Haenzdah yaep ndeu bung daeuj bang lwgsai ndaej 10 lai bi nei, lohgengz lohgangh boem haeuj raemx, gij raemhfaex gofaex- nganx mwncumcum vih gyoengqde cw ndit, gawq sangjsak youh ndeimaez. Cijaeu raq rumz ndeu baez ci gvaq byaifaex, gyoengqde cungj doengzcaez ngiengxgyaeuj iet hoz ngonzyawj, deq maknganx baenz gwnz nga haenx bumbum doek roengzdaeuj, doek- laeng, gyoengqde couh lumj gyoengq roeg doxceng gwn doxgaiq nei youz gvaqbae ciengj, miz boux dingjdaeuj ndaem coh daejdah, caekhaex wenq youq gwnz raemx fwd raen fwd ndoj; miz boux daj gwnz raemx bungz gvaqbae, caeuq bouxgyaeujndoq iq dangqnaj bongh gvaqdaeuj cingq doxbungq, seizde song boux rim da yaep ndaundeiq, got gyaeuj sing hung dwk doq hemq doq riu; mizseiz guh’angq, miz saek song boux couh ndaetndet doxumj youq ndaw raemx dox- ringx, maknganx mboujcaengz ciengj ndaej, dauqfanj gwn le moengj raemxdah, lij deng ae’gege dem.

Gou heuh dahnuengx baema ranz gonq, sikhaek caeuq gyoengqde caez youzraemx. Youq gyoengq lwgnyez ndawde, gou mbouj miz maz diegvih, yienznaeuz gou gaenq ndaej 13 bi lo, hoeng gyoengqde lumjnaeuz cungj beij gou lij ak, daegbied dwg Ah Veij. De ndaemraemx ceiq maenh, caem youq laj- raemx ceiq nanz, dou cungj mbouj beij de. Caemhcaiq de bin faex hwnj bya ceiq ak, dingjfaex caiq sang, bangxdat caiq lingq, dou cungj mbouj gamj bin hwnjbae, de cungj gamj. Dangyienz, gou hix miz giz beij gyoengqde ak, youq hagdangz gij cingzcik gou beij gyoengqde ndei, lauxsae ciengzseiz haenh gou cix ndaq gyoengqde. Ndigah seizmoengj, gyoengqde nyienh dingq gou gangj.

Gofaexnganx haenzdah heux bae geuj dauq, nga vang nye caix, gij congh hung caeuq giz mbot hung goekfaex, caeuq gij ngawhrin lumj buhgyaep nei nanatnat goemq dwk, mbouj oksing dwk cwngqmingz gij ginglig gyoengqde mbouj bingzciengz.

“Bumbum!” Youh miz aen maknganx hung ndeu doek roengzdaeuj lo.

Gou da raeh fwngz riengj,