Cien lai bi daeuj, gij fwen cienzlah youq Denzdungh haenx miz Fwennganx、Fwenleux、Fwennoengz daengj. Fwennganx dwg cungj fwen Bouxcuengh ndeu, dingzlai cienzlah youq Lingzyinz、Lozyez、Denzlinz、Baksaeg、Denzyangz、Denzdungh、Bahmaj daengj.

Vunzbiengz gangj“Fwennganx Bouxcuengh Denzdungh”, Vah- cuengh dangdieg soh heuhguh“Fwennganx”. Youh ndaw Denz- dungh Yen Fwennganx cienzlah youq Bingzmaj Cin、Siengzcouh Cin、Nazbaz Cin、Yihih Cin、Sozliengz Cin. Ndawde aeu Yihih Cin guh ranghdieg daeuz, dieg de bauj miz Fwennganx ceiq caezcienz.

Youq ndaw fwen Bouxcuengh ndawde, Fwennganx dwg cungj fwen youqgaenj dangqmaz ndeu. Vunz- biengz hix heuhguh“fwenbaiz”, couhdwg baenz baiz baenz coij ciengq roengzbae, ciengq le aeu gangj sat gij naemjngeix liux bae; cit fwen miz dinj rae, cit dinj miz cib lai ngeih cib coij, cit raez miz geij bak coij roxnaeuz cien coij doxhwnj. Fwennganx aeu geijlai coenz caeuq geijlai coij dwg ciuq neiyungz bae dingh, moix coij aeu haj cih roxnaeuz caet cih guh goekdaej, mizseiz lij gya’raez dem. Fwennganx ndawde miz“doenghyiengh”lai, miz di Fwennganx son cihsiz lizsij caeuq hongreihnaz, youh miz fwen daejhaq、fwen soengqfaex (dawz bouxdai bae moek)、fwen ndoj haq daengj; ndawde fwen guhyoux ceiq lai, faen miz mbatit raennaj(cam singq、cam coh、cam mbanj、cam ranz、cam gyae、cam gyawj、cam song、cam dog daengj)、sawq sim、gyau sim、dingh youx、doxbaengh、doxmbek、dox- ngeix、gangj haemz、okbae、an gya daemgj.

20 sigij 80 nienzdaih gaxgonq, Fwennganx Denzdungh hwngfat ne mizseiz hoengh mizseiz caem. Daengz le 80 nienzdaih, guekgya lai yawjnaek vwnzva cojcienz ndaw- biengz, Fwennganx hix ndaej fuk- dauq caeuq hwngfat lo, hoeng vunz guh Fwennganx beij gaxgonq noix haujlai, Fwennganx hwngfat mbouj ndei, deng doekbaih lai, yaek saetcienz bae.

Lai bi daeuj, Denzdungh Yen caeuq Yihih、Nazbaz Cin moix bi cungj ok cienzngaenz hawj vunzlai dangdieg guh hawfwen caeuq coih gizdieg guhfwen, gyoebcomz vunzlai ndawciengz hai daiz beij fwen, yienghneix cwngfuj guhdaeuz daz- yinx、vunzlai camgya le couh lai ndei henhoh Fwennganx, hawj Fwennganx lai ndei hwngfat.

Bi 2010, Fwennganx Boux- cuengh Denzdungh ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.