“Dahfang!” Dahfang caeuq gyabuz bingzmbaq daj ndaw bouqbuh byaij okdaeuj, lumjbaenz dingqnyi miz vunz heuh coh de. De ngeux gyaeuj bae ra, raen henz gai geij mij gyae miz mehsimj ndeu coh de vad fwngz. De sijsaeq baez ngonz, raen dwg Simjseiq ndaw mbanj, Dahfang byaij gvaqbae angqvauvau dongx de:“Simjseiq, dwg mwngz ya, haujlai nanz mbouj raen lo, mwngz caengz raen laux bw.” Simjseiq riugekgek naeuz:“Caengz laux dem, yaek rim 60 bi lo.” Dahfang yien gyabuz gvaqdaeuj, doiq Simjseiq gaisau naeuz:“Boux neix dwg gyabuz gou.” Simjseiq doiq gyabuz ngaek- gyaeuj sigsig, haenhbak naeuz:“Dahfang, mwngz cungjsuenq raen ngoenzndei lo.” Song boux mwngz coenz gou coenz, lumj miz vah gangj mbouj rox liux. Caenh he, Simjseiq rag fwngz Dahfang gvaq henz bae, doiq mbaw rwz Dahfang gangj sisi sebseb geij coenz, Dahfang sawqmwh najbyak nyaeuqnyat, Simjseiq byaij bae le, de lij ndwn youq gizhaenx ngaez- ngwdngwd. Gyabuz heuh de, de cij doeksaet ndiu gvaqma.

Seiz naenghci maranz, gyabuz raen Dahfang saeknaj mbwnggeugeu, couh hozunq cam de:“Haxbaenh mehsimj naeuz maz la?” Dahfang mbajmbwtmbwt naeuz:“Mbouj……mbouj miz maz. Meh, byaij haw naet lo, mwngz ing yiet yaep he ba.” Naeuz sat, baenq naj muengh ok cueng ci bae.

“Mwngz dingqnyi caengz, meh- ciengx mwngz deng vaiz daemj, hwet raek lo, ninz youq gwnz mbonq mbouj ndaej doenghdanh.” Simjseiq miz di biuh vunz deng cai nei, mbwnjbak riunyaen naeuz, “Vunzndei miz vunz coh, vunzyak duzfangz doz. Aenmbwn caen daraeh, ngoenzneix meh vunz neix dauqdaej deng bauqwngq lo, bemx lo.” Ci hai bae haujlai gyae lo, gij vah Simjseiq haxbaenh doiq de naeuz haenx, lij lumj raemxgoenj nei yiengjhuhu hap youq henz rwz Dahfang, baet cungj baet mbouj deuz.

Doengxhwnz, Dahfang ninz youq gwnz mbonq, lumj cien haeuxfaengx nei fan bae fonj dauq ninz mbouj ndaek. “Guh maz lo, caengz haeuj ninz ha.” Goenggvan lumj gangj vahloq naeuz coenz he, baez ngeng ndang youh gyaenfofo. Daeglwg ndaej 5 bi ninz youq cungqgyang song gvanbaz, hix ninz ndaej homfifi, gag dajbak cubcub. Dahfang ndiepgyaez cimyawj aen naj luenzlili caemhcaiq oiqnumnum lwg- iq, gij saeh seiz lwgnyez haenx youh lumj cuengq denyingj nei, baenz muq baenz muq fouz ok ndaw uk daeuj.

Dahfang haq daeuj seiz, gaenq naeuz bonjfaenh dwg lwggyax. Gizsaed Dahfang mbouj dwg lwggyax, de miz boh miz meh, lij miz daegnuengx ndeu. Hoeng, Dahfang dwg lwgciengx. Dahfang seiz 5 bi, bohmeh deng ci- hux gyanx dai lo, de couh baenz lwggyax lo. De caenh geiq ndaej, seiz de daejiekiek ra meh haenx, miz song boux vunzhung doq bang de uet raemxda doq lox de, umj de haeuj ranz bae. Songde ngoenzngoenz cawj haeux cawj noh hawj de gwn, lij cawx buhmoq hawj de daenj. Ciemhciemh, Dahfang lumz daxboh daxmeh caen seng de lo. De heuh song boux vunzhung neix guh daxboh daxmeh. Gij saedceij vuenyungz neix ngamq gvaq ndaej 3 bi, diuzmingh Dahfang youh deng bienq yiengh lo.

De geiq ndaej, bihaenx, daxmeh seng daegnuengx iq ndeu. Dahfang caeuq bohmeh angqfwngfwng lumj gvaqciet nei. Dahfang seizhaenx doeg siujyoz ngeih nienzgaep, cuengqhag maranz, de baez gveng daehsaw, couh buet haeuj rug daxmeh bae yawj daegnuengx iq. De mbaeumbeng- mbeng aeu fwngz gop aen naj oiqnumnum daegnuengx iq. Laeq iqetet neix caen dwggyaez ya, Dahfang cim de mbouj rox gaeuq. Daegnuengx okndwen le, daxmeh lij hawj Dahfang umj daegnuengx iq guhcaemz. Dahfang yawjraen daegnuengx ciemh ngoenz ciemh hung, raen de rox gwn souh lo, daxmeh heuh Dahfang bwnq de. Dahfang roxnyinh de dwg boux vunzhung, ndaej bang daxmeh dawz nuengx iq lo, de haisim dangqmaz. Gaenlaeng daxmeh heuh de bwnq haeux bwnq raemx hawj nuengx iq, de hix angqvauvau bae guh. Daxmeh heuh de hawj nuengx iq siq nyouh gingq haex, de hix mbouj yiemz saek coenz vah. Daxmeh caen dawz de dangguh boux vunzhung ndeu daeuj sawj lo.

