwenmwnzlai”ne cungj aeu“mwnzlai”song cih neix heijdaeuz, neix couh heuhguh“fwenmwnzlai”. Fwenmwnzlai daihgaiq faenh baenz fwenyoux、fwensaedceij、fwenguhhong、fwenhengzlaex caeuq fwengienqvunz daengj geij cungj hung.

Aenvih Yauzcuz mbouj miz saw swhgeij, neix couh aeu Sawgun geiq vah fwen; hainduj duenh haenx aeu Vahyauz eu, daengzlaeng aenvih Cunghsanh dangdieg vunz gangj vahdoj Cunghsanh(Begvah doj) lai lai, vihliux hawj bouxdingq lai ngaih rox fwenmwnzlai, hix vihliux doigvangq caeuq swnjcienz, seizneix aeu Vahcunghsanh daeuj eu lai.

Bi 2010, Cunghsanh fwenmwnzlai ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.

Fwenmwnzlai sing ndeidingq dangqmaz, vunzlai dangdieg gyaezmaij. Hwngfat geij bak bi daeuj, daengx yangh mbanjmbanj cungj miz canghfwen fwenmwnzlai. Danhseih, miz haujlai vwndiz mbouj ndei ndawbiengz henhoh caeuq swnjcienz fwenmwnzlai, swnjcienz yaugoj lai yaez gvaq gaxgonq bae, yienghneix baenaj mbouj daih ndei lo.

Seizneix youq Liengjanh Yauzcuz Yangh, doenghboux canghfwen geq rox eu fwenmwnzlai sugsed haenx mbouj miz geijlai boux lo, geij bi gaxgonq Mbanjsahbingz lij miz 10 lai boux canghfwen eu fwenmwnzlai, seizneix, aen mbanj neix cij miz 7 boux canghfwen.

Vihliux swnjcienz cungj vwnzva yizcanj nei, Liengjanh Yauzcuz Yangh youq dangdieg cunghyoz siujyoz hagdangz banh ban hag fwenmwnzlai, daegdaengq cingj doenghboux canghfwen gingniemh fungfouq haenx daeuj son’gyauq, son ndei haujlai canghfwen oiq coz. Gyoengq canghfwen coz neix dawz fwenmwnzlai daiq daengz daizheiq lai gvangq bae. 2018 nienz 1 nyied, Liengjanh Minzcuz Cunghyoz gyoengq hagseng bae daengz Aumwnz yienj《Fwenmwnzlai》Yauzcuz, angqhoh Aumwnz ndaej dauq guekcoj 18 bi. Gyoengqde yienj ndaej ndeiyawj dangqmaz, bouxyawj bak haenh mbouj daengx, neix hix hawj haujlai vunz roxnaj fwenmwnzlai.