Mbanjrunghgyaeng miz bak lai hoh, seiqhenz cungj dwg bya sang, cij miz ga roen he doeng bae baihrog. Gizneix bya sang rungh laeg, vunz- mbanj ukgyaeuj siengj mbouj gyae, miz mbouj noix saeh cungj gaen mbouj hwnj seizdaih.

Gyoengq vunz Mbanjrungh- gyaeng bouxboux simsoh lauxsaed, miz maz saeh cungj daengx mbanj vunz doxbang doxfuz. Ciuq gij vah gyoengqde naeuz “gyoengqde liz vunz doih gyae, ndaw mbanj mbouj doxgyaez heih deng vunz haep, deng vunz haep hix mbouj miz byawz bang, ndigah caezgya aeu doxgiet baenz gaemz ndeu, yienghneix cij mbouj you vunz haep, mbouj lau vunz yaeuh.”

Bak mbanj miz go rungz ndeu, go rungz neix goek hung lumj aen mbung nei, aeu miz seiq haj boux vunzhung fwngz gaem fwngz cij ndaej got gvaqdaeuj. Faex sang miz sam ciengh baedauq, nye deih mbaw mwn, laj faex raemhrwdrwd, bi daengz seiz- hwngq, vunzmbanj gwn caeuz gvaq le, cungj gyaez doxcomz daengz laj gorungz daeuj, roxnaeuz dwkbej guhcaemz, roxnaeuz gangjgoj guh- angq, laj gorungz haemhhaemh nauhyied daengz byonghhwnz.

Seizhah, doenghgo doenghduz cungj maj ndaej miz sing miz saek, haemh haeuj laep, duzdaek heuh, duznengz swenj, gyangdoengh cungj miz sing hemq mbouj dingz. Boh Daegcanh、Boh Daeglingj、Boh Dahcah、Meh Dahsiu hix daengz laj gorungz daeuj lo, gyoengqde boux ciengj boux lwnh gij saeh laih ngaeuz ngamq cij rox haenx.

Meh Dahsiu naeuz:“Seizneix boux miz soujgih, mbouj cij ndaej dwk dienhvah, lij ndaej yawjraen boux caeuq raeuz gangjgoj haenx dem bw.”

Boh Daegcanh naeuz:“Caen dahraix lwi? Danghnaeuz yienghneix, raeuz naemj raen dah lwgsau lawz raeuz couh hai soujgih daeuj yawj couh ndaej lo.”

Boh Daeglingj naeuz:“Bak gangj yungzheih, mbanj raeuz lij mbouj doeng saenqhauh, sou lij guh fangz- hwnz bae ba.”

Boh Dahcah naeuz:“Danghnaeuz saenqhauh doeng daengz mbanj raeuz, gou hix cawx aen soujgih ndeu, maij caeuq byawz doxraen couh ra byawz, maij caeuq byawz gangjgoj couh ra byawz, geijlai ndei ha.”

Haemhhaenx, gyoengqde yied gangj yied mizyinx, gangj ndaej gig hwnz cij sanq maranz.

Ngoenz ndeu, ndaw mbanj daeuj geij boux hek, gyoengqde naeuz yaek youq gwnz dingjbya guh aen saenq- hauh gihcan ndeu. Maz heuhguh gihcan, vunzmbauj mbouj rox, boux hek he dawz mbaw doz ndeu okdaeuj gej naeuz:“Couhdwg youq gwnz dingj- bya aeu diet guh aen gyaq yienghneix , aen gyaq neix ndaej sou saenqhauh, hix ndaej dawz saenqhauh sanq okbae, an aen gihcan neix le, mbanj raeuz couh miz saenqhauh, gij mbanj giz gaenh hix cungj miz saenqhauq lo.”

Miz mbouj miz saenqhauh, doiq haujlai vunz mbanj daeuj gangj mbouj youqgaenj, gyoengqde ciuhcoj roengz- daeuj couh mbouj rox maz saenqhauh mbouj saenqhauh, saedceij ciuqyiengh ngoenzngoenz gvaq.

