Fwen Vahsengj lai singbouh Bouxgun Sunghbwz dwg cungj fwen Bouxgun gag cauh, youq Nanzningz Si Hinghningz Gih Sanhdangz Cin、Vujdangz Cin、Gunhlunz Cin daengj dieg Bouxgun youq caeuq ranghdieg seiqhenz haenx cienzlah. Aenvih cungj fwen neix giz mizok dwg Sanhdangz Cin Sunghbwz Cunh, neix couh heuhguh fwen Vahsengj lai singbouh Bouxgun Sunghbwz. Aenvih gyoengq vunz Sunghbwz Cunh daihbouhfaenh dwg Bouxgun daj baihbaek senj daeuj, gyoengqde gangj Vahsengj, youq ranghdieg Bouxcuengh、Bouxgun doxcab youq haenx, neix couh miz lai cungj vahgangj caeuq sibgvenq ndawbiengz doxgyau doxsup doxyingjyangj, couh cauhbaenz le gij fuengsik eu fwen gagdog dangqmaz.

Fwen Vahsengj Sunghbwz Cunh gaenq miz 400 lai bi lizsij, swnjcienz ndaej 21 daih vunz. Cungj fwen neix miz sam aen daegdiemj: Fwen Bouxgun, aeu Vahsengj eu, aeu lai singbouh eu. Cungj fwen Vahsengj vunzlai maij dingq neix youq dangdieg miz diegvih linghgag. Gyoengq vunz ranghdieg Sanhdangz Cin, mboujguenj ranz lawz banhlaeuj cingjhek, cungj gyaez cingj Sanhdangz Cin bouxfwenvuengz Banh Yinghyungz daeuj eu fwen Vahsengj, baengh neix hawj ndaw ranz banhlaeuj lai nauhyied.

Cungj fwen neix aeu fwen lai singbouh Bouxcuengh guh giekdaej hwngfat baenz. Cungj fwen neix ndaej gij fwen lai singbouh Bouxcuengh yingjyangj lai dangqmaz. Ciengzbaez gyoengq canghfwen doxdoiq eu ne, couh youz bouxsae canghfwen eu coenz daih’it, liuxle gyoengq canghfwen swnj eu roengzbae.

Ndaw fwen neiyungz haemq lai, miz fwenyoux sai mbwk doxgyau gamjcingz, miz fwenhaenh hoh fungsou, miz fwenhaenh haenh cwngcwz fouqminz aen dangj. Ciengzbaez gvaq ciet roxnaeuz seizcou souhaeuj liuxle, vunzlai couh doxcomz doiq fwen, neix dwg gienh saeh hungmbwk gvendaengz vunz dangdieg gvaq ciet.

Bi 2008, fwen Vahsengj lai singbouh Bouxgun Sunghbwz ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihngeih buek swcigih gaep feihvuzciz vwnzva yizcanj mingzloeg.