“Danghnaeuz mwngz caiq caeuq lwg fangzraq Ranzlinz baedauq, gou couh mbouj nyinh mwngz guh lwg.” Boh Lij Naz Lauxlij hozndat dwk vut coenz vah neix le, couh ok dou bae lo.

Boh Linz Dungh hix ndaq Linz Dungh naeuz:“Danghnaeuz mwngz caiq caeuq Lij Naz doxraen, gou moeb mwngz ga raek bae!” Dingq daxboh gangj gij vah neix, Linz Dungh gyaeuj hix mbouj ngeux byaij ok gyanghongh bae.

Bide mbwnrengx, ndaw naz geh- dek aj ndaej iet din cungj roengz ndaej bae. Gyoengqvunz faenfaen daj ndaw dah yinx raemx daeuj dwk naz, raemxdah riengz gij mieng iq ngutngut ngeujngeuj lae. Gizgyawj geij aen cungdaeuz raemx couh daengz naz, gizgyae baenzngoenz cij daengz. Namh hawq lai, le haujlai nanz cij ndaej daengz.

Naz lai raemx noix, aeu doxlwnz cij ndaej, ngoenzneix duh mwngz, ngoenzcog duh gou. Vihneix gyoengq- vunz bienq ndaej mbouj lumj gaxgonq yienghhaenx hozndei lo, doxceng dwg saeh bingzciengz, mizseiz lij doengh- din doenghfwngz dem.

Boh Lij Naz Lauxlij caj le sam seiq ngoenz, gig mbouj yungzheih cij lwnz daengz de yinxraemx haeuj naz, Boh Linz Dungh Lauxlinz itdingh ciengj gonq aeu raemx, naeuz de gaenq caeuq boux baihgonq gangj gvaq lo, ngoenzneix lwnz daengz de.

Song mbiengj gak gangj gak miz leix, boux mbouj nyiengh boux, Lauxlij baez heiqndat couh nyoengx Lauxlinz baez he, Lauxlinz lajdin baez raeuz, seiqguengq yiengq mbwn laemx youq ndaw naz dek, benq ndok caekhaex deng laemx sieng lo, yw baenz buenq bi cij ndei.

Caen dwg ien’gya heih giet mbouj heih gej, seizneix, song mbiengj bouxlaux miz caeuz, song mbiengj lwgnyez miz cingz, Lauxlij mbouj ndei eiqseiq, Lauxlinz heiqndat caengz siu.

Linz Dungh ngeix de caeuq Lij Naz song boux guhdoih okrog bae dajgoeng, sam haj bi cij maranz, daengz seizhaenx aiq songde gaenq miz lwg lo, bouxgeq hix mbouj miz banhfap lo.

Lij Naz mbouj doengzeiq baenz- neix guh, de nyinhnaeuz gij sim bouxgeq mbouj ndaej gej, seiq neix hix gvaq mbouj ndaej onj.

Saehcingz couh yienghneix dox- gaz dwk.

Ngoenz ndeu, Lauxlinz heuh bouxmoiz gaisau Siuh Danh hawj Linz Dungh guh yah, Linz Dungh ndawsim yienznaeuz gig mbouj nyienh, cix ngwn mbouj gvaq, cijndei ciepsouh, mbouj geij nanz de couh caeuq Siuh Danh doxaeu lo.

Ngoenz he, Siuh Danh doiq Linz Dungh naeuz:“Lij Naz dahsau neix caemh mbouj loek, youh dwg dahlwg dog he, gou siengj bang de ra daegmbauq he daeuj hwnjdou, baenz- lawz yiengh?”

Linz Dungh baez dingq naj bienq saek liux, ndaq naeuz:“Swhgeij gvaq ndaej ndei couh ndaej lo, guenj gij saeh bouxwnq baenzlai guh maz?” Linz Dungh laihnaeuz Siuh Danh gaenq rox di maz, ndawsim miz di mbouj onj.

