Daeggiuz dwk dienhvah maranz lwnh naeuz de gaenq ra ndaej dahsau ndeu guh youx lo, vunz Guengjdoeng, heuhguh Dahniz, mbouj geij nanz couh daiq ma mbanjranz.

Rox daengz aen siusik neix, Aucaet caegcaeg angq, de mbouj gamj gangj okbae gonq, lauheiq angq ndaej daiq caeux, daengz seizhaenx song bouxcoz damz mbouj baenz, nyex bouxwnq riu.

Aucaet ngoenz muengh hwnz muengh cungj mbouj dingqnyi Daeggiuz caiq gangj gienh saeh neix, de nyaenx mbouj ndaej daj dienhvah gvaqbae cam. Daeggiuz gig mbouj naihfanz dwk naeuz:“Boh ha, gou seizneix hong nyaengq lai, faen ndang mbouj ok. Mwngz caenhguenj dawz aen ranz raeuz ndawndaw rogrog baet ndaej seuqsaksak, dawz doenghyiengh baij ndaej cingjcingj caezcaez couh ndaej lo, gou caeuq Dahniz daengz seiz gag maranz.”

Mehyah dai caeux, Aucaet siengj lingh aeu yahngeih, youh lau bouxwnq doiq lwg mbouj ndei, cij ndei gag boux ndeu sinhoj ciengx lwg majhung.

Daeggiuz caeuq Dahniz dauq daengz ndaw mbanj seiz cingq dwg banhaemh, ndit haemh ciuq ndaej ndaw mbanj hoengzfwdfwd, doengh boux bae guh hongreih hongnaz haenx hix cingq dauqma lo, raen songde byaij haeuj mbanj daeuj, gyoengq vunzmbanj bouxboux ndwn dwk yawj mbouj yaep da.

Dahniz mbouj sang mbouj daemq, saeknoh maeqmwtmwt, yienghsiengq lengjlili, aen bak mbaeu youh diemz, raen vunz couh dongx. Aucaet ndaw- sim doiq Dahniz dwg fanh aen habhoz, de caen maqmuengh songde vaiqdi doxaeu, seng saek laeq lan hawj de umj.

Muengh dwk Dahniz gij yiengh- siengq neix, Aucaet naemj hwnj de caen maj ndaej lumj boux vunz de raen gvaq nei, hoeng itseiz youh geiq mbouj hwnj dwg bouxlawz.

Aucaet gwq naemj gwq naemj, sawqmwh, gij yienghsiengq boux vunz haenx fwt youq ndaw uk de okyienh lo, dwg Ngaenzcaw! Ngaenzcaw haujlai bi gaxgonq couh haq bae Guengjdoeng lo, de bingzseiz gig noix ma mbanj- ranz. Ngamq haq seiz cij daiq bouxgvan de ma baez ndeu, doeklaeng seng lwgnyez le, couh engq noix maranz lo, dangqnaj dahsau gvaigvet lengjli neix nanzdauh caeuq Ngaenz- caw dwg maz gvanhaeh?

Aucaet laep da hwnjdaeuj, de caen mbouj gamj lai naemj roengzbae, aen sim cix diuq mbouj dingz, lij loq miz di in, gaxgonq gij saehcingz haenx, lumj cuengq denyingj nei okyienh youq dangqnaj.

Daengx mbanj vunz cungj dwg singq Couh. 90 nienzdaih cogeiz, Aucaet ndaej 22 bi, cingq dwg daegmbauq nienz nomj ndang cangq he, Ngaenzcaw ndaej 17 bi, cingq dwg duj va ronghsien ngamq hai he, songde laeglemx doxgyaez lo. Gyoengqvunz cungj naeuz ndaw mbanj doengz singq mbouj ndaej doxaeu, couhsuenq gek sam daih hix mbouj ndaej. Lij naeuz danghnaeuz doxaeu baenzgya le, bouxgvan heuh Couh mouxmoux, mehyah heuh Couh mouxmoux, lwgyez hix heuh Couh mouxmoux, daengx ranz vunz cungj dwg singq Couh, vaih mbanj vaih naj cojcoeng.

Seizhaenx Aucaet caeuq Ngaenz- caw song bouxcoz doxgyaez ndaej cingq naemq, lawz bae guenj gijneix baenzlai, caiq naeuz gaxgonq ndaw mbanj hix gaenq miz geij doiq doengz singq bouxcoz doxlienh doxgyaez gvaq, hix bungz daengz gij cingzgvang neix. Gyoengqde cawz le deng bohmeh vet ndaq, deng beixnuengx yawjsiuj, lij deng vunzmbanj fwngz vix baih- laeng camx hozlaemz gvaq. Gyoengq bouxcoz aen sim doxndiep doxgyaez haenx lij dwg mbouj cuengqfwngz. Naemj hwnj gijneix, Aucaet gig miz saenqsim caeuq Ngaenzcaw doxndiep doxgyaez roengzbae.

Saehndei nanz baenz, daxgoeng Ngaenzcaw fok naeuz: “Danghnaeuz mbouj dingqgangj, gou couh gyoet hoz dai!” Daeggo Ngaenzcaw Daegdiet naeuz, Ngaenzcaw mbouj dingqgangj ndawranz mbouj miz naj, de aeu yah hix nanz. Gyoengq vunz ndawranz baenzlawz gangj baenzlawz gienq, Ngaenzcaw cungj dwg ngaemgyaeuj mbouj guhsing. Raen Ngaenzcaw mbouj gwn vah unq, gyoengqde couh dawz Ngaenzcaw gyaeng hwnjdaeuj, moix ngoenz miz vunz doxlwnz henyawj, haeuj ok aen dou suj ndaej maenhndwt, mbouj hawj de caiq bae ra Aucaet guhcaemz gangjgoj.

