Dahfang liuh mbouj daengz, gyabuz doiq de baenzneix ndei, gyabuz dawz de dangguh dahlwg nei daeuj ndiepgyaez. Aensim caepcat Dahfang lumj deng rumzcin baez ci, bienq ndaej raeujrubrub. De ciengz- seiz gag gikdoengh dwk caegcaeg lae raemxda. Dahfang seng lwg le, gyabuz baenz ranz vunz fugsaeh de lumj boux mehvuengz ndeu, Dahfang ngoenz- ngoenz cungj cimq youq ndaw angqyangz. Saedceij gvaq ndaej ndeiriri, byawz liuh song ngoenz gonq Simjseiq lwnh gij saeh mehciengx hawj de nyi le, caemh dangq gyaepsieng deng vunz baez mbit, lwedhoengz dauq iemq okdaeuj yaeyae.

Dahfang ndawsim gig haemz mehciengx, de caen mbouj siengj bae leix de, hoeng baez daengz de umj bouxlwg bonjfaenh, raq raeujrub gyaezmeh he youh lumj raemxcin nei nyoengx hwnj aeksim daeuj. De youh ngeix daengz mwh daeg nuengxiq caengz seng seiz, mehciengx boh- ciengx doiq de baenzhaenx ndei, gyaez de lumj gaiq bauj. Mbouj miz song boux de lingxciengx swhgeij, bonj- faenh baenzlawz ndaej maj baenz- vunz?

Gvaq song ngoenz, Dahfang caegcaeg bae ranz mehciengx. De lau vunz raen naj de, couh daegdaengq daenj aen mauhlinxbit ndeu, cwbaex fajnaj. De ndwn youq bakdou, iet hoz liuq haeuj ranz bae, caenh raen ndawranz caemrikrik, geij duz gaeq sanq youq gyanghongh, heuhgyukgyuk ra gwn. Yaep he, bohciengx daj ranzcauq dawz vanj souh okdaeuj, byaij haeuj ndaw rug bae. Dahfang naemj, mehciengx aiq dwg ninz youq gizneix lo. Ngonz raeblaeng boh- ciengx, vunz caengz rim 60, couh hwet gaeuz naj reuq, byaij roen naiqnueknuek. Dahfang aen ndaeng miz di soemj, de nyaenx dwk mbouj hawj raemxda lae okdaeuj. De siengj haeujbae yawjyawj, youh lau song boux vunzlaux mbouj nyinh de lo. De dauqdaej dwg caeg deuz ok ranz, youh cibgeij bi mbouj dauq gvaq, lienz baezhaenx de banh sinhfwncwng, lij dwg heuh daegnuengx caegcaeg dawz hugoujbwnj okdaeuj hawj de. Seizneix, sawqmwh yamq haeuj ranz daeuj, vunz lij leixlangh mwngz dem ha? Caiq- naeuz, mehciengx mbouj dwg miz daeglwg ciuqgoq ma. Suenq lo, gou cangguh mbouj rox sat lo.

Saedceij lij lumj bingzciengz nei gvaq roengzbae. Dahfang caeuq gyabuz lij doxgingq doxndei doxhuz. Dahfang hix ciemhciemh lumz gienh saeh neix lo. Hoeng, ngoenzlwenz youq gwnz haw youh roebraen Simj- seiq, aen sim Dahfang youh venj hwnjdaeuj lo. Simjseiq lwnh de nyi, bohciengx aenvih ciuqgoq mehciengx dwgrengz lai, hix deng bingh lo. Dahfang cam:“Daeglwg de ne?” Simjseiq naeuz:“Youq roggyae aeu yah seng lwg, haujlai nanz mbouj dauqranz lo.” Dahfang sim’in naeuz:“Yienghneix song boux vunzlaux mbouj daiiek ha!” Simjseiq naeuz:“Vunzmbanj raen songde cojgvaq lai, deih mbouj deih bae bangfwngz. Hoeng bouxboux hong lai hong nyaengq, cix mbouj ndaej ngoenz- ngoenz bae coengh ha.”

