Baihrog ranz ndit haenq lumj feiz, yaek laemj ndang bae, loengh ndaej gyoengqvunz gik okdou bae youzlangh.

Banringz, mehranz cungnienz ndeu muengzhoeb muengzhawj cung haeuj baicuzsoj daeuj. Gij baengz buhvaq de baez yawj couh rox dwg baengz ndei, soijrwz gim、 lienhhoz gim gwnz ndang de ndongqyapyap, goenhfwngznyawh de sawrikrik. De baegfofo dwk.

Mehranz naeuz:“Gingjcaz……dungzci, daeglwg …… daeglwg gou mbouj raen lo.” De simgip ndaej gangj mbouj baenz saek coenz bae.

Gingjcaz cam:“Daeglwg mwngz geijlai bi?”

Mehranz dap:“Ndaej 5 bi lo.”

Gingjcaz youh cam:“Geijlai sang?”

Mehranz ngeix le yaep he cij naeuz:“W, w…… Nauq dag gvaq, hoeng mbouj rox de miz geijlai sang.”

Gingjcaz dingq le miz di doek- saet, ndawsim gag naemj: Meh neix dang maz meh ne? Lienz lwg cihgeij aiq miz geijlai sang cungj mbouj rox. Gingjcaz nyinhcaen yawj mehranz neix da ndeu.

Gingjcaz mbouj loh ok maz, laebdaeb cam:“Lwg mwngz seizlawz mbouj raen ne?”

Mehranz dap:“Ngoenzneix haet- romh, baez mbouj haeujsim couh mbouj raen lo.”

Gingjcaz cam:“Youq gizlawz mbouj raen ni?”

Mehranz naeuz:“Youq bakgyok douranz gou.”

Gingjcaz cam:“Ranz mwngz youq gizlawz?”

Mehranz naeuz:“Ranz gou youq Gujsingz.”

“Yienghneix yawj, aiq dwg deng gvaijmai nw!” Gingjcaz ndawsim gag naeuz. De laebdaeb cam:“Lwg mwngz heuhguh maz coh?”

Mehranz naeuz:“Coh de heuhguh Baujboiq. Bingzseiz gou cungj dwg ‘Baujboiq Baujboiq’ yienghneix hemq de.”

Gingjcaz dingq le caiq doeksaet baez ndeu, de daj gyaeuj daengz din caiq nyinhcaen yawj boux mehranz neix baez he moq.

Gingjcaz cam:“Lwg mwngz mbouj raen seiz de daenj maz buhvaq?”

Mehranz naeuz:“Lwg gou daenj buh hau vaq hau, daengx ndang saek hau.”

Gingjcaz cam:“Ndangdaej caeuq yienghsiengq lwg mwngz miz giz daegbied lwi?”

Mehranz han:“Lwg gou maj ndaej gig dwggyaez, byawz raen byawz gyaez.”

Gingjcaz nyinhnaeuz geizheih fouzbeij, ndawsim gag ngeix: Ukgyaeuj boux mehranz neix lauheiq mbouj cingqciengz nw? De dauqdaej rox mbouj rox gij vah gou ne? De coenzcoenz dwg dap gij vah gou, hoeng cungj mbouj miz maz yungh ne.

Gingjcaz cam:“Gou aeu bae gizdieg lwg mwngz mbouj raen haenx yawjyawj, mwngz daiq gou bae ba.”

Mehranz naeuz:“Ndei!”

Songde roengz daengz laj laeuz. Ndit haenq lumj feiz, yaek laemj ndang bae. Mehranz doq byaij doq nam coenz he:“Ndit fangz neix, yaek aeu mingh vunz bae. Gaej dawz lwg gou gangq dai nw.”

Mehranz muengzmuengz ndonj haeuj ndaw cibaujmaj de bae. Hai douci hai gunghdiuz yaep he, cij okdin. Ci de hai youq dangqnaj daiqloh. Gingjcaz gag hai gingjceh riengz aen ci de bae. Aiq dwg ndit haenq lai, seizneix gwnz gai mbouj miz maz vunz baedauq. Yaepyet, songde couh daengz Gujsingz lo.

