Vah bouxbien: 2019 nienzdoh Vahcuengh Sawcuengh suijbingz gaujsi youq 7 nyied 28 hauh youq Gvangjsih Nanzningz gawjhengz. Bineix miz 464 boux gaujseng, ndaw gyoengq gaujseng miz boux lwgmbauq Sanhdungh ndeu, de dwg Cinz Gengwngh. De gauj ndaej le gij cingzcik ndei cogaep 94 faen, aeundaej le mingz daih’it. De baenzlawz gaghag Sawcuengh ne? Miz maz gingniemh caeuq fapgvai mwh hag Sawcuengh ne? Deng bonj bauq iuiek, de dawz gij hagsib dijvei bonjfaenh sij okdaeuj, caeuq gyoengq beixnuengx faenyiengj gij hagsib simndaej bonjfaenh.

Guh Gietdingh

Gyoengq beixnuengx ndei. Baez neix ndaej gicej Gvangjsih Minzcuz Bau iucingj, sij roengz bien neix gou baenzlawz hagsib Vahcuengh. Gicej caeuq gou gangj, gou dangguh bouxhag vahcoj mbouj dwg Cuengh, gocwngz caeuq dijvei gou hagsib Vahcuengh doiq gij vunz siengj hag de daeuj gangj wnggai ndaej miz di daezsingj. Ndigah gou sawq bae cungjgez di yawjfap caeuq fuengfap mwh hagsib gou.

Miz haujlai vunz sawq bae hag loh vahgangj ndeu, hoeng gij vunz caencingq genhciz roengzbae mbouj miz geijlai. Youq Gvangjsih wnggai hix miz haujlai vunz siengj gaghag Sawcuengh, hoeng caezgya cungj cijdwg siengj bae siengj dauq, couhdwg mbouj bae guh, gizsaed yienghneix hojsik raixcaix. Lij mizmbangj vunz cij hag gvaq saekdi couh mbouj guh lo. Yienghneix hagsib gig nanz ndaej miz cinbu. Gou nyinhnaeuz, wnggai youq ndaw cenzdiz guhbaenz aen cawjnieb bonjfaenh, aeu gij hag ndaej yungh haeuj hengzdoengh bae.

Nyaenj Seizgan

Seizneix dwg aen seizdaih saenqsik lumj gvaicanh. Gij doxgaiq mizyinx gig lai. Bouxcoz miz vunz nyaengq doegsaw, miz vunz nyaengq saehnieb, ndaejhoengq le couh bae guh’angq, daihgaiq caeuq gyoengq baengzyoux doxcomz gwn laeuj. Yienghneix couh gig nanz miz seizgan bae hagsib Sawcuengh lo.

Miz vunz cam gou, hag Vahcuengh dwg mbouj dwg saiyaix seizgan? Gou roxnyinh, daih’it sim yinx gietdingh le diuz roen swhgeij yaek byaij haenx. Daihngeih, gaghag loh vahgangj ndeu, gizsaed mbouj miz bizyau itcig bae hag, cij yungh seizhoengq couh ndaej lo. “Seizgan couh lumj raemx ndaw haijmenz, nyaenj de couh miz okdaeuj lo.” Coenz vah neix dwg Luj Sin gangj. Gou roxnyinh seizgan dwg aeu nyaenj cij miz, bouxgaenx miz di seizgan ndeu de cungj bae hagsib. Gaej siengj lailai, roengzsim couh guh.

Ra Fapgvai

Hagsib loh saw vah ndeu couh aeu ra deng roen caeuq fuengfap. Miz naihsim bae hag, couh itdingh guh ndaej baenz. Gij hagsib sibgvenq caeuq fuengfap moix boux vunz cungj mbouj doengz. Fuengfap gou dwg sien daj 《Fueng’anq Sawcuengh》 haidaeuz. Aenvih Vahcuengh mbouj dwg vahcoj gou, sojlaiz dan daj cihsaw roengzfwngz couh miz itdingh nanzdoh lo. Doeklaeng cij ndaej hag daengz mbangj di cihsiz. 《Vahcuengh Doenglwnh》 bonj neix gizsaed mizik lailai, ndawde doiq gij fapfaenz caeuq fapsaw Vahcuengh guh le haujlai gangjgej ciengzsaeq. Daengz aen duenh gaenq haemq sugrox Sawcuengh le, couh caiq yawj 《Fueng’anq Sawcuengh》, doiq gij gveihcwz ndawde geiqmaenh baez moq. Yienghneix couh suenq guhbaenz liux aen duenh ngamq haeujdou.

