Bineix ndwen 9 ngoenz 3 hauh dwg ngoenz geiqniemh dingjhoenx Yizbwnj ndaej hingz 74 hopbi guek raeuz. Ngoenzde gou riengz geij boux- daeuz hagdangz Nazheuj roengz mbanj bae Ndoidoengzguj Siujyoz guh aen hozdung gyaez guek gyauyuz nem geiqniemh boux hoenxciengq vut- mingh.

Ndoidoengzguj Siujyoz gizsaed dwg aen diemjsonhag lajmbanj iqet ndeu, gvi hagdangz Nazheuj guenj, ranzhag couh hwnj youq lajdin Ndoidoengzguj, gij lwgnyez Siuj- muenx、Daihniq、Ranzdoeng caeuq Nazmaenz geij aen mbanj iq lajdin Ndoidoengzguj cungj comz daeuj gizneix haeujhag doegsaw. Aenvih geij aen mbanj neix dingzlai vunz cungj daengx ranz bae baihrog dajgoeng, mbouj miz maz vunz youq ranz guh nazreih, ndigah aen diemjsonhag neix lwghag gig noix, mbouj rim 20 boux, ngamq miz song boux lauxsae.

Vunz cungj naeuz Ndoidoengzguj dwg gizdieg gaeuq dingjhoenx Yizbwnj ndeu, gou caeuq yaucangj Lij Swngcwngz、hagdangz dangjcihbu suhgi Siz Gozyen geij boux, daiq cungj simcingz gingqfug bouxak ciuhgonq, heuh goenglaux Lij Vwnzdoh Mbanj- ranzdoeng daiq roen hwnj dingj ndoi bae yawjyawj. It loh hwnjbae, diegndoi youh lingq youh nya, gohaz go’em gosiek gogut deihndwtdwt, lwgnim lwgyid lwgcaemjconq lwglauxleix baenz foengq baenz roix, faexbek faexmiek faexraq faexgauj gogo daengjcup raemhrwd, gaeunajreuq gaeudannding gaeugat gaeu’maenz- haeuxremj banh gwnzfaex geuj- nangnang, hawj vunz roxnyinh lumj gaenq byaij haeuj ndoengfaex ranghdieg hwngqndat bae nei. “Bin daengz gwnz ndoi sang, vang yawj gizgiz daemq”, dou ndwn gwnz dingjndoi yawj coh baihsaenamz, raen diuz roen gaeuq Yungh-Ginh goengloh yienhsag lajda cingcing cujcuj.

Ndoidoengzguj yiengh ndoi luenz lumj aen gyongdoengz, diegndoi mienhcik daih’iek 8 bingzfueng goengleix, baihsaebaek gvi Nanzningz Si Liengzging Gih Nazheuj guenj, gizneix ndoi sang lueg laeg, heih souj hoj gung. Duenh roen Yungh-Ginh goengloh gvaq giz henzgyawj neix miz Giuzmbanjbien、Giuznazbenj、Giuz- nanzvanq daengj doengh diuz giuz doiq hoenxciengq daeuj gangj gig youqgaenj. Doenghbaez bingdoih Cungguek uk caen gvai, rox youq gizneix dingjhoenx fangzraq Yiz- bwnj.

Gou raen miz di geizheih, doengh aen mbanj wnq vunz cungj doxcanj hai ndoi ndaem faex suzswngh’anh, ciemhciemh byaij hwnj lohfouq, vihmaz gizneix diegndoi nyaenx lai lij ce fwz, nanzdauh gyoengq vunzmbanj gizneix mbouj ngah ngaenz? Gou ngeizvaeg cam goeng Lij Vwnzdoh, de naeuz:“Dou gizneix gyoengq bouxcoz cungj mbouj youq ranz, mbouj miz byawz daeuj guh. Geij bi gonq caemh miz lauxbanj baihrog daeuj yawj gvaq, yaek ok ngaenz cingzbau Ndoidoengz- guj ndaem faex, geij bouxdaeuz ndawmbanj doxyaeng gvaq le, mbouj nyienh bau hawj de, ce daeuj nai gij hoenz doenghboux dingjhoenx Yiz- bwnj vutmingh.”