Gvaq buenq bi le, daxmeh mbouj ndaej youq ranz lo, de yaek bae guh hongreih hongnaz dajndaem ma ciengx lwg. Moix baez cuengqhag maranz, Dahfang caiq hix mbouj ndaejhoengq bae caeuq gyoengq nyezdoih diuqcag guh’angq lo. Ngamq bwnq haeux hawj nuengx iq sat, daxmeh youh hat de bae ndaw reih gvej byaekmou. Ngamq baegfofo rap byaekmou yamq haeuj ranz, daxmeh youh hemq de bae gueng mou gueng gaeq. Nyaengq daengz gwn caeuz sat, Dahfang gaenq baiqda subsub, cozyez hix mbouj ndaej sij. Gij yozsiz cingzcik de daj ndaw ban sam mingz baihnaj doek daengz sam mingz baihlaeng, lauxsae cam de vihmaz, de raemxda gvaengxloekloek, mbouj gamj naeuz, de lau daxmeh rox le aeu faexsaeq fad de.

Dahfang mizseiz maranz haemh di, de cij ndaej gwn gij haeuxlw byaeklw gwnz daiz. De baenzhwnz dungxiek ndiu geij baez. Dahfang cij ndaej gag ndwnj raemxda roengz dungx bae. Doegsaw daengz siujyoz bizyez le, bohmeh caiq hix mbouj hawj de hwnj hag lo. 12 bi lwgnyez couh ngoenzngoenz deng bik hwnj ndoi bae langh vaiz. Mehciengx simnyap seiz, lij dawz de guh congh’okheiq, mbouj dwg swenj couhdwg moeb. Gij naengnoh Dahfang ciengzseiz dwg giz aeuj giz ndaem.

Miz baez he, nditndat haenq baenz feiz, Dahfang youq gwnz ndoi langh vaiz, gyaeujngunh daraiz, ma daengz ranz, gaenq ga unq ndang nyieg, de cengqgengz nda gu cawj haeuxcaeuz, caux feiz ndei le, bamq youq gwnz daizhaeux ninz ndaek lo. Mbouj rox seizlawz, de sawqmwh roxnyinh gwnz ndang sepyanyan, byaengq da baez yawj, caenh raen mehciengx song da lumj byoq feiz fofo, yaengx diuz faexbien fwd de “bobbob”, lij hat:“Hawj mwngz ninz! Heuh mwngz bae dai!” Fad sat, mehciengx hujdengdeng bae biengj fagu, raq haeuxremj ndeu doq cung haeuj conghndaeng Dahfang daeuj. De roxnyinh bonjfaenh cauhhux lo, doq lumj duzma caeg gwn mokmou le lau bouxcawj moebhoenx nei buet ok rog bae ndoj. Haemhhaenx, Dahfang gutgungq youq lajroq bouxwnq, de youh iek youh naet, geijlai muengh daxmeh daeuj heuh de maranz, heuh de ma gwn haeux ho. Hoeng Dahfang saetmuengh lo.

Doeklaeng lij dwg Simjseiq yawjraen le, yien de haeuj ranz, daek haeux hawj de gwn. Dahfang doq nyaij haeux doq raemxda loenqbyoegbyoeg. Simjseiq nai de naeuz:“Gaej siengsim lai, baezlaeng mbouj miz gwn, couh daeuj ranz Simjseiq gwn.” Cienq naj gvaqbae youh ndatheiq fodfod ndaq:“Bonjfaenh mbouj miz lwg, couh umj vunz ma ciengx; bonjfaenh miz lwg le, youh yawj vunz mbouj dij. Song duz vunz neix, simnduk baenzlai, yak gvaq duzguk bae.” Dahfang rox dwg Simjseiq ndaq bohciengx meh- ciengx de, raemxda youh lumj fwnraq nei, doekbyoegbyoeg roengz vanj- haeux bae.

Youq ndaw ranz neix, dingq bohmeh doxceng doxdwk dwg gij saeh bingzciengz ndeu. “Doj! Doj! Doj dwk gya baih siksanq, gwn haexvaiz bae!” Daxmeh doq swenj doq boemz vanj boemz rek. “Bap!” Daxboh huj dangq byajraez, coh daxmeh haenqrengz fak mbat angjfwngz he. Gij sing daej- nganga daxmeh couh lumj gvaqcieng gaj mou nei cienz doh daengx mbanj. Moix baez yawj gijneix, Dahfang couh ndang saenzdwddwd rag fwngz daegnuengx, deuz ok rog bae ndoj- youq.

Aen ranz neix caen youq mbouj roengzbae lo. 16 bi bihaenx, Dahfang iu dahdoih ndaw mbanj caegcaeg deuz okrog bae dajgoeng. Daj lizhai ranz mehciengx le, Dahfang caiq mbouj nyienh maranz lo. Youq aen gungh- cangj guh mad ndeu guhhong song bi le, miz daeg mbauq ndeu ciengzseiz ra de gangj vah, ciengzseiz gvensim de, de roxnyinh dungx raeujrubrub. Gvaq 4 bi, Dahfang haq hawj daegmbauq haenx lo. Hoeng de gig lau haeuj ranz daegmbauq bae, de lau gyabuz lumj mehciengx nei yawj de mbouj dij. Doeklaeng, daegmbauq ngaeuq sam ngaeuq seiq, de cij dapwngq bae ranz yawjyawj, hoeng, de caeuq daegmbauq gangjdingh, baenzgya le, mbouj bae ranz caeuq bohmeh caemhyouq.

（caengz sat）