Fwencuengh dwg cungj go Bouxcuengh vunzbiengz gingciengz dingqnyi haenx, hix dwg cungj go vunz Bouxcuengh ceiq gyaezmaij ndeu. De dwg cungj vwnzyoz ndawbiengz Bouxcuengh ndeu, hix dwg aen bouhfaenh gyoebbaenz sei Cunghvaz ndeu.

Fwencuengh coenz dinj“ndang”iq, ndawde gamjcingz caensaed, sing fwen ndeidingq. Fwencuengh ciuq doenghgij daegdiemj singmeh yinh- meh singdiuh Vahcuengh daeuj nda coenzfwen, cauhbaenz cungj sibgvenq nda sing coq cih couhdwg gizlawz nda cih singraez gizlawz nda cih singdinj、yinhmeh baenzlawz aeu ndaej dox- boiq、coenz fwen miz geijlai cih caeuq aeu geijlai coij daengj, cungj sibgvenq gagmiz neix hawj Fwen- cuengh miz daegsaek Bouxcuengh noengznaz dangqmaz.

Fwencuengh Siengcouh miz doxdoiq eu、doengzcaez eu、gag eu daengj lai cungj. Baez daengz seiz vunz guh hawfwen、doxcomz eu fwen、doxdax eu fwen, cungj miz canghfwen dangseiz cauh fwen、dangseiz eu fwen、boux cam boux han、aj bak baenz fwen, vahcoenz ndeiriu, ok fwen youh vaiq youh ngamjdeng, neix gingciengz hawj bouxdingq riuhaha bae. Gyoengq canghfwen Fwencuengh Siengcouh ceiq maij doxdoiq eu, cungj fuengsik doxdoiq eu neix hix ceiq miz daegsaek, hix heuhguh doiq fwen、beij fwen、doxdax; ndawde miz haujlai doxdingj doxbuek、doxdax,maezvunz caeuq ndeiyawj dangqmaz. Fwencuengh Siengcouh dangguh cungj vwnzyoz ndawbiengz ndeu, couh miz gyaq vwnzyoz sang raixcaix.

Youq Siengcouh Yen, mbouj- guenj youq ndawsingz roxnaeuz lajmbanj, vunzlai cungj gyaezmaij Fwencuengh. Baez daengz ngoenz- ciet、guhlaeuj couxbawx haqlwg、guh hoihmiuh、gvaq ngoengzseng、haeuj ranzmoq daengj doengh ngoenz guh saeh’angq, vunzlai cungj gyaez eu Fwencuengh. Youq bingzseiz, mbouj- guenj youq vwnzva gvangjcangz、gyaeujgiuz、gunghyenz ndawsingz, roxnaeuz youq gyang haw gyaeuj haw ndaw yanghcin, roxnaeuz youq ndaw naz henz reih lajmbanj, cungj ndaej- nyi vunz eu Fwencuengh sing raez ndeidingq. Vunzlai Siengcouh gyaez- maij eu Fwencuengh guh’angq, hix baengh Fwencuengh guh gizgyaeng hawj ganbu ginzcung hag caeuq cienz doenghgij fuengcim cwngcwz dangj raeuz. Vunzlai Siengcouh guh vwnzva hozdung ndawbiengz caeuq gvaq saedceij, cungj ndek mbouj ndaej Fwencuengh lo.

Bi 2010, Fwencuengh Siengcouh ndaej Gvangjsih Bouxcuengh Swcigih Yinzminz Cwngfuj doengzeiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.

Bi 2011、bi 2012 Gvangjsih Densidaiz(dangseiz baenzneix heuh, baihlaeng doxlumj) gicej song baez daengz Siengcouh Yen Majbingz Yangh guh aen cezmuz ingjsiengq Fwencuengh Siengcouh, liuxle youq Gvangjsih Densidaiz book. Bi 2013, Majbingz Yangh ndaej Gvangjsih Ginzcung Yisuzgvanj、Gvangjsih Fwencuengh Sanhgoh Cungjvei soengq hawj aen cwngheuh“Guengjsae aen mbanjranz Fwen- cuengh”.

2018 nienz 9 nyied 13 hauh, gyoengq canghfwen Fwencuengh Siengcouh bae daengz Ngozlozswh Fuzlahdizvozswhdohgwz camgya yienjok, yienj aen cezmuz Fwen- cuengh Siengcouh《Cungguek Ngoz- lozswh Vwnzva Doxgyau》caemhcaiq ndaej gaiq ciengjluengz ndeu. Baez neix yienjok le, couh hainduj hawj Fwencuengh Siengcouh ndaej hwnj daizheiq seiqgyaiq lo.