Gou gag roxnyinh simgenx, geij ngoenz gonq gou daegdaengq cazyawj《Yunghningz Yen Ci》gvaq, mbouj raen duenh lizsij neix ndaej ciengz- saeq geiq roengzdaeuj. Gou nyaenx mbouj ndaej, gag ngon hot fwen:

“Bin hwnj Ndoidoengzguj,

Maknguh naeuh lajdin,

Gizgiz nyungzndoeng mbin,

Ndawsim naekgywggywg.

Bing seizgonq dwgrengz,

Ndokgoet gveng denh neix,

Dainanh mbouj vunz daej,

Saeh gvaq mbouj vunz cam.”

Daj gwnz ndoi roengzma le, dou cujciz gyoengq lauxsae、hagseng、vunzmbanj baizdoih swng guekgeiz caez ciengq guekgo, naj coh Ndoi- doengzguj mwzaih 3 faencung, geiq- niemh doengh boux dingjhoenx Yiz- bwnj deng vutmingh. Lij biujyienj ciengq go 《Gou Caeuq Aen Guekcoj Duh Gou》, dawz diengzbingj daeuj baen hawj vunzlai caez gwn, hawj caezgya ndaej gamjsouh guek raeuz ndwenngoenz diemzvan. Caemhcaiq cingj goenggeq ndawmbanj gangjlwnh gij gojsaeh dingjhoenx Yizbwnj caeuq fangzraq Yizbwnj haeuj mbanj daeuj guh gij saeh vaih saeh luenh.

Bi 1939 ndwen 11, daihbouhdoih fangzraq Yizbwnj giengzhengz daj Ginhcouhvanh hwnj hamq hoenx ciemq haeuj singz Ginhcouh le, youh yungh feihgih coq cadan caq Haw Siujdoengj mokmok mekmek bae.

Fangzraq Yizbwnj bing ak cungq ndei, hoenx haeuj Ginhcouh、Lingz- sanh、Siujdoengj cungj mbouj miz vunz dingj ndaej youq, gyoengqde haeuj daengz gyawz cungj coemh feiz gaj vunz ciengjaeu doxgaiq, lij apbik bouxcoz ndangrengz bae guhhong, coengh gyoengqde ramgwed daehyinh gak cungj doenghyiengh hoenxciengq aeu yungh. Mbanjsiujmuenx boux duicangj geq Lij Vwnzswng naeuz dou nyi, bihaenx Ndoidoengzguj hoenx- ciengq, de ngamq ndaej 3 bi, riengz bouxlaux deuz haeuj lueglaeg laeng Mbanjdaihniq bae. Mwhde feihgih Yizbwnj seiqvaenz seiqlengq gwq coq cadan caq, doenghboux mehmbwk umj lwgsaeq cungj aeu benq sujbaq ndeu goemq bak goemq ndaeng lwgnding mbouj hawj daej oksing, lau lwgnyez daej deng fangzraq Yizbwnj rox miz vunz ndoj youq neix daengx mbanj cungj deng nanh. Lij Vwnzswng naeuz de miz dahnuengx ndeu, mwh umj youq ndaw rungj daxmeh doq daej doq gwn cij, feihgih Yizbwnj gvaengxgvax gwnz gyaeuj nanznanz mbouj deuz, daxmeh vih mbouj hawj de oksing, yungh sujbaq goemq bak goemq ndaeng dahnuengx iq ndaet lai deng mbaetheiq dai bae.

Mwh Yizbwnj ngamq ciemq haeuj Haw Siujdoengj, Cungguek raeuz sikhaek baij bingdoih Guengjsae 175 swh 525 donz lienzhab Siuj- doengj、Nazheuj gij minzcung dingj- hoenx Yizbwnj cap hwnj Ndoi- doengzguj, caemhcaiq caqcak Giuz- mbanjbien caeuq Giuznazbenj bae, laengzdangj mbouj hawj fangzraq Yizbwnj hwnj Namzningz.

