Bineix doxdaeuj, Sihlinz Yen doenggvaq haiguh “doxdax cihsiz”“banhaemh gangjgoj”“ciendaez gangj”“yienjheiq senhconz”“sam fueng raen- naj” daengj hozdung bak gangj, haenq- rengz senhconz gyauyuz、ywbingh、ranzyouq、canjnieb daengj fuengmienh banggungz cwngcwz caeuq gij gojgaeq vut gungz okhingz、gingniemh cwngzgoj, gikfat vunzlai gungzhoj gag gaenxguh, gyagiengz gij heiqdaej vunzlai gungzhoj vut gungz, demgya gij cingzngeih ganbu banggungz caeuq vunzlai. Daengz seiz- neix, aen yienh neix gungh haiguh gak hangh hozdung bak gangj 360 lai ciengz, leih daengz 5.9 fanh vunz.

Aen yienh neix 99 aen yenciz danhvei cawjdoengh gapdoiq 94 aen dangjcihbu mbanj lienzhaeh, hopheux gak hangh fuengcim cwngcwz, aeu dangzgoq buen daengz gyanghongh ranz vunzguhnaz、gyang reih gyang naz, yungh vahdeihfueng vahdoj gangjgej, hawj dangjyenz itsienq gij aeuyungh lijlun ceiq moq ndaej habhoz. Doengz- seiz, cingj bouxak baenz miz dangdieg hwnj daiz son gingniemh baenz miz, bang vunzlai gungzhoj hag rox、loengh rox gak hangh cwngcwz leih vunzguhnaz, caenh’itbouh siucawz gij ngeixnaemj “deq baengh aeu”.

Youq mwh gangj, aen yienh neix laeb miz hothoh doxcam doxhoiz, lumj baenzlawz hwngfat canjnieb、baenzlawz bauq mizgven cwngcwz caeuq saedyienh cienjsenj couhnieb daengj vwndiz dang- ciengz gejdap hawj vunzlai gungzhoj, caemhcaiq aeu gij hozdung gangj caeuq son’gyauq canjnieb banggungz dox giethab, vih gyoengq nungzhoh soengq bae gij cihsiz moq、gingniemh moq、fuengfap moq hwngfat canjnieb daj- ndaem dajciengx, vih bangrengz canj- nieb vut gungz miz gij cozyung doi- doengh gaenxmaenx.(Veiz Susez)