Moix baez dingqnyi gij singgo ciengq dwk:“Daxboh geq gou, dwg boux vunz gou ceiq gyaez, gij vandiemz ndawbiengz miz cibfaen, mwngz cij cimz le sam faen……” Raemxda cungj mbouj rox mbouj nyinh coux rim gvaengxda, mbouj rox mbouj nyinh, gou youh geiq hwnj gij ndwenngoenz youh soemj youh haemz seiz iq daeuj.

Cungj naeuz gij gyaez daxmeh lumj raemx, gij gyaez daxboh lumj bya, coenz vah neix di he hix mbouj gyaj.

Daxboh gou ciuhvunz youq lajmbanj guh hongreih hongnaz, vunz sienh sim youh soh, vah noix vunz gaenx hong. Daxboh doekseng youq 40 nienzdaih, youh dwg lwgdog, ndigah diuz rap gwnz mbaq de beij bouxwnq cungj naek ndaej lai. De yienznaeuz cij dwg boux vunz gig bingzciengz, hoeng youq ndaw da gou, daxboh couh sang lumj goengq bya nei yienhda. Doenghbaez ndwenngoenz haemzhoj, vih gaijbienq gwndaenj ndaw ranz, daxboh gwn le geijlai haemzhoj dou cungj mbouj rox, lae le geijlai hanh dou cungj mbouj ndaej raen. Ndaw ranz miz 8 beixnuengx, bakgwn lai fwngzhong siuj, gaej gangj miz ndangdaenj, hawj daengx ranz vunz ra haeux gwn, daengz can ndaej gwn imq hix gig mbouj yungzheih.

Seizhaenx caengz miz ranzlaeuz, lajmbanj cungj dwg youq ranznamh ranzvax. Dou hung iq 12 boux vunz, cij caenx youq aen ranz song fungh rug he. Youq ranznamh, ninz congzfaex, seizcik gvaq ndaej lij suenq liengz, daengz seiznit couh gig nanzgvaq lo. Gij haemzhoj seizde, ciuhvunz gou cungj mbouj ndaej lumz: Banngoenz seiznit, dou hozhaenz doengh boux lwg ranzmiz miz buhlangj raeuj ndang, dou cij ndaej daenj buhdan gvaq ngoenz. Mizseiz nit lai aeu sonx sam seiq geu buhdan, daxboh lau dou nit lai dingj mbouj ndaej, moix ngoenz cungj daengq dou youq hagdangz langh roxnyinh nit lai couh diuqyetyet, roxnaeuz doxgyaep guhcaemz. Baenz- neix dou banngoenz buetbuet gyaep- gyaep hix couh gvaq ngoenz lo. Banhaemh, aen congz demh caengz fiengz naniengnieng, gij rumz lij daj laj congz bik daengz ndaw ndang daeuj haenqndwt.

Neix mbouj miz maz, ceiq youqgaenj couhdwg dungxiek. Doiq doengh ranz miz daenj miz gwn daeuj gangj, mbwn laep baez yaep da couh daengz rongh lo. Hoeng youq seiz gwn donq gwnz iek donq laj haenx, dou ciengzciengz youh nit youh iek. Seizhaenx ndawranz haeux noix rek hung, moix ngoenz moix can cungj dwg aenq haeux cawj gwn, haeux ndaw daeh aeu gwn daengz haicin bae.

Gou ndaej geiq baez daengz seizdoeng, ndawranz yo gijgwn cungj dwg lwgmaenz, aen rug gyang ding, gungx dou laj roq, couhcinj youq gyaeuj congz laj congz, cungj baij rim oet rim lwgmaenz hunghung iqiq, aen raez aen dinj…… Gij maenz ngamq sou haeuj ranz, dawz bae aeu raemx swiqswiq couh oet haeuj bak bae haeb gwn, daxmeh ciengz naeuz gij yiengh dou gwn maenz couh lumj nouraeg nei, gaemz dem gaemz haeb ndaej youh deih gwn ndaej youh van. Dou ngoenz he sam can, cungj dwg gwn maenz gvaq ngoenz, banhaet dwg dumq maenz, daengz banngaiz lij dwg boux he aen maenzdumq, caiq hawj song aen maenzndip, couh daengz ban- haemh. Banhaemh itbuen dwg cawj cukmaenz, ndawde haeux noix maenz lai. Moix baez cungj cawj ndaej loq gwg di, dou vanj dem vanj gwn ndaej vansubsub, gig mizfeih. Mizseiz vez dwk gu seuqsat le lij riz bakvanj dem. Daxboh yawj dwk mbouj guhsing, mbouj riu saekdi, gou rox daxboh ndawsim gig nanzsouh. Yawjraen de haet ok haemh dauq bae guhhong baeg lai, gou hix yied gaenx doegsaw, moix aen haggeiz cungj gauj ndaej ndei.

