Sai:

It ndwen daengz cietheiq,

Yaek aeu geiq bohmeh,

Bohmeh ciengx raeuz geq,

Gyoengqde mbouj yungzheih.

Mbwk:

It ndwen daengz cietheiq,

Aeu geiq bohmeh gonq,

Gaiq aeu caj vunz son,

Geiq ndawsim bonjfaenh.

Sai:

Ndiep bohmeh daih’it,

Mbouj ndaej vit ndaej ce,

Guenj de lumj lwgnyez,

Mbouj ndaej ce lanhcienh.

Mbwk:

Ndiep bohmeh daih’it,

Ngitngit saeh aeu you,

Daengz donq raeuz gwn caeuz,

Mbouj ndaej lumz bohmeh.

Sai:

Ndiep bohmeh daihngeih,

Raeuz yaek geiq ndawsim,

Ngoenz gwn caeuz gwn ringz,

Raeuz yaek cingj bohmeh.

Mbwk:

Ndiep bohmeh daihngeih,

Raeuz yaek geiq ndaw dungx,

Gyoengqde ciengx raeuz hung,

Mbouj ndaej lumz aencingz.

Sai:

Ndiep bohmeh daihsam,

Mbouj diunanz bohmeh,

Daengz donq raeuz miz nyeq,

Heuh gyoengqde daeuj gwn.

Mbwk:

Ndiep bohmeh daihsam,

Cienfanh mbouj ndaej lumz,

Bohmeh geq raegrumj,

Mbouj ndaej lumz gyoengqde.

Sai:

Ndiep bohmeh daihseiq,

Ngeix lumj ciengx lwgnding,

Bohmeh hawj aencingz,

Ndawsim raeuz aeu rox.

Mbwk:

Ndiep bohmeh daihseiq,

Raeuz aeu geiq ndawsim,

Gyoengqde geq goh gim,

Aeu gvansim bohmeh.

Sai:

Ndiep bohmeh daihhaj,

Miz maz gwn couh heuh,

Gaiq laeg diem de deuz,

Heuh bohmeh riengz gwn.

Mbwk:

Ndiep bohmeh daihhaj,

Miz maz gwn couh naeuz,

De dwg bohmeh raeuz,

Heuh daeuj caemh congz gwn.

Sai:

Ndiep bohmeh daihroek,

Daj goek ndiep daengz byai,

Guenj daengz laemx daengz dai,

Aeu lai niemh bohmeh.

Mbwk:

Ndiep bohmeh daihroek,

Daj goek gyaez roengzbae,

De langh byaij mbouj ndaej,

Raeuz caemh gyaez yiengh gaeuq.

Sai:

Ndiep bohmeh daihcaet,

Yaepyaep sim dungx genz,

Bohmeh mbouj youq henz,

Sim caemh genz daengz de.

Mbwk:

Ndiep bohmeh daihcaet,

Gwn byaek maz dungx genz,

De langh mbouj youq henz,

Sim caemh genzringring.

Sai:

Ndiep bohmeh daihbet,

Raeuz mbouj get gaiq gwn,

Goq gyoengqde gyang fwngz,

Cungj dwnx hawj gyoengqde.

Mbwk:

Ndiep bohmeh daihbet,

Raeuz mbouj ged mbouj caeu,

Donq gwn ringz gwn caeuz,

Heuh daeuj caemh daiz gwn.

Sai:

Ndiep bohmeh daihgouj,

Bouxboux aeu roxndeq,

Bohmeh ciengx raeuz geq,

Gyoengqde gwn hoj lai.

Mbwk:

Ndiep bohmeh daihgouj,

Bouxboux aeu roengz dungx,

De ciengx raeuz baenz hung,

Mbouj ndaej lumz gij cingz.

Sai:

Ndiep bohmeh daihcib,

Raeuz mbouj vit mbouj ce,

Raeuz caemh miz ngoenz geq,

Ngoenzde raeuz caemh nanz.

Mbwk:

Ndiep bohmeh daihcib,

Gaiq laeg vit bohmeh,

De yied ngoenz yied geq,

Hawj de youq sim’onj.

Sai:

Banneix bohmeh geq,

Laeg hawj de cimz hoj,

De seng raeuz caiq goq,

Sinhoj baenz ciuh vunz.

Mbwk:

Banneix bohmeh geq,

Laeg hawj de fanz sim,

De ndiep raeuz lumj gim,

Itdingh aeu roxsoq.

Sai:

Banneix bohmeh geq,

Hawj de youq simhai,

Lwgmbwk caeuq lwgsai,

Wnggai ndiep doxdoengz.

Mbwk:

Banneix bohmeh geq,

Hawj de youq simhai,

Yaek gvaq ciuh daengz byai,

Hawj bak hai naj riu.

Sai:

Bohmeh raeuz sinhoj,

Raeuz doq boiz mbouj hwnj,

Raeuz ndaej daeuj lajmbwn,

Wnggai gyo’mbaiq de.

Mbwk:

Bohmeh raeuz sinhoj,

Raeuz ndaej goq baenz lai,

Coenz raez mbouj wnggai,

Dahraix sim ndiep de.