Ma daengz ranz, Dahfang gwn haeux hix roxnyinh mbouj feihbak lo, ndawsim lumj miz song boux vunz doxceng doxcwngq. Bae yawj meh- ciengx ba, youh lau mehciengx mbouj nyinh de, danghnaeuz mehciengx baez fatheiq, boenqbag de ok dou, de mbouj gag ra saetnaj ma? Mbouj bae yawj baez he, ndaw aek de youh lumj miz gaiq rin he daenz dwk ndaetndwdndwd.

Couh yienghneix, Dahfang luqluq lawqlawq, cawj byaek mbouj dwg lumz dwk gyu couhdwg dwk gyu ndaengq, byaij roen hix miz di fouzfedfed. Gyabuz nai de naeuz:“Mwngz geij ngoenz neix guhhong naet lai, bae gwnz congz ninz yietnaiq ba.” De cengqhai najsaep riunyumj naeuz:“Meh, mbouj naet law, gou guh ndaej.” Naeuz sat, daj ndaw fwngz gyabuz ciengj aeu gaiqcatrek, gag ngaemgyaeuj swiq rek swiq gu.

Dahfang aeu guhhong nyaengq daeuj lumz gienh saeh neix, hoeng, aen sim de lumj dujfaiq nei unq- nemnem, caenh aen uk baez hoengq, de couh simniemh daengz mehciengx. Miz ngoenz he, hai dienhdanci youq gwnz roen buetbyaij, de yawjraen baihnaj miz boux mehlaux ndeu byaij roen naiqnueknuek, gij yiengh meh- ciengx hojlienz haenx youh fouz ok ndaw uk de daeuj. De baez faensim, aen ci lumj gwn laeuj fiz nei mbieng- mbieng mbeujmbeuj ringx roengz henz roen bae, de haenqrengz niujdawz gyaeujci. Hoeng, gaenq mbouj gib lo, lienz vunz daiq ci fan roengz mieng- raemx bae, de cengqgengz bin hwnj- daeuj. Gavaq sik lo, gyaeujhoq miz di in. De nyeux yawj seiqhenz, baihlaeng lumj miz vunz byaij daeuj, de lau deng vunz riu, vaiqvet nyoengx ci hwnjma, cacoemj hai ci baefofo.

Ma daengz ranz, de ngamq dawz ci cengj dingz youq gyanghongh, doq dingqnyi gyabuz doeksaet hemq naeuz:“Ya, ga mwngz baenzlawz ok lwed lo!” Dahfang ngaemgyaeuj baez yawj, caen dahraix, lajdin miz lwed hoengz- fwgfwg. Gvaiq mbouj ndaej haxbaenh roxnyinh miz di in, laxlawz deng sieng lo.

Gyabuz buet haeuj rug bae aeu yw okdaeuj, gongzyongq youq baihnaj de, song fwngz riengjretret bang de aeu raemxyw uet baksieng, sat le, youh byoq ywmba youh duk vajhau, nyaengq dwk gwnz naj hanh ndik- soegsoeg.

Yienznaeuz sieng mbouj naek, hoeng gyaeujhoq miz di gawh, byaij roen roxnyinh dotyanyan. Raen Dahfang yienghneix, gyabuz rag de ma gwnz mbonq ninz, naeuz:“Mwngz ndeindei dingh youq ciengx bingh, hongrog hongranz mwngz gaej nem fwngz.” Daengz seiz gwn haeux, gyabuz lij dawz vanj haeux vanj byaek ndenq daengz fwngz de. Dahfang baez ciep aen vanj, fajnaj roxnyinh ndat- fwdfwd. Di sieng iqetet yienghneix, gyabuz yienghyiengh cungj ciuqgoq daengz, mehciengx seizneix mbouj rox miz bouxlawz daeuj ciuqgoq de?

