Daeggveij diemj ci ien ndeu, boux dog goengzyongq youq doiqnaj aen ranzlaeuz swhgeij, doq cit ien doq yawj aen laeuz 5 caengz sang neix.

Aen laeuz neix hwnj baenz caengz rim 5 bi, ranz de daeuj daengz aen laeuz moq neix youq lij caengz sug, ranznden caeuq ranznden lij caengz roxnaj caez, aen ranz swhgeij lij lumj dwg aen ranz bouxwnq nei, seizneix naeuz aeu doemq bae lo, sim in ha.

Gizneix mbouj cij aen laeuz Daeggveij deng doemq, hangz ranz gizneix 70 gan, miz boux hwnj seiq haj caengz, miz boux hwnj song sam caengz, laeuz sang laeuz daemq, cungj deng doemq caez.

Guh baenz aen laeuz yienghneix mbouj yungzheih, ngaenzcienz mbouj dwg ceijnyungq iet fwngz bae aeu couh ndaej. Daeggveij dwg vunz lajmbanj, 10 bi gonq caeuq mehyah itheij daiq song boux lwgnyez daeuj daengz yienhsingz dajgoeng, caep cien、buen naez、sauq gai、beuj haex, hong naek hong mbaeu de cungj guh gvaq, ngaenzcienz baez maenz baez maenz rom hwnjdaeuj.

Bien ndang miz vunz cawx dieg hwnj ranz, Daeggveij hix yungh 5 fanh maenz cawx aen dieg ranz neix, yawj daeuj mbouj geij nanz duz gaeqndoeng couh yaek baenz duzfungh, boux vunz rungh yaek baenz boux ndaw singz lo. Daeggveij daengx ranz vunz bouxboux simhai, caeuq bouxcawj gai dieg ciemdingh gai dieg habdoengz, gyau ndei ngaenz, Daeggveij couh cawx aen gyaeuj mou ndeu bae ma ranzmbanj caeqbaed, de docih duzbaed ranzmbanj baujyouh de.

Aen dieg neix dwg caeuq reih bouxcawj cawx, mbouj miz maz cwng, couhdwg naeuz, youq neix hwnj ranz mbouj habfap, gyoengqde hwnj aen lawz, cwngfuj couh baij vunz bae dawz aen haenx ngaeu roengzdaeuj. Daeggveij daj an giek daengz guh baenz laeuz, mbouj deng ngaeu gvaq, de caegcaeg angq.

70 gan ranz, bouxboux caeuq cwngfuj guh ndoj hwnjdaej, sam haj bi seizgan, gizneix hwnj baenz hangz ranz he lo, cwngfuj mbouj miz banhfap caiq bae ngaeu, gyoengqvunz daj gak dieg daeuj neix, cungjsuenq ndaej an’an onjonj youq roengzdaeuj.

Dingqgangj yaek daj gizgyae guh roendiet doeng bae gizwnq, roendiet couh aeu bu gvaq giz dieg 70 gan ranz neix, 70 gan ranz neix aeu cienzbouh doemq bae. Daeggveij vueng lo, gyoengq vunzlai hix vueng lo, bouxboux mbouj rox baenzlawz guh cij ndei.

Daeggveij nyaenj ndaep gyaeujien, gag gangj gag naeuz:“Suenq lo, caih cwngfuj baenzlawz guh couh baenzde guh ba!”

Cwngfuj baij vunz hwnj ranz daeuj gangj saeh lo, naeuz gaenq youq baihlaj mbouj geij gyae veh aen dieg ndeu. 70 gan ranz neix doemq bae le, soengq boux aen dieg ranz hawj gyoengqde lingh hwnj ranz moq, lij ndaej banh cwng dem, baezneix dieg caeuq ranz cungj duh swhgeij lo, boux ndaw rungh caencingq baenz boux ndaw singz lo. Danghnaeuz gak boux cungj doengzeiq, couh ciem coh roengzdaeuj, gvaqlaeng cwngfuj caiq baij vunz gvaqdaeuj gujsuenq ranz lawz hab bouj hawj geijlai ngaenz.

Daeggveij naemjnaemj, gag nyinhnaeuz gen cueg euj mbouj gvaq goekga, raemxrongz moek mbouj ndaej daihhaij, baihgwnz naeuz yienghneix couh yienghneix lo.

