Youq Gvangjsih Hocouh Si ranghdieg Yauzcuz comzyouq, vunz Yauzcuz gvaq aenciet Buenzvuenz seizhaenx guh aen yizsi boiz simmuengh hawj Buenzvuengz. Guh aen yizsi neix ne bouxsae、canghfwen、bouxcawj doengzcaez ciengq seilizsij Yauzcuz《Golaux Buenzvuengz》. 《Golaux Buenzvuengz》ndaej vunz- biengz haenh guh bonj sawhung seigo, dwg aen’gyaeng dijbauj cang vwnzva yisuz youz vunz Yauzcuz doengzcaez cauh’ok haenx.

《Golaux Buenzvuengz》youh heuhguh《Saw Golaux》《Saw Roen- hung》daengj, miz cibbet duenh、ngeihcibseiq duenh caeuq samcib- roek duenh sam cungj saw; sam bonj saw ndawde mizdi haenqrengz yienh’ok biengz Yauzcuz doenghgij gojsienbaed、lizsij、cwngci、ginghci daengj, mizdi haenqrengz yienh’ok nungzyez caeuq vwnzva yisuz; gak cungj saw doxciuq doxrongh, neix hawj《Golaux Buenzvuengz》baihndaw geiq miz “doxgaiq”engq lai engq ndeiyawj. Gyoengqvunz Yauzcuz guh hozdung boiz simmuengh hawj Buenzvuengz seizhaenx ciengq gak cungj go, neix vunzbiengz dawz gij go neix geiq haeuj ndaw bonj sawfwngzgaem bae, couh miz le doenghgij bonj sawfwngzgae《Golaux Buenzvuengz》ndawde miz go lai cungj lai yiengh、neiyungz lai cungj lai yiengh haenx, yienghneix guh le couh hawj《Golaux Buenzvuengz》miz haujlai bonj baihndaw mbouj dox- doengz haenx.

《Golaux Buenzvuengz》dwg bouh saw gogeq golizsij youz vunz Yauzcuz daih dam daih geiq le comz hwnj- daeuj, doenggvaq geiq ndei gij saehcaen gaxgonq caeuq ciengzmienh saedceij hungmbwk, baijok vwnzva geq Yauzcuz ndawde doenggij goek- gaen daeuz、hwngfat baenzlawz yiengh caeuq miz maz yinxdaeuz maezvunz, lumj soh gangj simngeix hoznaemj ityiengh nei baijok doengh- gij vwnzva minzcuz gagmiz youh hungmbwk caeuq cingsaenz minzcuz gagmiz gvendaengz vunz Yauzcuz; dwg gij gyonjcomz caeuq yienh’ok gvendaengz lizsij vwnzva Yauzcuz, neix ndaej vunzbiengz dangguh doenghyiengh lumj doenghduz doenghgo daj ciuqgeq lix daengz seizneix haenx aeu daeuj yenzgiu vwnzva Yauzcuz.

Ciuq vunz lwnh, gaxgonq vunz Yauzcuz banbiengz hamj haij seizhaenx, bungz deng rumz haenq langh hung, couh gouz Buenzvuengz, lwnh simmuengh, neix le couh ndaej bingzonj hamj haij lo; daengzlaeng vunz Yauzcuz couh mbouj dingh seiz“boiz simmuengh hawj Buenz- vuengz”. Vunz Yauzcuz dwg vunz- daihlaeng Buenzvuengz, vihliux geiqniemh Buenzvuengz, gyoengq- vunz Yauzcuz moix bi cungj gvaq Cietbuenzvuengz. Gvaq aen ciet neix caeuq guh hozdung“boiz simmuengh hawj Buenzvuengz”, cungj aeu bouxsaedauh ciengq《Golaux Buenz- vuengz》.

Geij bi gyawj neix, vunzbiengz aeu《Golaux Buenzvuengz》guh goek, bien aen cezmuz sei foux yinhyoz hung youq gwnz daihheiq yienj, neix vunzlai maij yawj haenh ndei, baenz le Cietbuenzvuengz ndawde aen cezmuz miz daegsaek lai dangqmaz youh yienhda raixcaix.

Bi 2010, golaux Buenzvuengz Yauzcuz Hocouh ginggvaq Gvangjsih Bouxcuengh Swcigih Yinzminz Cwngfuj doengzeiq, ndaej lied hauj daihsam buek swcigih gaep feihvuzciz vwnzva yizcanj mingzloeg.