Fwenraemxhaij (vunzbiengz heuhguh fwenraemxndaengq) Bwzhaij dwg Bwzhaij cungj fwenbiengz hung ndeu.“Raemxndaengq”dingq mingz couh rox dwg raemxhaij, Fwen- raemxhaij dwg fwen gwnz haij roxnaeuz henz haij, ca’mboujlai cungj dwg fwen bouxdwkbya rox- naeuz vunz ranzdan, hix gyonj heuhguh fwendwkbya.

Fwenraemxhaij Bwzhaij, ciuh- geq heuhguh fwen ranzdan, dwg cungj fwenbiengz ndeu, youq Bwzhaij daengj dieg cienzlah geij bak bi nanz, youz gyoengqvunz ranzdan youq guhhong gvaq saedceij ndawde aeu bak ciengq le cienz roengzdaeuj.

Gyoengq vunzdwkbya ciengz- baez youq gwnz haij dwkbya ndaejhoengq seizhaenx couh ciengq fwemraemxhaij, mizseiz vunz youq ruz doxgyawj hix doxdoiq ciengq fwen, baih neix ciengq liux baihhaenx han. Gij fwen gyoengqde ciengq haenx, lwnh ok gyoengqde doiq guhhong gvaq saedceij miz gamjcingz noengzna, yienh’ok gyoengqde miz saenqsim lai mbouj lau dai le hoenx langhhaij yak haenq. Gyoengq vunzdwkbya dwk ndaej haujlai bya le dauq ndaw baksok, hix gingciengz doxcomz giz gyawj ranz ciengq fwenraemxhaij, aeu neix daeuj lwnh ndaw sim gyoengqde ndaej fungsou le angqvauvau. Mizseiz doengh bouxcoz mbwksai doxiu bae gwnz raiq roxnaeuz ndaw ndoeng henz haij, ciengq fwenraemxhaij doxlwnh simngeix. Mbanj vunz- dwkbya ciengzbaez banhlaeuj coux- bawx haqlwg seizhaenx hix ciengq fwenraemxhaij, lwnh ndawsim ndek mbouj ndaej vunzranz.

Fwenraemxhaij Bwzhaij ndawde lwnh vunz rox gij saeh vunz ranzdan baengh haij ra gwn le miz maz bienqvaq. Doenggvaq singfwen neix yienh’ok le ndaw sim caeuq saedceij vunz ranzdan miz lai cungj lai yiengh.

Gij sing fwenraemxhaij Bwzhaij gag miz daegsaek, de sing sang goksasa, miz di sing van diemz- daeddaed, miz di sing unq raez- rengreng. Doenghgij yienghsing daeuz miz《Ciengq Cejranz》《Diuh Fwenraemxhaij》《Fwen Cibngeih Nyied Soengq Vunz》《Bouxsoengq》《Buenx Haq》《Haenh Vunzciuhgeq》daengj lai cungj. Moix coenz geijlai cih mbouj doxlumj caez, moix coenz fwen ndawde cih doeksat gingciengz aeu dawzyinh(yinhmeh doxlumj rox- naeuz doxgyawj), yienghsing coenz- fwen dingzlai ciuq cih bae dingh, hoeng cihboiq caeuq cih doeksat singdiuh deng doxlumj, vanzlij ne mboujguenj ciengq geijlai duenh, doenghgij gezgou baebaedauqdauq haenx cungj mbouj bienq.

Bi 2010, fwenraemxhaij Bwz- haij ginggvaq Gvangjsih Bouxcuengh Swcigih Yinzminz Cwngfuj doengz- eiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.