Mehranz daiq Gingjcaz daengz gizdieg ranzbezsu Gujsingz ndaw yienh. Laeuzbezsu mehranz youq gizneix, 3 caengz, vax henj ciengz nding, cang ndaej gyaeundei raixcaix. Ndaw suenva ndaem miz haujlai gofaex, moix gek caet bet mij couh miz go ndeu. Aen dougyok de dwg aeu busiugangh daeuj guh, gwnz dou vangungj lumj ronghndwen gungj nei, gig ndeiyawj. Ndaw suen miz namhbeiz miz vahoengz, miz liengz- dingz miz bya’gyaj. Daj gizgyae yawj bae, aen suen neix lumj aen gungh- yenz iq ndeu nei, gyaeundei dangq- maz.

Gingjcaz cam:“Lwg mwngz couh- dwg youq aen dougyok gizneix mbouj raen la?”

Mehranz han: “Dwg ne.”

Gingjcaz youq rog dougyok dauqcawq yawjyawj. Gaenlaeng de lawq yaep ndeu, siujsim yubyub dwk cam:“Ukgyaeuj lwg mwngz gvai lw?”

Mehranz dingq le fatheiq lo, sing hung naeuz:“Mwngz gangj maz vah? Lwg gou mboujdan coengmingz, lij dwggyaez dangqmaz. Mwngz yiengh- neix cam gou, gou dauq nyinhnaeuz ukgyaeuj mwngz mbouj gvai nw!”

Gingjcaz damzdingz dwk yawj mehranz, ndawsim cix gag naeuz: Lauheiq ukgyaeuj boux mehranz neix caen mbouj cingqciengz nw!

Gingjcaz cam:“Mwngz dauqngeix baez he, ceiqgaenh dougyok baihrog miz gij vunz roxnaeuz gij ci baedauq caeuq bingzseiz mbouj doxdoengz lwi?”

Mehranz naeuz:“Mbouj rox nw, gou mbouj haeujsim bae yawj gvaq ne.”

Gingjcaz hoq aen suen ranz byaij gvaengx ndeu, cazyawj seiqlengq, yawjyawj miz giz maz geizheih ce roengzdaeuj.

De cazyawj baez he, cam meh- ranz neix naeuz:“Gou ndaej mbouj ndaej yawjyawj aen rug daeglwg mwngz ni?”

Mehranz doq naeuz:“Ndaej ne. Dou haeuj ndawranz bae ba.”

Ndawranz cang ndaej gig hauz- vaz, yienznaeuz dwg gyangngoenz, caengz hai daeng, hoeng, dingranz daeng hung daeng iq ingj dwk lwenq- yapyap, gyasei aen’aen gauhdangj, yawj ndaej ok, ranz neix dwg ranz bouxmiz.

Gingjcaz riengz dwk mehranz hwnj daengz laeuz daihngeih, mehranz hai aen dourug ndeu, aen mbonq hung ndeu sikhaek ingj haeuj ndaw da gingjcaz daeuj, moeg swiz gwnz mbonq cungj dwg doxgaiq ndeiyungh ndeiyawj. Gij doxgaiq cangnaj gak cungj gak yiengh, baij rim gwnz congzcangnaj. Gwnz ciengz gyaeuj- mbonq venj mbaw siengq daenj vunhsah ndeu. Bouxyahmoq gyaeu- ndei ndaw siengq dwg boux mehranz neix seiznomj bae ingj.

Gingjcaz cam:“Neix dwg aen rug daeglwg mwngz?”

Mehranz dap:“Neix dwg aen rug gou caeuq daeglwg youq, bingzseiz gou caeuq daeglwg gou yamqdin ndeu cungj mbouj doxliz.”

Gingjcaz youh cam:“Daeglwg mwngz miz mbouj miz saek mbaw siengq? Gou ndaej mbouj ndaej yawjyawj mbaw siengq de?”

Mehranz:“Ndaej! Ndaej.” De hai aen gvihdoengj ndeu, dawz mbaw siengq ndeu okdaeuj ndenq hawj gingjcaz.

Gingjcaz baez yawj yaek ngunh gvaqbae lo……

Yienzlaiz daeglwg boux mehranz neix dwg duz maningq hau dwggyaez ndeu.