Ganh Yingz dwg bouxak nyingz naq seiz ciuhgeq. De baez beng gung nyingz naq coh duznyaen, duznyaen couh sikhaek deng riengz sing laemx; de nyingz naq coh duzroeg mbin gyangmbwn, duzroeg mbin couh yaepyet daj gyangmbwn doek roengz- daeuj. Cijaeu bouxvunz yawjraen Ganh Yingz nyingz naq gvaq, mbouj miz saek boux mbouj haenh de.

Hagseng Ganh Yingz heuhguh Feih Vei, de gaen Ganh Yingz hag nyingz naq gig roengzrengz. Geij bi gvaqlaeng, bonjsaeh Feih Vei nyingz naq, couh gyaep dawz Ganh Yingz lo, caen dwg lauxsae mizmingz ok lwgsae ak ha.

Doeklaeng, youh miz bouxvunz ndeu heuhguh Gi Cangh daeuj baiq Feih Vei guh lauxsae. Seiz ngamq haidaeuz hag nyingz naq, Feih Vei yiemzhaenq doiq Gi Cangh naeuz:“Mwngz dwg caen dahraix yaek gaen gou hag nyingz naq ma? Mwngz aeu rox, mbouj roengz goengfou, hag mbouj ndaej caen bonjsaeh bw.”

Gi Cangh naeuz:“Cijaeu ndaej hag rox nyingz naq, gou mbouj lau gwn hoj, nyienh dingq lauxsae sonyinx.” Yienghneix, Feih Vei gig yiemzsuk doiq Gi Cangh naeuz:“Mwngz yaek hag rox nyingz naq, aeu hag mbouj yaep lwgda gonq, guh daengz mbouj yaep lwgda le, cij ndaej hag nyingz naq.”

Gi Cangh vih ndaej hag nyingz naq, dauqma ndawranz, daengjai ninz youq laj congzrok mehyah, song ceh da yaep cungj mbouj yaep, cimyawj aen rok gwnz congzrok. Gi Cangh ngoenzngoenz yienghneix, ndwen- ndwen yienghneix, ndawsim cungj naemj gij iugouz lauxsae caeuq gij gietsim swhgeij. De laeglemx lwnh hawj swhgeij: Yaek siengj hag daengz caen goengfou, baenz boux cangh- nyingznaq maenh’ak, couh yaek genhciz bae haenqrengz lienh.

Gi Cangh yienghneix lienh le song bi, coengzlaiz mbouj dingz gvaq. Seizneix, couhcinj yungh fagcuenq camx naengda de, song ceh da de hix yaep cungj mbouj yaep. Lienh daengz gizneix, Gi Cangh haidaeuz cingjleix doxgaiq, bae ra Feih Vei lo.

Feih Vei dingq le gij vah Gi Cangh, doiq Gi Cangh naeuz:“Mwngz vanzlij mboujcaengz hag daengz dieg ne. Yaek hag ndei nyingz naq, mwngz lij aeu lienh daraeh cij ndaej, yaek lienh daengz yawj gij doxgaiq iq lumjnaeuz yawjraen gij doxgaiq hung nei, yawj gij doxgaiq mumjgyumq lumj gij doxgaiq seuqsat mingzyienj nei. Mwngz lij aeu laebdaeb lienh. Deq mwngz lienh ndaej daengz lo, caiq daeuj lwnh gou nyi.”

Gi Cangh youh dauqma ranz, de daj gwnz rieng duzvaiz genj le diuz bwn ceiq saeq ndeu, gyaeuj ndeu cug duznaenz iq, gyaeuj he venj youq gwnz cueng aen ranz swhgeij, gaenlaeng song ceh da cimyawj duznaenz iq gyaeujlaj bwnvaiz.

Yawj ha, yawj ha, lwgda cungj mbouj yaep saekdi yawj ha. 10 ngoenz mbouj daengz, duznaenz haenx lumj- naeuz ciemhciemh bienq hung lo. Gi Cangh vanzlij genhciz haenqrengz lienhguh. De laebdaeb yawj ha, yawj ha, cehda mbouj cienq saekdi bae yawj.

3 bi gvaqbae lo, duznaenz iq cug youq gyaeujlaj bwnvaiz haenx, bienqndaej hung haujlai, lumj aen loekci nei. Gi Cangh caiq yawj gij doxgaiq gizyawz, hix cungj bienq- ndaej hung caez lo.

Yienghneix, Gi Cangh ra fag gung aeu gaeuvaiz dajcang haenx daeuj, dap naq raeh, fwngzswix dawz hwnj gung, fwngzgvaz dap hwnj naq, liuq duznaenz lumjnaeuz loekci hung, beng gung nyingz naq gvaqbae. Byainaq cingqngamj daj cungsim duznaenz byoengq gvaqbae, hoeng diuz bwn venj duznaenz haenx, cix mbouj deng gij rengz de nyingz goenq.

Seizneix, Gi Cangh cungjsuenq singjsag roxnyinh daengz lo: Yaek hag ndaej caen bonjsaeh, mbouj haenqrengz roengz goengfou mbouj ndaej.

Dang de lwnh gij cingzcik neix hawj Feih Vei nyi seiz, Feih Vei angq dwk diuq hwnjdaeuj, caemhcaiq yungh fwngz bek mbaq Gi Cangh, caensim cukhoh de, naeuz:“Mwngz guh ndaej daengz lo. Gij dauhleix laegluemx nyingz naq, mwngz gaenq hag rox luha!”