Ndwen 11 ngoenz 2, mehmbwk Bouxcuengh Fungsanh Ginhyaz Yauzcuz Yangh cingq yotmae daemjbaengz. Fungsanh Ginhyaz Yauzcuz Yangh miz haujlai aen mbanj Bouxcuengh, youq mwh minzcuz vwnzva hoenghvuengh hwngfat neix, vunzlai Bouxcuengh dangdieg dauqguh buhvaq ciuhgeq, daenj buhvaq ciuhgeq Bouxcuengh. Geij bi neix daeuj, Fungsanh vwnzva bumwnz yungh gijndei neix guh dazyinx, cujciz dangdieg boux mehmbwk daiqdaeuz miz dungxcaiz、miz dinfwngz、miz naengzlig cujciz haenx laebbaenz aen ciennieb hozcozse diengzhong fwngzguh buhvaq minzcuz Bouxcuengh Ginhyaz Yauzcuz Yangh, cienmonz guh caeuq gai buhvaq minzcuz Bouxcuengh. Aen hozcozse neix seizneix gaenq miz 200 lai ranz youq ndaw guh yotmae、daemjbaengz、nyibguh、 siuqva、 dinghaiz daengj dinfwngz conzdungj Bouxcuengh. Mehmbwk Bouxcuengh yungh song faj fwngz iqetet neix doidoengh bonj dieg vwnzva caeuq lijyouz canjnieb doxyungz hwngfat, cauh ok diuzroen baenz miz mehmbwk louz youq ranz.

(Couh Wnhgwz/周恩革)