Siuh Danh gangj daengz guh daengz, de ra daengz Lij Naz caeuq Lauxlij, lwnh gijneix hawj song bohlwg de dingq.

Lauxlij gig mbouj siengj hawj Siuh Danh haeuj dou. Siuh Danh roxnyinh gig geizheih. Siuh Danh gangj mingz de vihmaz daeuj, Lauxlij cij cengqgengz heuh de haeuj ranz daeuj naengh. Lij Naz dingq le mbouj swt saekdi, de seizneix simcingz gig mbouj ndei, daengx ngoenz gven swhgeij youq ndaw rug, byawz cungj mbouj siengj raen, bienq ndaej youh byom youh henj, lumj duj va ronghsien deng mwi dimz nei reuq bae lo.

Lauxlij song gvanbaz dingq Siuh Danh naeuz daegmbauq heuh guh Vangz Yungj, gak fuengmienh cungj mbouj loek, couh gienq Lij Naz raen baez he.

Song mbiengj doxraen le, Lij Naz roxnyinh Vangz Yungj gig rimhoz.

Couh yienghneix, song ranz vunz youq ndaw saedceij bongh baenaj haenx vuenyungz youh nyaengqnyat gvaq dwk, rumz bingz langh dingh.

Ngoenzhaenx, Siuh Danh bae henz dah saeg buh, Simjngeih caeuq Simjngux caeux couh youq gizhaenx lo. Siuh Danh siengj hwk gyoengqde baez he, couh laeglemx byaij gvaqbae.

“Seizneix ndei lo, Linz Dungh caeuq Siuh Danh doxaeu lo, ranz Lauxlinz caeuq ranz Lauxlij hix mbouj nauh lo.” Simjngeih naeuz.

“Dwg ha, song boux ndeindindi cix deng bik sanq bae, hojsik bw……” Dwg sing Simjngux.

Siuh Danh dingq le, ndawsim baez nyengh. Mbouj rox gyoengqde gangj gijneix dwg maz eiqsei. De daengz gyawj seiz, gyoengqde fwt dingz bak roengzdaeuj, gangj gij saeh wnq lo. Siuh Danh cang guh mbouj ndaejnyi songde gangj vah gvaq nei, ciuqyiengh caeuq songde doq gangjriu doq saeg buh.

Bouxgangj fouzeiq, bouxdingq mizsim. Siuh Danh ndawsim ngeizvaeg raixcaix. De geiq ndaej miz haemh ndeu, Linz Dungh caeuq baengzyoux ndoet laeuj fizfwdfwd, mbouj dajcaemx couh hwnj congz ninz, guh loq seiz ndaw bak itcig “Naz Naz” heuh mbouj dingz.

Siuh Danh cam Linz Dungh heuh maz? Linz Dungh naeuz mboengqneix mbwnrengx lai, yousim gaiq naz deng dairoz.

Lij miz baez he, Vangz Yungj miz saeh okrog bae geij ngoenz, daeglwg de ngamq ndaej buenq bi sawqmwh fatndat, Linz Dungh mbouj aeu heuh couh gag haici doq soengq bae yihyen.

Siuh Danh cungj roxnyinh daengz, Linz Dungh moix baez yawj Lij Naz, gij lwgda de caeuq yawj bouxwnq couh mbouj doxdoengz, Siuh Danh swhgeij hix gangj mbouj ok vihmaz.

Caiq naemjnaemj swhgeij, Siuh Danh hix nyinh lo, de ciengxlwenx lumz mbouj ndaej Vangz Yungj.

Siuh Danh caeuq Vangz Yungj gaxgonq hix doxndiep doxgyaez gvaq, Vangz Yungj beixnuengx lai, youh gungzhoj, bohmeh Siuh Danh gig fanjdui de haq hawj Vangz Yungj.

“Danghnaeuz mwngz caiq caeuq Vangz Yungj doxgyaez, couh gaej siengj yamqdin haeuj ranz lo, couh dangq dou mbouj miz mwngz dahlwg neix!” Boh Siuh Danh fok naeuz.