Lingh boux hek he gej naeuz:“Miz saenqhauh le, raeuz couh ndaej yungh dienhvah、ndaej yungh soujgih, couh ndaej miz densi yawj lo.”

Dingq daengz gijneix, vunz- mbanj simdoengh lo, miz vunz daiq gyoengq bouxhek bae ra goeng daeuz- mbanj.

Goeng daeuzmbanj dwg goenggeq ndaej 60 lai bi ndeu, goeng neix youq ndaw mbanj gig miznaj, guh maz saeh cungj dwg naemj sam naemj seiq, yousim raixcaix. An gihcan dwg gienh saeh hung ndeu, de boux ndeu mbouj ndaej guhcawj, couh naeuz: “Gou caeuq vunzmbanj doxyaeng doxyaeng gonq, baenzlawz yiengh caiq naeuz sou nyi ba.”

Gyoengq hek lizbae le, vunz- mbanj couh hemq hwnjdaeuj lo.

Miz boux naeuz:“Youq gwnz dingjbya bien mbanj raeuz an ndaek doxgaiq neix, doiq mbanj raeuz ndei mbouj ndei ne? Aeu ndeindei naemj- naemj.”

Miz vunz mbanj he naeuz:“Ndaek doxgaiq neix, ndaej sou saenqhauh gvaqdaeuj, youh ndaej sanq saenq- hauh okbae, baenzlawz gangj doiq ndangdaej bouxvunz cungj mbouj ndei, raeuz daihdaih youq neix gwn youq, bingzan fouzsaeh, vihliux an ndaek doxgaiq neix, haih daengx mbanj vunz youq mbouj onj gwn mbouj van, mbouj an cixbah.”

Gyoengq vunzmbanj mwngz gangj neix gou gangj de, doeklaeng giet- dingh mbouj hawj youq gwn bya an gihcan lo.

Gyoengq bouxhek naeuz mbouj an couh mbouj an ba, bae mbanj wnq an hix ndaej.

Gyoengq bouxhek daengz Mbanj- cungqgyang bae an gihcan, gihcan an baenz ngoenz haenx, Mbanj- cungqgyang gaj mou gaj gaeq daeuj goenghoh, vunzmbanj ciengqgo diuq- foux youh cuengq bauq, angqyangz lumj gvaq ciet nei.

Mbanjcungqgyang youq Mbanj- runghgyaeng baihgvaz, doxliz sam goengleix, cibgeij goengq bya hung gek dwk, saenqhauh goq mbouj daengz Mbanjrunghgyaeng, gyoengq vunz ndaw mbanj miz saeh yaek dwk dienhvah cijndei bae daengz giz gaenh Mbanjcungqgyang cij miz saenqhauh.

Youh daengz bi seizhah ndeu, laj gorungz Mbanjrunghgyaeng boux daeuj langhliengz gangjgoj youh nauhyied hwnjdaeuj.

Meh Dahsiu naeuz:“Sou rox lwi, seizneix miz soujgih le, ndaej youq gwnz soujgih yawj densi yawj denyingj yawj sinhvwnz, lij ndaej hag ciengqgo dem.”

Boh Daegcanh naeuz:“Gou cij maij guhfwen, hai soujgih le couh ndaej youq gwnz soujgih caeuq lwgsau doiq fwen, seiznit ninz youq laj denz lij ndaej caeuq lwgsau gangjgoj, yinx lai bw.”

Boh Daeglingj naeuz:“Gou lau sou miz soujgih le, cij maez caeuq lwgsau guhfwen gangjgoj, lumz meh- yah gaeuq sou bae bw.”

Boh Dahcah naeuz:“Sou dwg duzma muengh raem yiengz, saenq- hauh cungj mbouj miz, gangj baenzlai vah miz ma yungh, sou muengh ba.”

Dingq daengz Boh Dahcah yienghneix baez gangj, geij boux couh caemrwg roengzdaeuj, mbouj caiq miz vah.

