Mbwk:

Nuengx dwg duj valienz

20 nienz

Youq gyang daemz gig iengj

Beix miz sim siengj lienh

Gaej sim ienq

Dawz ma cienq guh caz

Sai:

Ndaejnyi sing roeggut

Youq ndoenglaep

Song fwed ngut doxroengz

Ndaejnyi sing nuengx doengz

Unq baenz coeng

Hai hozloengz daeuj dap

Sai:

Youh daengz va moegmienz

Sam nyied dienh

Dujduj sien youh luenz

Siengj mbaet va hawj nuengx

Daj laj muengh

Fwngz youh duengh mbouj daengz

Mbwk doxhab:

Fungh siengj ciuz va

Couh cuenh roengzma lajgyaiq

Miz sim daengjdaih

Cogneix seiqgyaiq duh raeuz

Sai doxhab:

Geijlai seizcou

Rin lanh haij hawq mbouj gaij

Langh bya roengz haij

Ciengxlwenx cwxcaih vaiqvued

Mbwk:

Gaq diuz yiengzgiuz

Caez cuengq bae ciuz Dahlungz

Sai mbwk caez eu:

Doxbungz haeuj haw

Gangj vah gawqgawq diemzsi

Mbwk doxhab:

Duzgyau daz sei

Hoihhoih cug ndei giet muengx

Sai doxhab:

Roeghag mbin cuenh

Hai fwed menhmenh cuengq roengz

Sai mbwk caez eu:

Beixnuengx doxnyangz

Cungj dwg angqriu rim ndoi

Song dou guhdoih

Ronghndwen hoij mbwn caengz biek

Mbwk:

Godongz seizcin ma

Nga lawz nga mbouj did

Sai:

Vagut haeuj ndwengouj

Duj lawz duj mbouj rang

Mbwk doxhab:

Laengcin roegenq gvi

Youq daengz miz bwn hau

Sai doxhab:

Gooij haeuj ndwenbat

Lienz giz rag cungj diemz

Mbwk doxhab:

Gocieg youq ndaw ndoeng

Yiengh hix doengz go’gyoij

Sai doxhab:

Caeuq nuengx daeuj doxboiq

Sim rox oiq geijlai

Mbwk doxhab:

Mboujguenj cien leix gyae

Yien cingzsei

Menh cug ndei giet muengx

Sai doxhab:

Duzgyau daj song mbuengq

Doengsae cuenh

Daz sei duengh yiemhranz

Sai doxhab:

Godauz youq ndaw suen

Va hai luenz youh moq

Mbwk doxhab:

Byaleix youq ndaw mboq

Menh ra doh bae youz

Sai mbwk caez eu:

Byaleix youq ndaw mboq

Menh ra doh bae youz

（Vwnh Siujbei cingjleix）