Naemj daengz Linz Dungh caeuq Lij Naz, caiq naemjnaemj swhgeij caeuq Vangz Yungj, Siuh Danh ndawsim yub hwnj yub roengz, nanznanz mbouj ndaej dingh roengz- daeuj.

Daj Vangz Yungj caeuq Lij Naz doxaeu le, Siuh Danh hix lau Linz Dungh yawj ok maz riz daeuj.

Ngoenz ndeu, Siuh Danh aemq loz hwnj bya bae gvej nywj gueng cwz. Ndwen loeg, gwnz bya gorum gohaz mwncupcup, heuswdswd, Siuh Danh cingq gungj hwet nyaengq dwk gvej nywj, duz ngwzheu he fwt haeb faj fwngzswix de, de hwk ndaej daihsing swenj hwnjdaeuj.

Ngoenzde dingjlingz Vangz Yungj daiq boux canghbuenq haeuj ndaw bya yawj faex, ndaejnyi miz vunz hemq gouqmingh, de ganj gvaqbae. Rox Siuh Danh deng ngwz haeb le, aj bak coh baksieng cup gij lweddoeg okdaeuj, yienzhaeuh aeu bingz raemx riengz ndang daiq swiq seuq gizsieng Siuh Danh, couh haici soengq Siuh Danh bae yihyen.

Siuh Danh roxnyinh ndang raeuj sim hix raeuj, roxnyinh cij miz Vangz Yungj cij ndaej hawj de gijneix.

Bet nyied cibngux, ronghndwen daj ndaw fwj ndonj okdaeuj, baenzneix luenz, baenzneix rongh. Siuh Danh doiq Linz Dungh naeuz:“Haemhneix heuh Vangz Yungj song gvanbaz gvaqdaeuj doengz gwn caeuz ba.”

“Yienghneix mbouj daiq ndei ba, caiq naeuz raeuz 4 boux seizneix mbouj dwg gvaq ndaej ndeindindi luma? Gaej luenh dap mae lo.” Linz Dungh doi naeuz.

“Gaej mbouj ndei eiqseiq lo, raeuz haemhneix couh dawz vah ndawsim gangj cingcuj, gaej yaeuh swhgeij lo, loek gvaq ciuhneix mbouj miz ciuhlaeng.” Siuh Danh danq naeuz.

Haemhhaenx 4 boux gak miz simsaeh naekgywg, nanz mbouj nanz cij cab ok saek coenz vah.

Siuh Danh naeuz:“Haemhneix raeuz 4 boux ndaej doxcomz, wngdang sim’angq cij dwg, daeuj, ndoet cenj laeuj neix roengzbae gonq.”

Geij cenj laeuj roengz dungx, gak boux linx raeuz vah lai lo. Linz Dungh naeuz:“Vangz Yungj, hoh mwngz caeuq Siuh Danh ngoenzlaeng saed- ceij gvaq ndaej engq vaiqvued.”

Siuh Danh muenghmuengh Lij Naz, naeuz:“Lij Naz, hoh mwngz caeuq Linz Dungh ngoenzlaeng saed- ceij gvaq ndaej engq vuenyungz.”

Haemhhaenx, gyoengqde 4 boux naengh daengz gig hwnz gig hwnz. Gyoengqde yaek sanq bae seiz, hix mbouj rox seizlawz, Lauxlinz gvanbaz caeuq Lauxlij gvanbaz gaenq ndwn youq baihlaeng gyoengqde, 4 boux laux doengzcaez gingz laeuj hwnj- daeuj, caez sing doiq 4 boux coz naeuz:“Dou hix hoh sou 4 vunz gvaq ndaej diemzswdswd!”

Ngoenzhaenx, ndit ronghsagsag, Linz Dungh caeuq Vangz Yungj, Lij Naz caeuq Siuh Danh fwngz gaem fwngz, mbaq baengh mbaq gangjgangj riuriu bae coh Minzcwnggiz, gwnz naj coux rim vuenyungz.