Geiq Cihsaw

Dandan yawj lij mbouj gaeuq, engq aeu miz lienzguh. Gwnz sawcanhgauj moix daez cungj wnggai bae guh. Danghnaeuz bungz daengz gij sawloih moq youq ndaw daez haenx gou cungj dwg geiq roengzdaeuj, seizgan nanz le, guh daezgenjleh hix couh vaiq lo. Daezgenjleh mboujgvaq couhdwg gaujcaz gij gezgou fapfaenz caeuq gij gveihcwz neiyungz ndaw 《Fueng’anq Sawcuengh》. Gij hagsib baihnaj itdingh aeu ngoenz rom ndwen comz, baihlaeng saedsaeh gaemdawz liux fapvah gezgou couh mbouj caiq dwg vwndiz lo. Gyonj ma gangj, youq gij gocwngz hagsib Sawcuengh, gou itcig aeu cwk sawloih cuengq youq daih’it vih. Aenvih ne, de dwg aen bouhfaenh ceiq gihbwnj ndeu, caznaeuz cihsaw cungj mbouj rox, gaiq wnq couh engqgya nanz bae roxyiuj. Ndigah, danghnaeuz gou ngoenzde miz giva hag Sawcuengh, hauhneix geiq cihsaw couhdwg gij hanghmoeg itdingh aeu miz haenx. Aen giva haidaeuz dwg moix baez yot seizgan ok bae laeng 80 aen cihsaw, doeklaeng couh gya daengz 100 aen. Gou raen haujlai cih miz lai cungj eiqsei, gij sawloih danhyinhcez engq nanz bae geiq. Cimdoiq aen vwndiz neix, gij genyi gou dwg ciengzseiz boih geiq, mbouj miz gij fuengfap wnq lo.

Hag Fapfaenz

Cawz sawloih le, haeujlaeg hagsib fapfaenz couh bienq ndaej gig youqgaenj lo. Baihnaj gou gaenq gangj gij youqgaenjsingq hag fapfaenz gvaq lo. Gou hag fapfaenz, gij fuengsik de cujyau dwg doenggvaq yawjdoeg. Gou gag naemj yawjdoeg dwg aen hothoh daegbied ndaej daezswng sawvah naengzlig ndeu. Gou ciengzseiz doeg cungj faenz- cieng miz Cuengh-Gun doiqciuq haenx. Yienghneix doiq Vahcuengh fapcoenz couh ndaej bonjfaenh faensik lo. Caiq gangj, raeuz hix wnggai bae rom gij vahsug Vahcuengh. Moix ngoenz boih it diuz song diuz, yienghneix ndaej youq mwh sij faenzcieng yungh haeujbae, hawj faenzcieng engq fungfouq, ngoenz rox lai gvaq ngoenz.

Ra Yinxdaeuz

Doiq gou daeuj gangj, gou itcig dawz gij yinxdaeuz bonjfaenh yawj ndaej gig youqgaenj. Gou hix nyinhdoengz hagsib vahgangj couh wnggai doiq de mizyinx caemhcaiq gyaez de. Aenvih itbuen daeuj gangj cijmiz youq ndaw cungj gocwngz neix, raeuz cij ndaej miz gij yinx hag rox cihsiz caeuq gij siengjmuengh laebdaeb haeujlaeg hagsib haenx, song yiengh neix dwg doxbouj doxbang. Doeg lai, lienh lai, dajdingq lai cungj mbouj miz loek. Mboujgvaq doiq gou daeuj gangj couhdwg dang baenz loh vahgangj moq ndeu bae hag lo. Ndeiyouq cungjgvi Vahcuengh caeuq Vahgun miz di giz doxdoeng, ndigah hagsib hwnjdaeuj hix mbouj dwgrengz geijlai. Gou hix gig yiengjsouh aen gocwngz neix.

Genyi Iq

Gou youq mwh gaghag Sawcuengh bungz daengz aen gunnanz ceiq hung, couhdwg nanz lai ra ndaej dauq sonhag sibinz caezcingj ndeu. Seizneix dwg seizdaih hulenzvangj, yungh meizdij moq cigyawj bae hagsib Sawcuengh, gizsaed ndaej bienqbaenz yienhsaed. Dandwg seizneix gwnz vangjloz lij caengz miz dauq sonhag sibinz caezcingj ndeu, lij mbouj ndaej cienzbouh muenxcuk gij hagsib aeuyungh boux gaghag. Danghnaeuz miz dauq sibinz caezcingj ndeu, yawjyawj soujgih hix ndaej hag, gawq hingzsiengq le, youh mbouj nyuknyak. Yienghhaenx couh engq ndaej daiqdoengh hwnj gij yezcingz gyoengq beixnuengx hagsib Sawcuengh lo. Vihneix ne, gou genyi mizgven bouhmonz ndaej caenhvaiq cauhguh de caemhcaiq fatbouh daengz gwnz vangj bae. Linghvaih , dingqgangj 《Sawloih Cuengh Gun》 banj coihdingh de hix couh yaek oksaw fathengz lo, genyi doengzseiz haiok gij banjbwnj denswj, youq gwnz vangjloz cazcam ndaej engqgya fuengbienh, hawj bouxndiepgyaez Sawcuengh sawjyungh.

Gij suijbingz Vahcuengh gou dandan dwg youq gij duenh cogaep, sojlaiz seizneix gij neiyungz gou hagsib daengz haenx hix cijdwg gihcuj cihsiz ndawde aen bouhfaenh ceiq genjdanh ndeu, gij gou guh ndaej haenx couhdwg laebdaeb haeujlaeg bae hag. Gij duenh hag vahgangj gak cungj gak yiengh cungj yaek bungz daengz mbouj doengz gunnanz, hix cijmiz ra daengz giz cungdenj doiq gij vahgangj gak aen duenh hag haenx genhciz roengzdaeuj, couh itdingh ndaej guh baenz.

Caensim sij hawj gyoengq beixnuengx gyaez Sawcuengh lailai, raeuz doengzcaez baenaj!