Gij simnyap neix, Dahfang siengj gag gyan youq ndaw dungx mbouj hawj bouxwnq rox. Hoeng, lajmbwn aen roqranz lawz mbouj laeuh rumz? Gwn caeuz sat, gyabuz naengh youq henz ndang Dahfang, sing unqnemnem doiq Dahfang naeuz:“Dahlwg ha, gij saeh mwngz gou cungj rox lo.” Dah- fang aen sim baez yiep, naj hoengz- gyoenggyoeng ngaemgyaeuj cam:“Meh, mwngz naeuz gou baenzlawz guh cij baenz?” Gyabuz danqheiq gaemz he:“Ciuq naeuz ne, mehciengx yienghneix doiq mwngz, caen gvaq- bouh lai, couh mbouj hab bae leix- langh de.” Gyabuz laxlax faj fwngz Dahfang, gamz raemxda naeuz:“Lwg ha, mwngz gwn hoj lai lo.” Dingz yaep he, youh naeuz:“Hoeng, caiq baenz- lawz gangj, de gouq diuz mingh mwngz gvaq, ciengx mwngz hung baenzvunz. Ai, vunz laux deng bingh, hix cojgvaq. Mwngz siengj bae yawj de couh bae yawj ba, hix suenq caenh faenh sim’eiq ndeu lo.” Dahfang gotdawz gyabuz, raemxda rihnengneng.

Haetcaeux, gyabuz youh naeuz bae mbanj byaijbyaij. Dahfang siengj buenx de bae, gyabuz riunyumnyum naeuz mbouj yungh lo. Dahfang ngeix, fanjcingq seizneix haeujdoeng, laj- mbanj hong mbouj nyaengq, gyabuz siengj bae mbanj cetyouz, sanqsanq sim, caih de ngah.

Muengh raeblaeng gyabuz, Dah- fang youh hozndiep daengz mehciengx lo. Ngoenzhaenx, dingq gyabuz lwnh gij vah haenx le, de roxnyinh hix wnggai bae yawjyawj mehciengx cij baenz.

Daengngoenz swng daengz song diuz saux sang le, Dahfang hai dienhdanci daeuj daengz bakranz mehciengx lo. De ndwn youq bakdou yaemhywx yaep he, cij menhmenh yamq din haeuj rug bae. Ngiengx- gyaeuj baez yawj, Dahfang doeksaet yat, gyabuz gaenq naengh youq henz mbonq bwnq mehciengx gwn haeux. Gvaiq mbouj ndaej, geij ngoenz neix, gyabuz ngoenzngoenz naeuz bae mbanj, laxlawz dwg daeuj gizneix.

Dahfang miz di najmong he:“Meh, mwngz baenzlawz daeuj lo.” Gyabuz caengz haibak, mehciengx gaenq cengj ndang siengj naengh hwnjdaeuj. Dahfang caeuq gyabuz vaiqdi rex de ninz ndei. Mehciengx sing saenzdwddwd naeuz:“Gyabuz mwngz dwgrengz lo, yamqdin haeuj ranz, caengz yiet saek gaemz heiq, couh nyaengqnyinyi ning fwngz, bang gou swiq ndang、saeg buh、baet ranz……” Mehciengx doq naeuz doq daejngoegngoeg, “Dahfang, gou caen mbouj baenz meh. Gou……caen mbouj miznaj raen mwngz……” Dahfang daj fwngz gyabuz ciep vanj haeux gvaqdaeuj, doq bwnq haeux hawj mehciengx doq naeuz:“Gou hix miz giz mbouj deng, deuz ok ranz bae mbouj naeuz saek coenz, bae cibgeij bi hix mbouj dauq saek baez.” Mehciengx caenh ienqyeye bonjfaenh:“Gou sieng aen sim mwngz lo, mwngz haemz gou ndaq gou, gou cungj nyinh lo.”

“Daxcej ha, gaej yienghneix naeuz.” Gyabuz ciep vah naeuz, “Doenghbi haenx, ranz mwngz hoj lai, ciengx song boux lwg mbouj yungz- heih. Gij saeh gvaqbae couh sat lo, dahlwg baenzlawz ndaej geiq gij caeuz daxmeh ne.”

Dahfang aen naj hai lumj vanamzgva, caeuq song boux daxmeh, mwngz coenz gou coenz, doxgangj diemzsubsub.(sat)