Ciepdaeuj, gizneix luenhfoenfoen hwnjdaeuj lo, ranzranz boux hung boux iq cungj okbae ra ranzco, ranzranz boux hung boux iq cungj guhdoih haeujhaeuj okok buen doxgaiq.

Dieg ranz moq engq gyawj yienhsingz, engq gaenh daihloh, Daeggveij gig muenxeiq, dieg ranz faen daengz fwngz, de couh ra vunz daeuj guh ranz moq lo.

Guh ranz moq mbouj dwg saeh iq, ciep raemx ciep dienh couh aeu buet daengz baeg bae. Hai hong gaxgonq Daeggveij couh sai bae fanh lai maenz ngaenz, gag naemj: Swhgeij caen dwg mingh cuij, ciuh vunz caengz geq couh deng guh ranz geij baez.

Ranz moq Daeggveij guh daengz caengz daihngeih seiz, boux ranznden hix daeuj guh ranz lo, boux ranznden neix Daeggveij mbouj raen gvaq, mbouj rox de dwg vunz gizlawz.

Haemh ndeu yaek sou hong seiz, boux ranznden daeuj caeuq Daeggveij doxyaeng, naeuz de gvaq song ngoenz couh hai hong lo, seizneix raemx caeuq dienh lij caengz ndaej ciep daeuj, ndaej mbouj ndaej ciep Daeggveij aeu dienh aeu raemx yungh gonq. Daeggveij naeuz:“Mwngz caj geij ngoenz gonq ba, daengz ngoenz mwngz hai hong raemx dienh lij caengz ndaej ciep caiq gangj.”

Naemj daengz ciep dienh ciep raemx gienh saeh neix, Daegveij roxnyinh daiq sinhoj lo, bae gouz vunz daeuj cang, vunz doi ngoenz youh ngoenz, doeklaeng soengq bae geij bau ien vunz cij daeuj. Raemx bae gouz vunz, dienh hix bae gouz vunz, seizneix naemj ciep faenh gou couh ndaej yungh, bouxlawz mbouj rox yienghneix fuengbienh? Daeggveij caen mbouj naemj hawj ranznden couh yienghneix vei couh ndaej ciep dienh ciep raemx de bae yungh.

Ranz moq Daeggveij guh baenz caengz daihsam seiz, boux ranznden daeuj hai hong lo, ranznden youh daeuj ra Daeggveij aeu dienh aeu raemx. Daeggveij naeuz:“Gij dienhsienq gou iq lai, gij suijguenj gou hix mbouj hung, raeuz song boux guhdoih yungh, lau yungh mbouj gaeuq bw.”

Ranznden naeuz:“Gaeuq ba gaeuq ba, gou ngamq hai hong mbouj yungh geijlai raemx caeuq dienh, caiq gangj, mwngz yungh seiz gou mbouj yungh, baenzlawz mbouj gaeuq ni? Yungh bae geijlai raemx dienh, gou ciuq hawj ngaenz.”

Daeggveij naeuz:“Ngaenz mbouj ngaenz mbouj youqgaenj, dienh raemx mbouj gaeuq yungh couh nguh hong lo, mwngz lij dwg bae ranz wnq ciep ba.”

Dingq Daeggveij yienghneix gangj, ranznden rox Daeggveij mbouj hawj ciep aeu dienh aeu raemx lo.

Ranz bouxwnq liz gyae lai, naemj ciep dienh ciep raemx daeuj yungh aeu feiq haujlai goengfou cij ndaej, seizneix youh gaenj yungh raemx yungh dienh cij ndaej hai hong, boux ranznden cim coh Daeggveij, ndawsim gig geizheih.

Ranz Daeggveij guh yaek baenz lo, seizneix ngaenzbouj lij caengz ndaej daengz fwngz caez, de mbouj miz ngaenzhong hawj vunz, baenzneix couh bae ra aeu ngaenzbouj.

Daeggveij daeuj daengz gensezgiz, boux ciepdaih de dwg mehmbwk ndeu. De naeuz:“Mwngz aeu bae banh cwng gonq, banh cwng bae geijlai ngaenz, dou cij rox gij ngaenz mwngz lij lw geijlai.”

