Goj“Laujgyau”Binhyangz dwg vwnzyoz bakgangj, caeuq doenghgij vwnzyoz yisuz ndawbiengz wnq dox- beij, gij fuengsik cienzlah de linghgag dangqmaz, couhdwg: Boux gangj gojgaeq de mboujguenj miz mbouj miz vwnzva roxnaeuz rox mbouj rox saw, mboujguenj guh maz hong, mboujguenj nienzgeij geq iq, mbouj- guenj mbwk sai, cijaeu de rox aen goj“Laujgyau”ndeu couh ndaej lwnh hawj bouxwnq dingq: Gangj gojgaeq seiz mboujguenj dwg seizlawz、gizlawz, mboujguenj bouxdingq lai noix, seizlawz gizlawz cungj gangj ndaej. Goj“Laujgyau”cienzlah doh daengx yienh ndawsingz lajmbanj, cienzlah dieg gvangq, lizsij nanz raez.

Goj“Laujgyau”dwg cungj yisuz ndawbiengz vunzlai dangdieg gyaez gangj maij dingq. Ndawde miz haujlai goj aeu gij saeh gvendaengz saedceij lajmbanj dangdieg guhgoek daeuj bien baenz, miz haujlai daegdiemj gvendaengz sibgvenq vunz dangdieg caeuq sibgvenq gvaq saedceij baenz- lawz hengzguh. Doenghgij goj miz raez miz dinj, gangj saeh lai cungj lai yiengh. Moix aen goj“Laujgyau”ndawde, cungj yienh’ok“Laujgyau”uklingz coengmingz、dungxcaiz ndei gvaq vunz. Bouxlwnh gojgaeq haenx maij yungh vah dangdieg gangj, miz di bouxlwnh baengh coenh vah dangdieg caeuq vah ndaw goj gij sing doxgyawj bae lwnh, neix couh lwnh baenz aen gojgaeq yinx vunz riuhaha bae, neix miz gij daegdiemj minzcuz dangdieg yienhda dangqmaz.

Goj“Laujgyau”youq Binhyangz cienzlah haujlai nanz lo, daj miz daeuj de baenzlawz bienqvaq mbouj cingcuj, daihbouhfaenh dwg bakriuz roengzdaeuj.“Laujgyau”dwg boux- yiengh vunz Binhyangz guhvunz lauxsaed gangj vah suenq vah、sim ndei maij hek、uk lingz coengmingz、gaenxguh akguh、 mbouj lau boux miz gienz.“Laujgyau”dwg dangseiz ndawbiengz gyoengqvunz gungzhoj ndawde boux ndeu, de uklingz sim- gvai, gvej bouxmiz coengh bouxhoj, fad hakdam, vet caeuq fad doengh- boux vunzdungxrwix vunzhengzyak, coengh vunzlai okheiq, yienghneix guh le, vunzlai couh aeueiq hawj de caemhcaiq haenhndei de, yienghneix couhdwg gij goekgaen vihmaz goj“Laujgyau”ndaej youq ndawbiengz cienzlah swnjcienz roengzdaeuj hauj- lai nanz haenx.

Bi 1984, boux ranzcoj youq Binhyangz heuhguh Liengz Beiminz ciuq doenghgij gojgaeq de caeuq yienh vwnva’gvanj guhdoih soucomz、cingjleix ndaej haenx bien baenz bonj siujsoz raez《Laujgyau》, daengz laeng youh gaijbien baenz densigi《Go’gyau》

Bi 1992, Fuzgen Yingjsi Cauh- guh Cungsim ingjguh baenz densigi《Go’gyau》. Bi 1993 ndaej youq Cunghyangh Densidaiz book, neix le rogguek miz 50 lai aen guekgya caeuq digih gonqlaeng book.《Go- gyau》 dwg bouh densigi guhyoux angq ndeu, gangj vunzcoz Boux- cuengh baengh uklingz dungxcaiz lai gaijbienq diegvih caeuq mingzyinh. Ndawde gangj bouxcoz ndeu heuhguh Go’gyau, de seiziq ranz hoj, baengh dwkfwnz gwn, de ukgyaeuj lingz, caeuq dicuj doxdaeuq, caeuq boux- hak doxdaeuq, caeuq bouxvuengz doxdaeuq, caeuq mbwn doxdaeuq. Doeklaeng, Go’gyau hingz lo, ndaej aeu dahngeih ranz dicuj heuhguh Ahlenz guh baz.

Ndaw dendsi neix couh miz mbangj goj daj ndaw goj Laujgyau supaeu gij saeh caeuq ginggvaq daeuz, lumj gij goj《Faen Cwzvaiz》《Hoh Gyaeu》《Genj Gwiz》《Uklingz Mbaet Ndaej Makmbei》 daengj.

Bi 2010, Goj“Laujgyau”Binh- yangz ginggvaq Gvangjsih Boux- cuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.