Ah Veij dwg lwg Simjmehveij, ndaej 15 bi lo, dwg ndaw lwgnyez gyoengqdou nienzgeij ceiq hung. De maij bak coi fwngz vix, mwngz yaek mbouj dingqgangj, de couh yak doiq mwngz. De mbouj suenq coengmingz, guh saeh moegloet, gangj vah miz di unqnemnem.

Ah Cang ndaej mingz daihngeih. Ah Cang mbouj suenq cangq, ndang sangreux, de caeuq gou ceiq ndei. De sang gvaq gou, ciengzseiz gag boux vunz he youq ndwi, mizseiz hix okdaeuj caeuq dou guhcaemz. Gizsaed de beij Ah Veij lij coengmingz.

Ciep roengzdaeuj dwg gou. Bonjlaiz gou buet ndaej gig swnh, camhseiz ndaej mingz daihsam, aenvih dahnuengx gou nyauxluenh, haih gou deng dingz roengzdaeuj yaep he.

Gou cingq naemj baenq gyaeuj doxdauq, mbouj dam dahnuengx gou seiz, doq fatyienh bonjfaenh gaenq doek daengz mingz daihseiq lo, baihbangx Ah Vaz gaenq mauhgvaq gou lo. Caiqlix, danghnaeuz gou caiq mbouj riengjret cung baenaj, Ah Ngux hix yaek gyaep hwnj gou lo.

Danghnaeuz caen yienghde, gou caen vutnaj lai lo. Gingqyienz buet mbouj gvaq dahmbwk, vanzlij dwg boux dah biz dem!

Ah Vaz seiqguengq caez yungh bin dwk, lumj duz moumeh fatbag nei buekmingh bin, daengx ndang cungj dwg hanh caeuq naez.

“Mwngz guh maz, lij mbouj dauqbae ra dahnuengx mwngz? Mwngz mbouj ndaejnyi de heuh mwngz ha? De deng sieng lo, caen hojlienz.” Ah Vaz gangjdawdaw, lumj dwg naeuz gou, gizsaed ndaw sim de angqyangz raixcaix. Baezneix de cungjsuenq miz gihvei mbouj you deng fad lo.

“Gou doq bae…… Gou itdingh mbouj deng saw hawj mwngz.” Gou mbouj nyienh youq dangqnaj de nyinhsaw.

Gou caen siengj dub dahnuengx gou. De baez nyauxluenh, gou hozndat naeuz de song coenz, doeklaeng haengjdingh dwg gou deng meh gou hat.

“Mwngz dwg daeggo, aeu ganq dahnuengx ndei.” Moix baez okdou, daxmeh cungj dwg yienghneix daengq.

“Gyawz in?” Gou rex dahnuengx hwnjdaeuj, ndaw uk lij naemj dwk bouxwnq, gyoengqde haengjdingh gaenq youq aen cungdaeuz gaxgonq couh bin hwnj dingjbya lo, gou ceiq laeng lo. Gou cij maqmuengh Ah Veij fad gou seiz roengzfwngz mbaeu di, gaej fad ndaej daiq haenq. Miz baez ndeu, doxdax ndaemraemx gou deng saw, de gingqyienz heuh gou daj ndaw cazoen buet gvaqbae.

“Gyawz in?”

“Gizneix.” De vix giz dabaeu hawj gou yawj.

“Mbouj youqgaenj, din mwngz deng veq ndwi. Yaep ndeu couh mbouj in lo.”

Gou gej gij saihaiz de okdaeuj, doeklaeng siujsim sisi bang de duet haiz, lumj bonjfaenh dwg canghyw nei. “Ndei di caengz?”

“Ndei di lo. Raeuz maranz baenz mbouj baenz? Gou gig hozhawq, caemhcaiq daxmeh……”

De gangj ndaej deng. Dou okdaeuj nanz lai lo, youh buet ndaej gig gyae, gaenq gvaq seiz gwn haeuxringz lo, daxdaiq itdingh cingq youq conghcueng muenghyawj dou dauqranz caengz.

Dienheiq oemmobmob. Dou youq gwnz roen maranz, baez yawjraen dah hung, couh maz cungj lumz caez. Lumj doenghgij maknganx ngaeux le nei, baez deng geij raq rumziq ci, couh caeuq bingqgaenq doxliz, bumbum doek roengz ndaw dah, ienqhoij mbouj caeux di bae mbaet daeuj gwn hix mbouj gib lo.(caengz sat)