Dou gyoengq beixnuengx yied daeuj yied majhung, okrog dou aeu ngaenz doegsaw, haeuj ranz dou aeu ngaiz maj ndang, diuz rap gwnz mbaq daxboh engq naek lo, hoeng dungxiek lij ngoenzngoenz bik ndaej dou dwglau. Ngoenzsinghgiz dou cungj gag rox bae bang hong. Caeuq bohmeh youq ndaw reih guhhong, gou ciengzciengz raen daxboh doq aeu genbuh uet gij hanh gwnz najbyak, doq aj bak diemheiq huhu, gou gig sim’in, caen maqmuengh bonjfaenh ndaej vaiqdi majhung, rox ra ngaenz dauq, hawj daxboh daxmeh mbouj aeu baenzneix baeg. Banhaemh sou hong dauqranz byaij gvaq doengh ranz cauj noh cauj byaek rangngaungau, dou cungj nyaenx mbouj ndaej ndwnj myaiz byoegbyoeg, ndawsim caen maqmuengh ndaej cimz di couh habhoz lo.

Daxmeh ciengz gangj coenz vah ndeu:“Gven dou gwn mbawngaih cungj mbouj miz vunz yawj ndaej raen, hai dou okrog bae guh maz hix aeu gaen ndaej doiq, gaej hawj vunzrog yawj siuj bonjfaenh.” Dungxiek dwg- lau, saenzcingz baedauq hix dwglau. Lumj bae mbanj guh hek, ok haeux youh aeu ok cienz.

Geiq ndaej miz baez he, buzgux haq Mbanjlouz yaek aeu bawx, cingj ranzdaiq gyoengq beixnuengx bae guh hek goenghoh. Daxboh dingqnyi aen siusik le, de gag boux naengh youq ndaw ding mbouj guhsing, doeklaeng mbouj miz banhfap cij ndaej dawz song duz gaeqmeh ndaw rungz bae gai, vuenh ndaej 10 maenz ngaenz bae guh cienzlaex. Daengz ngoenz bae mbanj, daxboh couh gaen gyoengq aulungz bae gwn laeuj.

Dou geij dahnuengx youq ranz baizdoih naengh laj roq caj daxboh dauqma, gak boux ndawsim cungj miz faenh maqmuengh diemzsisi ndeu. Caj dwk muengh dwk, cigdaengz daeng- ngoenz ringx daengz baih bya, cij raen daxboh daj gyaeuj loh ndaw mbanj coh ranz byaij daeuj. Dou raen le cungj angqfwngfwng, buet bae humx daxboh. “Menqnyaeq gou ha, sou cai daxboh dawz ndaej maz dauq hawj sou?” Daxboh daegdaengq daeuq naeuz. Cij raen daxboh gyajcang aeu fwngz luengxluengx daehbuh, youh mbon- mbon daehvaq…… Gip ndaej dou simhumz ndaej daemh din bae.

Ciepdwk daxboh lumj dwkfap nei daj ndaw daehbiu mbon ok geij naed diengz oet haeuj ndaw fwngz dou daeuj, boux song naed. Gou ciep aeu song naed diengz gvaqdaeuj, sim’angq ndaej mbekhai ceijdiengz couh dawz naeddiengz ndeu oet haeuj bak daxboh bae. Hainduj Daxboh liuh mbouj daengz, doeklaeng hix riunyumnyum caeuq dou caez gwn. “Caen van ha!” De doq haenh doq youh luengx haeuj ndaw daehbuh bae. Baezneix de dawz aen bingzgoj hoengzgywggywg ndeu youq gyang fwngz. “Va!” Dou caez sing hemq hwnjdaeuj. Daxboh heuh cejdaih dawz bae swiq seuq buq le faen hawj dou geij beixnuengx gwn.

“Daxboh, daj gizlawz ndaej bingzgoj daeuj?” Gou geizheih dwk cam de. Daxboh naeuz:“Ngoenzneix youq ndaw rug caeuq buzgux lwnhgoj, buzgux caegcaeg oet haeuj daehvaq gou daeuj. De naeuz gou ciengx gyoengq lwg dwgrengz lai, hawj gou gwn le bouj di ndangdaej. Gou mbouj gyaez gwn……” Caengz caj daxboh gangj sat, raemxda gou youh coux ndaej song da myoxmyad lo. Youq seizhaenx, daengx ndang gou cungj dwg gij gyaez daxboh raeujsim youh naekgywg heux dwk, heux ndaej ndaetfwdfwd.

Gyaez daengz gizlaeg lumj maesei, aen bingzgoj ndaw fwngz daxboh, hoengzfwgfwg lumj aen sim daxboh gyaez lwg, youzyubyub lumj faenh cingz naekgywg daxboh gyaez lwg. Faenh gyaez neix, raeuj sim youh hungmbwk, gij gyaez youq ndaw ndwenngoenz gig haemzhoj gig gannanz, hawj gou geiq youq ndawsim laegngaungau, daengz seizneix hix mbouj ndaej lumz.

Geiq ndaej miz boux cozgyah baenzneix gangj:“Daxboh dwg bonj saw nanwt youh doenghsim ndeu, mwngz doeg doeng de le, mwngz couh doeg doeng seiqvunz lo.” Dwg gij gyaez daxboh son gou rox baenzlawz gvaq ndei gij ndwenngoenz gungzhoj, roengzrengz byaij coh baihnaj.