Ngoenz ndeu, Ngaenzcaw swnh gyoengqvunz mbouj haeujsim, caeg- caeg buet okdaeuj daengz ranz Aucaet ndoj hwnjdaeuj. Aucaet gyaez Ngaenz- caw, hoeng de ndaej rox gyoengqvunz cungj mbouj doengzeiq songde doxaeu le, de couh caeuq Ngaenzcaw dox- yaeng sien deuz ok rog bae ndoj duenh seizgan gonq.

Ndwenngux, duzbid youq gwnz gofaex swenj mbouj dingz, aen haeuxyangz mumh roz gyamq henj yaek ndaej sou lo. Haemhhaenx ronghndwen mumjgyumq, caj gyang- hwnz vunz ninz caemdingh le, Aucaet caeuq Ngaenzcaw laeglemx ndonj gvaq gyaeujmbanj benq reih haeux- yangz mwncup, yienzhaeuh byaij coh goengloh bae.

Aucaet caeuq Ngaenzcaw ngamq yamqdin daengz goengloh, gyoengq- vunz ndaw fuengzcug Ngaenzcaw couh sikhaek daj ndaw laep cung ok- daeuj, baez ragdawz Ngaenzcaw couh nyoengx ma coh ndaw mbanj, Aucaet hix deng nyoengx laemx daengz gwnzdieg, seiqguengq yiengq mbwn.

Gvaqlaeng Ngaenzcaw deng bik haq bae Guengjdoeng. Mbouj geij nanz Aucaet hix aeu yah lo, song gvanbaz mbouj ndat mbouj gyoet gvaq saedceij. Yah Aucaet seng Daeggiuz ndaej song sam bi seiz, couh baenz baez bingh naek he gvaqseiq lo. Gvaqlaeng Aucaet hix mbouj dwen caiq aeu yah moq.

Aucaet roxnyinh gij saehcingz gaxgonq, couh lumj youq ngoenzlwenz ngamq fatseng nei. De itcig mbouj lumz Ngaenzcaw.

Gvaq geij ngoenz, Ngaenzcaw caen ganj ma daengz mbanjranz. Dahniz、Daeggiuz caeuq Aucaet gyoengqde cungj doeksaet lo. Saeh- cingz caen lumj Aucaet liuh daengz yienghhaenx, Dahniz caen dwg dahlwg Ngaenzcaw, Dahniz lij miz daeggo ndeu, song beixnuengx neix caengz ma daengz ranzdaiq gvaq, bohmeh Ngaenzcaw caeuq gij vunzcaen Ngaenzcaw, hix mbouj bae Guengj- doeng yawj gvaq de, cungj mbouj roxnaj Dahniz caeuq daeggo de dwg vaihseng.

Aucaet caeuq Ngaenzcaw naj doiq naj doxraen. Aucaet ndwn youq gizhaenx dinghdingh muengh- yawj Ngaenzcaw. Ngaenzcaw lij dwg yienghhaenx, youh nienznomj youh gyaeundei, ndwenngoenz lumjbaenz mbouj youq gwnz naj de ce roengz gij riz geq nei. Ngaenzcaw lwnh Aucaet nyi, bouxgvan de geij bi gonq hix baenzbingh gvaqseiq lo, de itcig boux ndeu gag youq, baezneix caen ngeix mbouj daengz dahlwg de riengz Daeggiuz ma mbanjranz, aiq neix couhdwg yienzfaenh ba.

Daeggiuz majhung le hix rox gij gojgaeq daxboh caeuq Ngaenzcaw gaxgonq haenx, cij Dahniz seizneix ngamq rox. Daeggiuz riu naeuz:“Daxheiz, gou caeuq Dahniz roxnaj dwg yienzfaenh, mwngz caeuq boh gou doxbiek youh caiq raen engq dwg yienzfaenh. Vihliux mbouj hawj ciuh- neix miz maz hojsik, raeuz 4 boux goj ndaej gap baenz ranz vunz ndeu, sou naeuz ndei lwi?” Dingq Daeggiuz yienghneix gangj, Aucaet caeuq Ngaenzcaw naj ndinggvaenggvaeng 4 da doxmuengh dwk. Aucaet naeuz:“Gijneix cingq dwg gij simnyienh gou ne.” “Yienghneix mbouj daiq ndei ba.” Ngaenzcaw ndaw bak yienznaeuz yienghneix gangj, hoeng ndawsim de gaenq lumj gwn dangzrwi nei, diemzsisi.

“Ndei, gou cibcingz doengzeiq!” Dahniz muenghmuengh Aucaet, youh muenghmuengh daxmeh, angq hemq hwnjdaeuj.

Aen mbanj bya iqet neix itseiz youh goenjoo hwnjdaeuj lo, gyoengq- vunz faenfaen ngeixlwnh gienh saeh neix. Mbatneix caeuq gaxgonq mbouj doxdoengz, mbouj caiq miz vet caeuq ndaq lo, caenh dwg cukhoh caeuq angqyangz. Meh Ngaenzcaw hix gig angq, bihaenx haq Ngaenzcaw bae Guengjdoeng mbouj geij nanz le, de couh ienqhoij yaek dai, ienqhoij fouzcingz ceksanq doiq bouxcoz caensim doxgyaez haenx, ienqhoij doxliz gyae lai, mehlwg siengj raen saek mbat naj cungj nanz, ngoenz- ngoenz raemxda swiq naj. Seizneix ndei lo, dahlwg iq Ngaenzcaw caiq ma daengz henz ndang swhgeij, seizneix couh suenq sikhaek dai bae da cungj laep lo.