Fangzraq Yizbwnj ciemq Ginh- couh caeuq Siujdoengj le, sikhaek diuh bing yaek cung hwnj Nanzningz, daengz neix raen Giuznazbenj、Giuz- mbanjbien deng caq lak, vih baujcwng gij bing gij bikmax cungqbauq gyoengqde ndaej daeh gvaqbae, couh haeuj geij mbanj gyawj ap vunz daeuj guhhong, cek ranz aeu cien aeu faex bae dap giuz. Gij vunz deng ap bae guhhong haenx, danghnaeuz byawz caeg ndojgik saekdi couh sikhaek dangciengz deng gaj dai.

“Yizbwnj hangz yied haenq, vunzmbanj couh yied haemz. Doengh bouxcoz cungj gaem cungq dingj- hoenx.” Henzgaenh geij aen mbanj bouxboux cungj haemz fangzraq Yizbwnj haeuj ndok haeuj ngviz bae, gij hauxseng mizrengz cungj doxcanj dawz cungq dawz cax gaenriengz bingdoih guek raeuz bae dingjhoenx. Vunz raeuz cap maenh Ndoidoengzguj, fangzraq Yizbwnj coih roen dap giuz lai baez cungj deng gij vunz raeuz dwkhoenx, deng dai deng sieng mbouj noix. Fangzraq Yizbwnj fouzfap fuk dap giuz, itseiz mbouj ndaej hoenx haeuj Nanzningz, hozgaek raixcaix, couh aeu feihgih daeuj luenh caq geij aen mbanj henzgyawj loemqloemq laklak bae.

Bingdoih Cungguek buekdai bae dwkhoenx. Gyoengq fangzraq Yizbwnj baen geij buek bing daj baih Geuqcwzdaeg cung hwnjbae cungj deng siumied dai liux. Fangzraq Yizbwnj vihliux ciemq daengx Guengjsae, dem engq lai bing daeuj dwk hoenx Ndoidoengzguj. Bingdoih Cungguek dingjhoenx le 7 ngoenz 7 hwnz, doeklaeng aenvih baih Cung- guek raeuz gak cungj doenghyiengh hoenxciengq aeu yungh mbouj ndaej gibseiz soengq daeuj bouj, “bikmax duenh haeuxgwn gat”, doeklaeng daengx gyoengq guenbing caeuq ginzcung 300 lai vunz deng feihgih daihbauq Yizbwnj haenq caq cienzbouh deng nanh. Dingqnaeuz mbat ciengq neix bing Yizbwnj hix deng dai bae gaenh 1000 vunz, seihaiz ringx rim bangx ndoi、ndaw naz、ndaw ndoeng、henz roen, gizgiz cungj miz.

Bingdoih Guengjsae 175 swh 525 donz baez youq Ndoidoengzguj dingjhoenx fangzraq Yizbwnj yienz- naeuz doeklaeng saetbaih caemhcaiq baih ndaej gig camj, hoeng cix ndaej laengzdangj fangzraq Yizbwnj geij ngoenz, ndaej bangrengz guek raeuz caeuq Yizbwnj hoenx mbat Gveinanz Veican lailai, hawj daihbouhdoih guek raeuz hoenx ciengz ciengq Gunh- lunzgvanh Canyiz ceng ndaej cuk- gaeuq seizgan guh cunjbei. Doengzseiz daejyienh ok le gij cingsaenz boux- bing bouxbeksingq doxgiet dingj- hoenx caemhcaiq mbouj fug baihrog daeuj hangz.

Banhaemh, dou yaek dauqbae lo, raq rumz iq ndeu ci gvaqdaeuj liengzyauyau, mbaw geiznding hajsing naj ranz aen hagdangz iqetet swnh- rumz mbinyagyag. Lij yaucangj sim naekdumdum dingh ndwn le haujlai nanz, haibak eu fwen:

“Yizbwnj dangq raemx haeuj,

Ndoi sang daeuj saek fai,

Bouxbing gyaez guek lai,

Buekdai bae dingjhoenx.

Dieg hoenxciengq doenghbaez,

Seizneix hwnj ranzhag,

Geiznding mbinyagyag,

Guek raeuz ak dangqmaz.”