Ngoenz ndeu, youh miz bang hek he daeuj daengz Mbanjrunghgyaeng, naeuz yaek youq gwnz dingjbya bien mbanj an aen saenqhauh gihcan ndeu, baezneix mbouj deq gyoengqde gej naeuz, vunzmbanj hix rox maz dwg gihcan lo.

Baezgonq vunz daeuj an gihcan vunzlai mbouj hawj an, mbanj vunz miz saenqhauh mbanj raeuz mbouj miz, gyoengq vunzmbanj miz di ienq lo, seizneix miz vunz youh daeuj an gihcan, baenzlawz hix mbouj ndaej cuengq gvaqbae cij baenz.

Lingh bouxhek he gej naeuz:“Seizneix ca mbouj geijlai mbanj- mbanj cungj doeng saenqhauh lo, an gihcan youq mbanj sou, saenqhauh onjdingh, mbouj you yaep miz saenqhauh yaep mbouj miz, ndeicawq lailai bw.”

Dingq daengz gijneix, vunz mbanj simdoengh lo, miz vunz couh daiq gyoengq bouxhek bae ra goeng daeuzmbanj.

Goeng daeuzmbanj naeuz:“An gihcan dwg gienh saeh hung ndeu, gou boux ndeu mbouj ndaej guhcawj, caj gou caeuq vunzmbanj doxyaeng dox- yaeng, baenzlawz yiengh caiq naeuz sou nyi ba.”

Gyoengq hek dauqbae le, vunz- mbanj couh hemq hwnjdaeuj lo.

Miz boux naeuz:“Ndaek doxgaiq neix itdingh aeu an, mbouj an, ciuh lwg ciuh lan rox gvaiq raeuz bw.”

Miz boux naeuz:“Vunz mbouj vih miz gwn, hwnq caeux guh gijmaz! An gihcan fat saenqhauh, gyoengqde miz ngaenz souhaeuj, raeuz mbouj ndaej hawj gyoengqde begbeg an youq dingjbya, aeu sou ngaenz cij ndaej.”

Deng, vunzmbanj cungj nyinh- naeuz, an couh an, aeu sou ngaenz. Daihgya doxyaeng le, gietdingh heuh aeu 30 fanh maenz ngaenz cij ndaej an.

Bouxhek hoiz vah naeuz, an gihcan aeu ciemq dieg, ciuq gvidingh, it aen gihcan cij bouj hawj fanh lai maenz, miz lengq aen gihcan hix mbouj yungh bouj ngaenz.

Goeng daeuzmbanj naeuz baenz- lawz guh, gyoengq vunzmbanj naeuz:“30 fanh mbouj ndaej hix yaek aeu 20 fanh, mbouj ndaej ngaenz couh mbouj hawj an lo.”

Gyoengq bouxhek naeuz mbouj an couh mbouj an ba, bae mbanj wnq an hix ndaej.

Gyoengq bouxhek daengz Mbanj- runghrag bae an gihcan lo. Gihcan an baenz ngoenz haenx, gyoengq vunz Mbanjrunghrag gaj mou gaj gaeq daeuj goenghoh, ciengqgo diuqfoux youh remj bauq, angqyangz lumj gvaq ciet nei.

Mbanjrunghrag youq Mbanj- runghgyaeng baihswix, doxliz sam goengleix, cib geij goengq bya hung gek dwk, saenqhauh goq mbouj daengz Mbanjrunghgyaeng, gyoengq vunz ndaw mbanj miz saeh yaek dwk dienhvah, ok bakmbanj bae cij miz saenqhauh.

Ndaw Mbanjrunghgyaeng mbouj miz saenqhauh, lij ndei, laj gorungz bakmbanj miz saenqhauh, yienghneix, laj gorungz engq nauhyied lo. Laj gorungz ngoenzhwnz cungj miz vunz, gyoengqde mbouj caiq lwnh miz soujgih baenzlawz baenzlawz ndei, gyoengqde caencingq ndaej yungh soujgih daeuj guhfwen gangjgoj yawj densi denyingj lo, yienznaeuz saenq- hauh yaep miz yaep fouz, hoeng gyoengqde hix gig miz naihsim dwk caj saenqhauh.