Daeggveij cam:“Bae gizlawz banh cwng?”

Boux ciepdaih naeuz:“Mwngz dauqbae aeu bonj bonjhugouj ranz mwngz、mbaw sinhfwncwng mwngz caeuq baihswiz baihgvaz song boux ranznden bonjhugouj caeuq sinhfwncwng gyoengqde daeuj daengz neix dwnghgi gonq, gvaqlaeng dou caiq doengzcaez bae bang sou banh.”

Daeggveij dauq daengz ranz, diemj ci ien he cit hwnjdaeuj, de bungz daengz saeh nanz lo. Ci ien cit sat, de baez vut gyaeujien, gvaqbae cam boux ranznden aeu bonjhugouj caeuq sinhfwncwng. Boux ranznden naeuz:“Bonjhugouj gou gyoengqlwg daiq bae Guengjdoeng lo, mbaw sinhfwncwng gou gaenq doek ra mbouj raen gvaq.”

Daeggveij cumh bak, mbouj sing mbouj yiengj dauqranz.

Ranz guh baenz lo, gyoengq vunz guh hong cungj caj Daeggveij aeu ngaenzhong. Feiz doek gwnz din lo, Daeggveij youh daeuj daengz gensezgiz, naeuz:“Mbouj aeu gij bonjhugouj caeuq sinh- fwncwng ranznden ndaej mbouj ndaej ha?”

“Mbouj ndaej.” Boux ciepdaih naeuz.

Simfanz, Daeggveij gwn di laeuj, gag naemj: Danghnaeuz ranznden cungj mbouj hawj gij cwnggen, baenzlawz guh ni? Miz vah naeuz “miz ngaenz goj heuh fangz muh haeux”, gou dawz ngaenz bae hawj de, 200 maenz, 300 maenz, 500 maenz, cijaeu de nyienh hawj, sai bae geijlai ngaenz gou cungj nyienh.

Daeggveij youh daeuj ra ranznden. Ranznden naeuz:“Caen mbouj miz banhfap hawj mwngz.”

Daeggveij naeuz:“Gou hawj ngaenz hawj mwngz, seizneix gou gaenj aeu, mboujnex couh mbouj gouz mwngz lo.”

“Vunz naeuz ‘10 boux gyahoh mboujyawx boux roqranz’, neix mbouj dwg mwngz gouz gou gou gouz mwngz, gou caen mbouj miz hawj mwngz.” Boux ranznden naeuz.

Daeggveij miz di laeuj hwnj, vah sang naeuz:“Mwngz gaej doeg lai, daengzcog mwngz hix aeu banh cwng, daengzseiz mwngz hix aeu gouz gou.”

Boux ranznden vah ndongjndat naeuz:“Daengzseiz caiq gangj. Danghnaeuz doeklaeng mwngz mbouj hawj gou, raeuz guhdoih mbouj banh cwng ndaej mbouj ndaej.”

Ranznden ngoenzngoenz guh ranz moq, mbouj leix banh mbouj banh cwng, Daeggveij dingz hong roengzdaeuj, ngoenzngoenz siengj baenzlawz bae banh cwng.

Bi he gvaqbae, aen ranz moq ranznden guh baenz lo. De mbouj gaenj bae banh cwng, de cawx gyasei, cingj beixnuengx gwn laeuj, ngoenzngoenz nauhyied, lumj guh yiengh hawj Daeggveij yawj nei.

Daeggveij saej humz gaeu mbouj ndaej, heuh vunz bae bang de cam ranznden seizlawz bae banh cwng, ranznden naeuz mbouj gaenj, cwngfuj seizlawz heuh banh de cij banh.

Haemh ndeu, Daeggveij cawx laeuj cawx gaeq bae ra ranznden, vah unq vah diemz coenzcoenz nyinh loek. Ranznden naeuz:“Mwngz rox yienghneix couh baenz lo, laeuj noh mwngz dawz dauqbae ba! Raeuz daj diegwnq daeuj, daengz neix couhdwg beixnuengx, muengh mwngz ngoenzlaeng guh saeh aeu siengj bae gyae di.”

“W, w.” Daeggveij saeqsing han, naj nding- fwngfwng ngaemgyaeuj dauqbae lo.