Fwenndei singsang Bouxcuengh Dasinh youh heuhguh“sinae (fwenndei) singsang Bouxcuengh Dasinh”. “Sinae”dwg Vahcuengh dangdieg yienghneix heuh(eiqsei dwg fwen sing ceiq sang、ceiq gok、ceiq ndei). “Sinae”dwg cungj fwen Bouxcuengh ndeu, vunzbiengz ciuq gij sing sang youh heuhguh“sinae singsang”.

“Sinae”youq Ciuzdangzcauz heij miz, daengz seizneix gaenq miz cien lai bi nanz lo. Youq duenh cien lai bi nanz ndawde, miz haujlai ciuz de cungj hwnghoengh, cienz daengz seizneix, dwg cungj fwenbiengz vunz Dasinh cien lai bi daeuj daih dam daih ciengq mbouj daengx haenx.

Dasinh gij fwenndei singsang Bouxcuengh ne saimbwk doiq ciengq lai, daegbied dwg cungj fwen daeuz ndeu ndaej hawj gij bouxcoz saimbwk aeu daeuj guhyoux. Ciengzbaez banh saeh’angq rox- naeuz gvaq cieng gvaq ciet, daegbieg dwg moix bi liggaeuq sam nyied ngeihloek dwg ngoenz ciethawfwen ndawbiengz (dangdieg gvaq ndaej ceiq hoengh), vunzlai dangdieg maij eu fwen lwnh vunzlai sim’angq simmaez. Youq seiz gvaq ciet- hawfwen, gyoengq vunmbanj dox- gyawj doxgyae daenj ndangdaenj ndei le comz daengz Sanhlenz Cunh ganj hawfwen, mbwkmbwk saisai geqgeq cozcoz eu fwen gyau baengz- youx、coux baengzyoux, seiz vunz ceiq lai haenx miz gyawj fanh vunz caemh doiq fwen, ciengzmienh hungmbwk dangqmaz.

“Sinae”dwg fwen lwnh saeh. Cungj fwen neix lai seibienh, neix ndaej heuhguh yienghcoenz lai; gij fwen coenz noix haenx miz seiq、haj coenz, gij fwen coenz lai haenx lai baenz song bak coenz doxhwnj; gingciengz dwg gek coenz dawzyinh (yinhmeh doxlumj roxnaeuz dox- gyawj), mizseiz coenz gwnz cih doeksat caeuq coenz laj cih gyaeuj dawzyinh, gungh miz ngeihcib aen yinhmeh doxap. Gyoengq canghfwen eu fwen seizhaenx langh yienj“doxdax eu fwn”, gingciengz miz song sai sam mbwk doxdax、roek sai bet mbwk doxdax、cib sai cib mbwk doxdax lai cungj gyoebcomz; youq ndawde cab gangj gih saeh sibgvenq vunzbiengz gangjyoux guhyoux、aeu bawx haq lwg daengj.

Fwenndei singsang Bouxcuengh Dasinh dwg cungj fwen Boux- cuengh maenhndei dangqmaz ndeu, youq doenghgij fwenbiengz Guengj- sae ndawde linghgag dangqmaz. Aendoih fwenbiengz Dasinh gaenq camgya lai cungj biujyienj caeuq doxdax, lai baez ndaej ciengjgim、ciengjngaenz. Lumj bi 2011 bae Ningzya camgya Daihgouj Gaiq Cungguek Ranghbaihsae Fwenbiengz (Dujva) Hoihfwen doxdax, canghfwen Bouxcuengh Cau Yenzsw、Hij Siucinh eu fwenbiengz singsang le aeu ndaej gaiq ciengjgim (fwen- biengz).

Bi 2010, fwenndei Bouxcuengh Dasinh ginggvaq Gvangjsih Boux- cuengh Swcigih doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.