Raemxdah sawdikdik, gou byaengq da ndaem haeuj ndaw raemx, din fwngz doengzseiz haenqrengz vad le geij mbat, couh mumjgyumq yawjraen baihnaj miz diemj saeknding he langh youq laj raemx, gou baez iet fwngz, laihnaeuz gaenq gaemhdawz aen maknganx haenx lo, byawz rox baihhenz gingqyienz vang ok cik fwngz daeuj, beij gou lij vaiq coemj bae. Neix caen dwg hangz gou gvaqbouh lo! Maknganx yaek daengz ndaw fwngz deng bouxwnq ciengj bae, gou baenz- neix nyengjgouj, baenzlawz haengj dingzfwngz? Baez daeb song ga, song fwngz gaemh faj fwngz haenx, buek- mingh gaemh ndaet, siengj daj ndaw fwngz de ciengj maknganx dauqdaeuj.

Bouxde mingzyienj hix mbouj dwg bouxnyieg, gij faj fwngz de geng- ndongj miz rengz raixcaix, hawj gou youq laj raemx itseiz fouzfap beng hai lwgfwngz de, doeklaeng song boux dou cijndei doengzseiz bongh ok gwnz- raemx daeuj diemheiq.

Byoq ok gaemz raemxdah ndeu, bibi gyaeuj, yaepyaep lwgda, cij yawj ndaej cingcuj bouxde yenzlaiz dwg Ah Cang.

“Ai! Dwg mwngz ha!” De miz di doeksaet, doq ndenq maknganx ndaw fajfwngz hawj gou:“W, suenq duh mwngz.”

Ndawsim gou yenzlaiz gaenq miz di hozndat de lo, caiq yawj aen maknganx haenx gaenq deng de nap ndaej naeng dek raemx lae, lumj ndingq youz coh ndaw feiz nei, iet fwngz coux aen maknganx gvaqdaeuj gyux coq gwnz naj de, de song fwngz gaemhdawz le gij hozfwngz gou, de gingqyienz gamj fanj gou. Gou engq hozgaek lo, song gen baez nyup, got aen hoz de, songdou doengzseiz caez ndaem roengz ndaw raemx bae.

Gizyawz lwgsai cungj luenh hemq luenh heuh hwnjdaeuj, mizmbangj aeu fajfwngz mboengj raemx coh baih dou, mizmbangj ndwn youq gizfeuz luenh diuq. Yawj vunz doxgonh ceiq miz yinxdaeuz lo.

(caengz sat)